સરકારી અધિકારીઓને મોંઘવારી નડીઃ નાસ્તા, ભોજનના નવા દરમાં 150 ટકાનો વધારો

રાજ્ય સરકારના અધિકારીઓને પણ મોંઘવારી નડી છે. અધિકારીઓ માટે નાસ્તા અને ભોજનના દરમાં 150 ટકાનો વધારો કરાયો છે. રાજ્ય સરકારના નાણા વિભાગે સત્તાવાર ઠરાવ બહાર પાડી નાણાકીય વર્ષ 2025-26થી અલ્પાહાર ભોજન ખર્ચના નવો દર અમલી બનાવ્યો છે. આ ઠરાવ હેઠળ સરકારી અધિકારીઓને આતિથ્ય દરમિયાન નાસ્તા અને ભોજન પર હવેથી ખર્ચ મળી શકશે. જેના કારણે રાજ્ય સરકારની તિજોરી ઉપર બોજો વધી શકે છે.  

નાણા વિભાગના ઠરાવ મુજબ રાજ્યના વિવિધ કક્ષાના અધિકારીઓ માટે નાસ્તો અને ભોજન માટેના દરમાં વધારો કરાયો છે. રાજ્યના સચિવો માટે નાસ્તા માટેની મર્યાદા ₹20થી વધારી ₹50 કરવામાં આવી છે. જ્યારે ભોજન માટેનો દર ₹100થી ₹250 કરવામાં આવ્યો છે. તેમના વાર્ષિક આતિથ્ય ખર્ચની મર્યાદા પણ ₹10,000માંથી વધારી ₹25,000 કરી દેવામાં આવી છે.

આ ઉપરાંત સચિવ કક્ષાની નીચેના અધિકારીઓ માટે પણ સમાન રીતે દરોમાં વધારો કરવામાં આવ્યો છે. અધિક સચિવ, સંયુક્ત સચિવ, નાયબ સચિવ તેમજ કલેક્ટર અને જિલ્લા વિકાસ અધિકારીઓ માટે નાસ્તા અને ભોજનના દર વધારવામાં આવ્યા છે. કલેક્ટર માટે નાસ્તાનો દર ₹15થી વધારી ₹35 અને ભોજન માટેનો દર ₹75થી ₹180 થયો છે. તેમનો વાર્ષિક ખર્ચ પણ ₹5,000માંથી વધારી ₹12,500 કરવામાં આવ્યો છે.

અન્ય વિભાગોના વડા જેમ કે એડિશનલ કમિશનર, જિલ્લાના અધિકારી માટે પણ મર્યાદામાં વધારો કરવામાં આવ્યો છે. અગાઉ કેટલાક અધિકારીઓ માટે સત્તા નહોતી. હવે તેમને પણ મર્યાદિત ખર્ચ કરવાની મંજૂરી આપવામાં આવી છે.

આ નવા દર 1 એપ્રિલ, 2025થી અમલમાં મૂકવામાં આવ્યા છે. આ ઠરાવમાં સૂચના આપવામાં આવી છે કે, અધિકારીઓએ મર્યાદા કરતાં વધુ ખર્ચ ન કરવો જોઈએ. ખાસ સંજોગોમાં વધુ ખર્ચ થાય તો માત્ર 10 ટકા સુધીના વધારાને જ વિભાગના વડા મંજૂર કરી શકે છે. 10 ટકા કરતાં વધુ ખર્ચ થાય તો તેને નાણા વિભાગને સ્પષ્ટ કારણ સાથે દર વર્ષની 15 એપ્રિલે ખર્ચ રજૂ કરવો પડશે.

સરકારના આ નિર્ણયથી હવે ઉચ્ચ અધિકારીઓથી લઈને જિલ્લા કક્ષાના અધિકારીઓ સત્તાવાર મિટિંગ કે મુલાકાત દરમિયાન મહેમાનોને યોગ્ય રીતે નાસ્તો અને ભોજન પુરૂ પાડી શકશે. જો કે, તેના કારણે સરકારી તિજોરી પર બોજો ચોક્કસ વધશે.