વિંછીયા પંથકમાં લેન્ડગ્રેબિંગની ફરિયાદ કરનાર ઘનશ્યામ રાજપરાની હત્યા

રાજકોટમાં વિછીયા પંથકમાં લેન્ડગ્રેબિંગની ફરિયાદ કરનાર ઘનશ્યામ રાજપરાની હત્યા કરાતા ખળભળાટ મચી ગયો છે. ઘનશ્યામ રાજપરા પર હિંસક હુમલો થયો હતો અને સારવાર દરમિયાન તેમનું મોત થયું છે. તેમના પરિવારે જ્યાં સુધી આરોપીઓ નહીં પકડાય ત્યાં સુધી લાશ નહીં સ્વીકારવાનો નિર્ણય કર્યો છે. 

તાજેતરમાં વિંછીયાના બોટાદ રોડ પરથી પસાર થતા થોરીયાળીના અને વિછીયા પંથકમાં લેન્ડગ્રેબિંગની ફરિયાદ કરનાર ઘનશ્યામ રાજપરા પર હુમલો કરવામાં આવ્યો હતો.ગેરકાયદે બાંધકામ અંગે અરજીઓ કરનાર ઘનશ્યામ રાજપરા ઉપર વિછીયા પંથકના 7 જેટલા લોકોએ કુહાડી અને ધોકા સહિતના વડે ઘાતકી હુમલો કર્યો હતો

હુમલામાં ઘવાયેલા ઘનશ્યામ રાજપરાને પહેલા વિંછિયા અને ત્યાર બાદ રાજકોટ સિવિલમાં દાખલ કરવામાં આવ્યા હતા. રાજકોટ સિવિલમાં સારવાર દરમિયાન ઘનશ્યામ રાજપરાનું મોત થતા મામલો હત્યામાં પલટાયો છે. 

દરમિયાન ઘનશ્યામ રાજપરાના પરિવારે હાલ તેમની લાશ સ્વીકારવાનો ઇન્કાર કર્યો છે. તેમના પુત્રએ કહ્યું કે છેલ્લા પાંચ વર્ષથી મારા પિતા ગેરકાયદેસર બાંધકામ વિરુદ્ધ અરજીઓ કરે છે તથા અગાઉ મારા કાકા ઉપર હુમલો કરવામાં આવ્યો હતો . હવે મારા પિતા ઉપર હુમલો કરવામાં આવ્યો છે જેમાં તેમનું મોત થયું છે. તેમણે કહ્યું કે આજે વિછીયા બંધનું એલાન અમારા દ્વારા આપવામાં આવ્યું છે . જ્યાં સુધી મારા પિતાની હત્યાના આરોપીઓ નહીં પકડાય ત્યાં સુધી અમે લાશ સ્વીકારશું નહીં તેમ તેમણે જણાવીને ઉમેર્યું હતું કે આરોપીઓની તાત્કાલિક ધરપકડ કરવામાં આવે અને સરઘસ કાઢવામાં આવે તેવી અમારી માંગણી છે