ગુજરાતમાં લર્નિંગ લાઈસન્સ મેળવવાની પ્રક્રિયા થઈ વધુ સરળ, હવે ઘરે બેઠા ફેસલેસ અરજી શક્ય

ગુજરાત સરકાર દ્વારા નાગરિકોને વાહન વ્યવહાર લાઈસન્સ મેળવવા માટે વધુ સરળતા મળે તે હેતુસર મહત્વપૂર્ણ નિર્ણય લેવાયો છે. રાજ્યભરમાં તારીખ 7 જુલાઈ, 2025થી લર્નિંગ લાઈસન્સ માટે આધાર આધારિત E-KYC દ્વારા ફેસલેસ સેવા અમલી બની છે. આ નવી પદ્ધતિ અંતર્ગત, નાગરિકો હવે ઘરે બેઠા ઓનલાઈન અરજી કરીને લર્નિંગ લાઈસન્સ મેળવી શકશે.

વાહન વ્યવહાર કમિશનરની કચેરી દ્વારા બહાર પાડવામાં આવેલી યાદી અનુસાર, હવે લર્નિંગ લાઈસન્સ મેળવવાની કામગીરી વધુ સરળ અને ઝડપી બની છે. નવા મોડેલ હેઠળ અરજદારોને દસ્તાવેજોની ચકાસણી અથવા શારીરિક હાજરી આપવાની જરૂર રહેશે નહિ, જો તેઓ ફેસલેસ પદ્ધતિ પસંદ કરે.

જો અરજદારો ફેસલેસ અરજી કરવા માંગતા ન હોય, તો તેઓ RTO, ARTO, ITI કે પોલિટેકનિક કચેરી ખાતે રૂબરૂ જઈને અરજી ચકાસણી અને ટેસ્ટ માટે હાજરી આપી શકશે. આ નવી પદ્ધતિથી ડિજિટલ ગવર્નન્સને વેગ મળશે અને નાગરિકોને વધુ પારદર્શક અને ઝડપી સેવા મળશે.