અમદાવાદીઓ માટે ખુશખબરી, 65 વર્ષથી ઉપરના વડીલો અને દિવ્યાંગોને AMTS-BRTSમાં મળશે મફત મુસાફરી

અમદાવાદમાં AMTS અને BRTS સેવાઓમાં હવે વધુ લોકોને મફત મુસાફરીની સુવિધા મળશે. અમદાવાદ મ્યુનિસિપલ કોર્પોરેશનની કારોબારી સમિતિની તાજેતરની બેઠકમાં મહત્વના નિર્ણયો લેવાયા છે.  

હવે 65 વર્ષથી વધુ ઉંમરના સિનિયર સિટીઝનો AMTS અને BRTS બસમાં નિઃશુલ્ક મુસાફરી કરી શકશે. આ અગાઉ આ મર્યાદા 75 વર્ષ હતી, જેને 10 વર્ષથી ઘટાડવામાં આવી છે.  

આ સાથે-સાથે દિવ્યાંગ વ્યક્તિઓ માટે પણ મોટો નિર્ણય લેવામાં આવ્યો છે. આ અગાઉ તેમને 40% સબસિડી સાથે પાસ મળતાં હતા, હવે તેઓ સંપૂર્ણપણે મફતમાં મુસાફરી કરી શકશે. જોકે, દરેક મુસાફરે દર વર્ષે પાસ રિન્યૂ કરાવવો પડશે. આ સેવા માટે હવે ઓનલાઈન પાસ સિસ્ટમ પણ શરૂ કરવામાં આવશે અને વોર્ડ લેવલે પણ સહાય ઉપલબ્ધ થશે.  

કારોબારી બેઠકમાં AMC દ્વારા અન્ય નિર્ણયો પણ લેવાયા છે. શહેરના વિસ્તરણ સાથે અલગ-અલગ વિભાગોમાં કરાર આધારે 2500 નવી સ્ટાફ ભરતી કરવાની તૈયારી છે. આ સાથે જ AMCએ મુંબઈ પછી બીજી શહેર તરીકે એન્વાયરમેન્ટ સેલ શરૂ કરવાનો નિર્ણય લીધો છે.  

વાતાવરણના પ્રદૂષણ, રોડની ગુણવત્તા સુધારવા માટે AMC પોતાની લેબોરેટરી પિપળજ ખાતે શરૂ કરશે, જે માટે રૂ. 2.74 કરોડનો ખર્ચ મંજૂર થયો છે. આ ઉપરાંત, દિવાળી પછી રિવરફ્રન્ટ ખાતે સ્ટાર્ટઅપ ફેસ્ટિવલ યોજાશે.