GPSCનો મોટો નિર્ણય: ડ્રગ્સ ઇન્સ્પેક્ટર વર્ગ-2 ઈન્ટરવ્યુ રદ, પેનલિસ્ટને આપી નોટિસ

GPSCના મૌખિક ઈન્ટરવ્યુ મામલે અખિલ આંજણા કેળવણી મંડળના પ્રમુખ અને ભાજપના નેતા હરીભાઈ ચૌધરીએ મુખ્યમંત્રીને પત્ર લખી સવાલો ઉઠાવ્યા બાદ હવે મૌખિક ઈન્ટરવ્યુના પેનલિસ્ટના સરદારધામ કનેક્શન અંગે ખુલાસો થયો છે. તેથી ગુજરાત જાહેર સેવા આયોગના અધ્યક્ષ હસમુખ પટેલે ટ્વિટ કરી ડ્રગ્સ ઈન્સપેક્ટર વર્ગ-2 ના મૌખિક ઈન્ટરવ્યુ રદ કરી પેનલિસ્ટને નોટિસ આપી ખુલાસો માગ્યો છે. જ્યારે મૌખિક ઈન્ટરવ્યુ અંગે નવી તારીખ જાહેર કરવાનો નિર્ણય કરાયો છે.

GPSCની ભરતી પ્રક્રિયા મામલે ફરીથી નવા વિવાદો શરૂ થયા છે. ભાજપ નેતા હરીભાઈ ચૌધરીના લેટર બોંબ બાદ રાજ્ય સરકાર અને GPSC સામે પારદર્શક ભરતી પ્રક્રિયા મુદ્દે સવાલ ઉઠ્યા છે. તેવામાં ડ્રગ્સ ઈન્સપેક્ટર વર્ગ-2 ભરતી પ્રક્રિયા અંતર્ગત પેનલમાં બેસનાર પેનલિસ્ટના સરદારધામ કનેક્શનનો ખુલાસો થયો છે. આ ભરતી પ્રક્રિયામાં તજજ્ઞ તરીકે બેસનાર પેનલિસ્ટે સરદારધામમાં મોક ઈન્ટરવ્યુ લીધા હોવાનો ખુલાસો થયો છે. GPSCના અધ્યક્ષ હસમુખ પટેલને તેની જાણ થતાં બે દિવસ લીધેલા ડ્રગ ઇન્સ્પેક્ટરના ઈન્ટરવ્યુ રદ કરી ફરીથી ઈન્ટરવ્યુ લેવાનો નિર્ણય કર્યો છે. ડ્રગ્સ ઇન્સ્પેક્ટર માટે 32 ઉમેદવારોએ ઇન્ટરવ્યુ આપ્યા હતાં. જો કે, ડ્રગ્સ ઇન્સ્પેક્ટર માટે નવેસરથી ઈન્ટરવ્યૂ લેવામાં આવશે. ઈન્ટરવ્યુની નવી તારીખ જાહેર કરાશે. હવેથી નવી પેનલ ઉમેદવારોનું ઇન્ટરવ્યુ લેશે. જીપીએસસી હવેથી પેનલિસ્ટ પાસેથી લેખિત બાંહેધરી લેશે કે, તેઓ ખાનગી કોચિંગ ક્લાસમાં નહી જાય.

હસમુખ પટેલે ટ્વિટમાં શું કહ્યું?

GPSCના અધ્યક્ષ હસમુખ પટેલે શનિવારે (17 મે) ટ્વિટ કરતાં જણાવ્યુ છે કે, ગઈકાલથી આયોગમાં ડ્રગ્સ ઇન્સ્પેક્ટરના ઇન્ટરવ્યુ શરૂ કરાયા છે. આજે સાંજે આયોગના ધ્યાન પર આવેલ છે કે ઇન્ટરવ્યુના એક તજજ્ઞએ સરદારધામમાં મોક ઇન્ટરવ્યૂ લીધા હતા.‌ ડ્રગ્સ ઇન્સ્પેક્ટરના ઇન્ટરવ્યુમાં તજજ્ઞ સરદારધામ ખાતે મોક ઇન્ટરવ્યૂમાં ગયેલાનું ધ્યાનમાં આવતાં લેવામાં આવેલા ઇન્ટરવ્યૂ રદ કરવા પડ્યા છે. ભવિષ્યમાં આવું ન થાય તે માટે પેનલ મેમ્બર્સનુ અગાઉથી લેખિતમાં ફોર્મ ભરાવવામાં આવશે. ડ્રગ્સ ઇન્સ્પેક્ટર ઇન્ટરવ્યુ વિશે વિગતવારની સૂચનાઓ ટૂંક સમયમાં વેબસાઈટ પર મૂકવામાં આવશે.

મોક ઇન્ટરવ્યુ લેનાર ગેસ્ટની જાહેરાત થઈ હતી

સરદારધામ સિવિલ સર્વિસ સેન્ટરના ચેરમેન ટી.જી.ઝાલાવાડીયાએ જણાવ્યું કે, સરદારધામ ખાતે મોક ઇન્ટરવ્યુમાં ગયેલા પેનાલિસ્ટે GPSCને જાણ કરવી જોઈતી હતી. ઈન્ટરવ્યૂની તારીખની જાહેરાત પહેલા જ મોક ઇન્ટરવ્યુ લેનાર ગેસ્ટની જાહેરાત સરદારધામ વતી થઈ ચૂકી હતી. મોક ઇન્ટરવ્યુ માટે ગેસ્ટના નામ સાથે જાહેરાત મુકવામાં આવી હતી. GPSC એ ઉમેદવારોના હિતમાં કરેલો નિર્ણય આવકાર્ય છે. સરદારધામ 2016 થી સિવિલ સર્વિસ સેન્ટર ચલાવે છે. દર વર્ષે 200 થી 250 વિદ્યાર્થીઓની સ્પર્ધાત્મક પરીક્ષાઓ માટે ભરતી કરે છે. આ પરીક્ષા માટે પણ આ પ્રકારની વ્યવસ્થા કરવામાં આવી હતી. 

શું છે સમગ્ર મામલો?

GPSCએ ફૂડ ઇન્સ્પેક્ટર વર્ગ-2ની 32 જગ્યાની ભરતી જાહેર કરી હતી. જેમાં લેખિત પરીક્ષાના 50 ટકા માર્કસ અને ઇન્ટરવ્યુના 50 ટકા માર્કસ મળીને કુલ 100 માર્કસની પરીક્ષા લઈ પસંદગી કરવાની હતી. બંને પરીક્ષા પછી મેરિટમાં આવે તેની પસંદગી કરવાની હતી. લેખિત પરીક્ષા લેવાઈ ગયા બાદ શુક્રવારે અને શનિવારે મૌખિક ઇન્ટરવ્યુ પ્રક્રિયા હાથ ધરાઈ હતી. ઇન્ટરવ્યુ લેનાર પેનલમાં વિવિધ નિષ્ણાતોને  રાખવામાં આવતા હોય છે. નિષ્ણાતો પૈકી નિવૃત ફૂડ એન્ડ ડ્રગ્સ કમિશ્નર ડી.એમ.પટેલ સરદારધામમાં ચાલતા ટ્રેનિંગ સેન્ટરમાં ઉમેદવારોને માર્ગદર્શન આપવા જતા હતા. ડી.એમ.પટેલે સરદારધામના કોચિંગ ક્લાસમાં ડ્રગ્સ ઇન્સ્પેક્ટર વર્ગ-2 માટે મોક ઈન્ટરવ્યુ લીધા હતા. ઉમેદવારોને ડ્રગ્સ ઇન્સ્પેક્ટરની પરીક્ષા પાસ કરવા શું કરવું તેની ટિપ્સ આપતાં હતાં. સરદારધામમાં બુધવારે ડી.એમ.પટેલનું ખાસ લેક્ચર ગોઠવાયુ હતું. ડ્રગ્સ ઈન્સ્પેક્ટરની પરીક્ષામાં પાસ કરવા શું કરવું તેની ટિપ્સ પણ આપતાં હતાં. જીપીએસસીના પેનલિસ્ટ જ ખાનગી કોચિંગ કલાસમાં જાય છે તેવી ફરિયાદ મળતાં જીપીએસસીના અધ્યક્ષ હસમુખ પટેલે તાત્કાલિક ડ્રગ્સ ઈન્સ્પેક્ટરના ઈન્ટરવ્યૂ રદ કરી દીધાં છે. જ્યારે નિવૃત ફૂડ એન્ડ ડ્રગ્સ કમિશ્નર ડી.એમ.પટેલને નોટિસ ફટકારી ખુલાસો માગ્યો છે. અગાઉ ઇન્ટરવ્યુ પેનલમાં ભાગ લેતા નિષ્ણાત કોચિંગ ક્લાસ કે તાલીમી સંસ્થા સાથે જોડાયેલા હોવાનું ધ્યાન પર આવે તો પેનલ બદલી નાખવામાં આવતી હતી. પરંતુ આ વખતે માત્ર ઇન્ટરવ્યુ રદ કરવામાં આવ્યા છે.

હરીભાઈ ચૌધરીના લેટર બોંબથી GPSC સફાળી જાગી

માણસાના પૂર્વ ધારાસભ્ય તેમજ અખિલ આંજણા કેળવણી મંડળના પ્રમુખ હરીભાઈ ચૌધરીએ GPSCના ઈન્ટરવ્યુમાં ચોક્કસ સમાજના ઉમેદવારોને આયોજનપૂર્વક ઓછા ગુણ આપવામાં આવ્યા હોવાનો લેટર લખી ચોંકાવનારા આક્ષેપો કર્યા હતા. તેમના દાવા પ્રમાણે GPSCમાં લેખિત પરીક્ષામાં ટોચના ગુણ લાવનાર ઉમેદવારોને મૌખિક ઈન્ટરવ્યુમાં માત્ર 20 થી 25 ગુણ આપીને નાપાસ કરવામાં આવે છે.  જયારે જનરલ કેટેગરીના ઉમેદવારો લેખિત પરીક્ષામાં ઓછા ગુણ ધરાવતા હોવા છતાં તેવા વધારે ગુણ આપીને પાસ કરાવવામાં આવી રહ્યા છે. તેના રાજકીય રીતે ઘેરા પ્રત્યાઘાતો પડ્યા હતા.