ભૂતિયું ડિમોલિશનઃ DyCMના સુરતમાં રાજકારણ ગરમાયું

છ સભ્યોની ઉચ્ચસ્તરીય તપાસ કમિટીની રચના

સુરતના ચર્ચાસ્પદ નાસીર નગર ડિમોલિશન કેસમાં હવે સુરત મહાનગરપાલિકા સક્રિય બની છે. સમગ્ર કાર્યવાહી દરમિયાન મનપાના કર્મચારીઓ અને અધિકારીઓની સંભવિત ભૂમિકાની તપાસ કરવા માટે મ્યુનિસિપલ કમિશનરે 9 જૂન 2026ના રોજ છ સભ્યોની વિશેષ તપાસ સમિતિની રચના કરી છે. આ સમિતિ સમગ્ર ઘટનાની વિસ્તૃત તપાસ કરીને પોતાનો અહેવાલ સીધો કમિશનરને સોંપશે.

કમિટીમાં કોને સ્થાન અપાયું?

ડેપ્યુટી મ્યુનિસિપલ કમિશનર મીના ગજ્જરના અધ્યક્ષસ્થાને રચાયેલી તપાસ સમિતિમાં બે ડેપ્યુટી મ્યુનિસિપલ કમિશનર, એક એડિશનલ સિટી ઇજનેર, બે કાર્યપાલક ઇજનેર અને એક ડેપ્યુટી ઇજનેરનો સમાવેશ કરવામાં આવ્યો છે. મીના ગજ્જર, એમ.એમ. ડોક્ટર, એમ.ડી. ચાવડા, કે.એલ. વસાવા, આર.ડી. ગાંજાવાલા અને મોહસીન એ. કાગજીને તપાસની જવાબદારી સોંપવામાં આવી છે.

ભાજપના ધારાસભ્ય વિનુ મોરડિયાએ ઉઠાવ્યા ગંભીર સવાલ

તપાસ કમિટીની રચના મામલે કતારગામના ભાજપના ધારાસભ્ય વિનુ મોરડિયાએ સમગ્ર મામલામાં મનપાના અધિકારીઓની કામગીરી અંગે ગંભીર સવાલ ઉઠાવ્યા છે. તેમણે જણાવ્યું કે, મીડિયામાં આવી રહેલાં સમાચારને જોતાં અધિકારીઓની ભૂમિકા અંગે શંકા વધુ મજબૂત બની રહી છે.

અધિકારીઓ કંઈક છુપાવી રહ્યા હોવાની આશંકા

વિનુ મોરડિયાના જણાવ્યા મુજબ, કેટલાક અધિકારીઓએ ઘટનાસ્થળે હાજર ન હોવાનો દાવો કર્યો હતો. પરંતુ સામે આવેલા દ્રશ્યોમાં તેઓ સ્થળ પર હાજર હોવાનું સ્પષ્ટ દેખાય છે. આ સંજોગોમાં અધિકારીઓ કોઈ મહત્વની હકીકત છુપાવી રહ્યા હોવાની શંકા વધુ ગાઢ બની રહી છે.

ગેરરીતિ પાછળ લાલચની શક્યતા

ધારાસભ્યએ એવું પણ જણાવ્યું કે, માત્ર કોઈ બિલ્ડર અથવા વ્યક્તિના દબાણથી આ પ્રકારની કાર્યવાહી થવી મુશ્કેલ છે. કેટલાક અધિકારીઓ કોઈ લાભ અથવા લાલચના કારણે ગેરરીતિમાં સંડોવાયા હોવાની સંભાવના નકારી શકાય નહીં.

ગાંધીનગર સુધી પહોંચ્યો વિવાદ

નાસીરનગર ડિમોલિશન કેસના પડઘા ગાંધીનગર સુધી પડ્યા છે. રાજ્ય સરકારે સમગ્ર ઘટનાની ગુપ્ત તપાસ કરવાના આદેશ આપ્યા છે. આ ઉપરાંત મેયર સહિતના પદાધિકારીઓને ગાંધીનગર બોલાવી બંધ બારણે બેઠક કરવામાં આવી છે.

સુરત પોલીસને તપાસથી દૂર રાખવામાં આવી

સૂત્રો અનુસાર, કેટલાક પોલીસ અધિકારીઓ પણ શંકાના ઘેરામાં હોવાથી સમગ્ર તપાસ પ્રક્રિયામાં સુરત પોલીસને સામેલ કરવામાં આવી નથી. રાજ્ય સરકાર દ્વારા સુરત ગ્રામ્યના ઉચ્ચ અધિકારીને તપાસની જવાબદારી સોંપવામાં આવી છે.

રેન્જ આઈજીની ટીમ એકત્ર કરી રહી છે પુરાવા

સરકારના નિર્દેશ બાદ રેન્જ આઈજીની ટીમ અત્યંત ગુપ્ત રીતે ફોન કોલ્સ અને અન્ય પુરાવાઓના આધારે સમગ્ર ઘટનાની કડીઓ જોડવાનો પ્રયાસ કરી રહી છે. તપાસ પૂર્ણ થયા બાદ અહેવાલ ગૃહ વિભાગને મોકલવામાં આવશે.

કોંગ્રેસે સરકાર સામે મોરચો ખોલ્યો

આ સમગ્ર ઘટનામાં કોંગ્રેસે પણ આક્રમક વલણ અપનાવ્યું છે. પ્રદેશ કોંગ્રેસ પ્રમુખ અમિત ચાવડાએ સરકારને ત્રણ દિવસનું અલ્ટીમેટમ આપીને જવાબદાર લોકો સામે ગુનો દાખલ કરવાની માંગ કરી છે.

‘મિસ્ટર ઈન્ડિયા’ કોણ? અમિત ચાવડાનો સવાલ

અમિત ચાવડાએ સવાલ ઉઠાવ્યો કે, મહાનગરપાલિકાએ ડિમોલિશનની કાર્યવાહી કરી નથી તો પછી ગરીબોના ઘરો પર બુલડોઝર ફેરવનાર લોકો કોણ હતા? તેમણે સમગ્ર ઘટનાને બિલ્ડર લોબી અને ભ્રષ્ટ અધિકારીઓ વચ્ચેના સંભવિત કૌભાંડ સાથે જોડીને ગંભીર આક્ષેપો કર્યા.

પોલીસ અને અધિકારીઓ સામે ફરિયાદની માંગ

કોંગ્રેસે પોલીસ અધિકારીઓ, મનપાના કર્મચારીઓ અને જવાબદાર લોકો સામે એફઆઈઆર નોંધવાની માંગ કરી છે. સાથે જ ગરીબોના તૂટેલા ઘરોના રહેવાસીઓને તાત્કાલિક વૈકલ્પિક વ્યવસ્થા આપવાની પણ માંગ કરવામાં આવી છે.

આગામી દિવસોમાં મોટા ખુલાસાની શક્યતા

ધારાસભ્ય વિનુ મોરડિયાની રજૂઆત અને કોંગ્રેસના આક્રમક વલણ બાદ રાજ્ય સરકાર પણ એક્શન મોડમાં આવી ગઈ છે. ગુપ્ત તપાસના પરિણામો બાદ સુરતના કેટલાક મોટા નામો સામે કાર્યવાહી થવાની સંભાવનાઓ વ્યક્ત કરવામાં આવી રહી છે. હવે સમગ્ર રાજ્યની નજર હાઈપ્રોફાઈલ ‘ભૂતિયા ડિમોલિશન’ કેસની તપાસ પર ટકી છે.