મુખ્યમંત્રીના નેતૃત્વ હેઠળ ગાંધીનગરમાં યોજાશે કેબિનેટની બેઠક, PMના પ્રવાસ સહિત મુદ્દાઓ પર થશે ચર્ચા

ગાંધીનગરમાં આજે યોજાયેલી કેબિનેટ બેઠકમાં રાજ્યના વિવિધ અગત્યના મુદ્દાઓ પર ચર્ચા થઈ. મુખ્યમંત્રી ભૂપેન્દ્ર પટેલના નેતૃત્વમાં યોજાયેલી બેઠકમાં ખાસ કરીને વાવાઝોડાની સંભાવનાઓ, PM મોદીની આગામી મુલાકાત અને પાણીની સ્થિતિ જેવી બાબતે મુખ્ય રહી હતી.

વાવાઝોડા અંગે તંત્ર ચેતવનાર સ્થિતિમાં

ગુજરાત પર વાવાઝોડાનું સંકટ મંડરાઈ રહ્યું છે. હવામાન વિભાગે 21 મેથી દક્ષિણ ગુજરાત અને સૌરાષ્ટ્રના 18 જેટલા જિલ્લાઓમાં ભારે પવન અને વરસાદની આગાહી આપી છે. આ સ્થિતિને લઈને કેબિનેટમાં તાકીદની રાહત કામગીરી, લોકોને સતર્ક રહેવા બાબતે ચર્ચા કરવામાં આવી હતી. તંત્ર દ્વારા દરિયાકાંઠાના વિસ્તારોમાં રહેતા લોકોને અનાવશ્યક મુસાફરી ટાળવા અને સલામત સ્થળે રહેવાની સૂચના આપવામાં આવી છે.

PM મોદીના ગુજરાત પ્રવાસ અંગે સમીક્ષા

આ બેઠકમાં વડાપ્રધાન નરેન્દ્ર મોદીના 26-27 મેના પ્રવાસ અંગે પણ ચર્ચા થઈ હતી. તેઓ ઓપરેશન સિંદૂર બાદ ગુજરાતમાં પ્રથમવાર આવી રહ્યા છે. 26 મેએ ગાંધીનગરમાં રાત્રિ રોકાણ પછી કચ્છ, દાહોદ અને ગાંધીનગરના વિવિધ કાર્યક્રમોમાં હાજરી આપશે. આ મુલાકાત માટેની તૈયારીઓની સમીક્ષા પણ કરવામાં આવી.

પાણીની સમસ્યા અને ખેડૂત લાભ અંગે ચર્ચા

કેબિનેટ બેઠકમાં રાજ્યમાં પીવાના તથા સિંચાઈના પાણીની હાલત અંગે માહિતી રજૂ કરવામાં આવી. ખેતી માટેના પાણીનું વિતરણ, ખેડૂતોને સમયસર પાણી મળે તે બાબતે પણ ચર્ચા થઈ. આ ઉપરાંત સિંહોની સંખ્યા અંગેના તાજા આંકડાઓ પણ મંત્રીમંડળ સમક્ષ રજૂ કરાયા.