ગુજરાતમાં ઠંડીના ચમકારા સાથે બેવડી ઋતુનો અનુભવ

ગુજરાત રાજ્યમાં છેલ્લા કેટલાક દિવસોથી ઠંડીનું મોજું ફરી વળ્યું છે, જોકે આજે લઘુત્તમ તાપમાનમાં આશરે એક ડિગ્રી જેટલો આંશિક વધારો નોંધાયો છે. તેમ છતાં ઉત્તર તરફથી ફૂંકાતા સૂકા અને ઠંડા પવનોને કારણે ઠારની અનુભૂતિ યથાવત્ રહી છે. આ વધારા છતાં કચ્છનું નલિયા 10.8 ડિગ્રી સેલ્સિયસ સાથે રાજ્યનું સૌથી ઠંડું શહેર બન્યું છે.

હવામાન વિભાગના મતે, આગામી 3 દિવસ દરમિયાન તાપમાનમાં 2થી ૩ ડિગ્રીનો વધારો થવાની શક્યતા છે, પરંતુ ત્યારબાદ ફરી એકવાર ઠંડીનો ચમકારો વધશે તેવી આગાહી છે.

મુખ્ય શહેરોનું લઘુત્તમ તાપમાન

રાજ્યના મુખ્ય શહેરોના તાપમાન પર નજર કરીએ તો, અમદાવાદમાં 15.1 ડિગ્રી, ગાંધીનગરમાં 13.5 ડિગ્રી અને ડીસામાં 13.3 ડિગ્રી તાપમાન નોંધાયું છે. સૌરાષ્ટ્ર-કચ્છમાં પણ પારો 15 ડિગ્રીની આસપાસ જળવાઈ રહ્યો છે, જેમાં ભુજમાં 14.5, રાજકોટમાં 12.6, અમરેલીમાં 12.6 અને ભાવનગરમાં 15.8 ડિગ્રી તાપમાન નોંધાયું છે. મોટાભાગના વિસ્તારોમાં સરેરાશ લઘુત્તમ તાપમાન સામાન્ય કરતાં નીચું રહેતા કડકડતી ઠંડીનો અનુભવ થઈ રહ્યો છે.

બેવડી ઋતુનો અનુભવ

હવામાનમાં આવી રહેલા ઉતાર-ચઢાવને કારણે લોકોમાં સ્વાસ્થ્ય સમસ્યાઓ વધી છે. વહેલી સવારે હાડ થીજાવતી ઠંડી, બપોરે હળવો તડકો અને સાંજ પડતાં ફરી ઠંડીનું પ્રમાણ વધવાથી શરદી-ખાંસી અને ફ્લૂના કેસોમાં વધારો જોવા મળી રહ્યો છે.

હવામાન વિભાગે આગામી 24 કલાક માટે હવામાન શુષ્ક રહેવાની આગાહી કરી છે, આ ઉપરાંત દેશમાં ઉત્તરાખંડ અને હિમાચલના પહાડી વિસ્તારોમાં થયેલી હિમવર્ષાની અસર હજી પણ રાજ્યના વાતાવરણ પર જોવા મળશે.

 વિપરીત હવામાનનો માહોલ

ગુજરાત અને રાજસ્થાન સહિત સમગ્ર પશ્ચિમ ભારતમાં જ્યાં શીત લહેરનો પ્રકોપ છે, ત્યાં દક્ષિણ ભારતમાં સ્થિતિ વિપરીત છે. ભારતીય હવામાન વિભાગે તમિલનાડુ, કેરળ અને આંદામાન-નિકોબારમાં 21થી 26 નવેમ્બર દરમિયાન ભારે વરસાદ અને વાવાઝોડાની ચેતવણી આપી છે. ઉત્તર ભારતમાં પણ રાજસ્થાન, મધ્યપ્રદેશ અને પંજાબમાં તાપમાન 10 ડિગ્રીથી નીચે ગગડ્યું છે, જેના કારણે દેશવાસીઓને હાલમાં 'બેવડી ઋતુ'ના મારનો સામનો કરવો પડી રહ્યો છે.