સરકારી પુસ્તકોનું કૌભાંડ: અમદાવાદમાં ટ્રક ઝડપાઈ, તપાસનો ધમધમાટ

અમદાવાદ: રાજ્યની સરકારી શાળાઓમાં વિદ્યાર્થીઓ માટે વિનામૂલ્યે આપવામાં આવતા પાઠ્યપુસ્તકોની અછતની સમસ્યા વચ્ચે એક ચોંકાવનારો કિસ્સો સામે આવ્યો છે. અમદાવાદમાં આમ આદમી પાર્ટી (આપ) અને કોંગ્રેસના કાર્યકર્તાઓએ સરકારી પુસ્તકોથી ભરેલી એક ટ્રક ઝડપી પાડી છે, જે ગેરકાયદેસર રીતે બીજા રાજ્યમાં લઈ જવાઈ રહી હતી. આ ઘટનાને પગલે શિક્ષણ વિભાગે અમદાવાદ જિલ્લા શિક્ષણાધિકારીને તપાસની જવાબદારી સોંપી છે.   જાણવા મળ્યું છે કે, અસારવાની એક શાળામાંથી નવા પાઠ્યપુસ્તકો ટ્રકમાં ભરીને પંજાબ લઈ જવાઈ રહ્યા હતા. આ પુસ્તકો ભંગારના ગોડાઉનમાં વેચાણ માટે મોકલવામાં આવી રહ્યા હોવાનું પ્રાથમિક તપાસમાં બહાર આવ્યું છે. કોંગ્રેસના કાર્યકર્તાઓએ ટ્રકચાલકની પૂછપરછ કરતાં તેના ગોળ-ગોળ જવાબોએ શંકા ગાઢ કરી હતી. આ ઘટનાની જાણ થતાં જ સ્થાનિક પોલીસને સૂચિત કરવામાં આવી હતી.   આ પહેલાં પણ રાજ્યમાં આવા કૌભાંડો સામે આવ્યા છે. અરવલ્લી જિલ્લાના માલપુરમાં એક ભંગાર વેપારી પાસેથી ધોરણ 1થી 8ના 5,000 સરકારી પાઠ્યપુસ્તકોનો જથ્થો મળી આવ્યો હતો. મહીસાગર જિલ્લાના ખાનપુર વિસ્તારમાંથી ભંગાર વેપારીએ આ પુસ્તકો ખરીદ્યા હોવાનું અરવલ્લી જિલ્લા શિક્ષણાધિકારીની તપાસમાં ખુલ્યું હતું. અધિકારીએ જણાવ્યું કે, આ મામલે ઉચ્ચ કક્ષાએ રજૂઆત કરવામાં આવી છે અને રિપોર્ટ સુપરત કરાયો છે.   આ ઘટનાએ શિક્ષણ વિભાગની કામગીરી પર સવાલો ઉભા કર્યા છે. સરકારી પુસ્તકોનો આ રીતે દુરુપયોગ થતો હોવાનું ખુલવું એ ગંભીર બાબત છે. હવે તપાસના અંતે આ કૌભાંડના મૂળ સુધી પહોંચી શકાય તેવી અપેક્ષા રાખવામાં આવે છે.