1 ફેબ્રુઆરીથી સામાન્ય જનતા વડનગરના મ્યુઝિયમની લઈ શકશે મુલાકાત

વડનગર: વડાપ્રધાન નરેન્દ્ર મોદીના વતન વડનગરમાં એશિયાના પ્રથમ આર્કિયોલોજિકલ એક્સપિરિયન્સલ મ્યૂઝિયમને ગુરુવારે કેન્દ્ર ગૃહમંત્રી અમિત શાહના હસ્તે ખુલ્લું મૂકવામાં આવશે. આ મ્યુઝિયમમાં સામાન્ય જનતા 1 ફેબ્રુઆરીથી મુલાકાત લઈ શકશે. આ મ્યુઝિયમ ગ્રાઉન્ડ ફ્લોર સહિત ચાર માળ પર આવેલું છે, જ્યાં સાત કાળના વડનગરના અવશેષો અને જૂની હસ્તપ્રતીિઓ પ્રદર્શિત કરવામાં આવી છે. મ્યુઝિયમમાં પ્રિ. મોર્ય, મોર્ય, ક્ષત્રપ, પોસ્ટ ક્ષત્રપ, સોલંકી, મુગલ અને ગાયકવાડ કાળના કલ્ચર, વેપાર-ધંધા તથા અવશેષો પર્યટકો માટે જોવા માટે મૂકાયા છે. આ સમગ્ર મ્યુઝિયમ જોવા માટે પર્યટકોને લગભગ 3 કલાકનો સમય લાગશે. દેશ-વિદેશના પર્યટકો માટે અલગ ટિકિટ દર રાખવામાં આવશે, જે બે દિવસમાં નક્કી કરાશે.

આ મ્યુઝિયમ વડનગરના અમરથોળ દરવાજા પાસે ચાર એકરમાં રૂ. 298 કરોડના ખર્ચે પીએસપી પ્રોજેક્ટ દ્વારા તૈયાર કરવામાં આવ્યું છે. મ્યુઝિયમના અલગ અલગ ફ્લોર પર પ્રાચીન સમયની ચીજવસ્તુઓ ગોઠવવામાં આવી છે. મ્યુઝિયમમાં પ્રવેશ કરતાં જ એક મોટી સ્ક્રીન પર પર્યટકો વડનગરના ઇતિહાસને હેડફોન મારફતે ઓડિયો-વીડિયો માધ્યમ દ્વારા જોઈ અને સાંભળી શકશે. ત્રણ માળના મ્યુઝિયમમાં જવા માટે સીડીઓ અને બે લિફ્ટોની સુવિધા આપવામાં આવી છે.

પ્રથમ માળ પર પ્રોજેક્ટ પ્રદર્શિત કરવામાં આવ્યા છે, જેમાં વડનગરનો ઇતિહાસ દર્શાવાતો છે. બીજા માળે સાત કાળના અવશેષો મૂકવામાં આવ્યા છે, જેમાં કાચમાં રાખેલા માટીના અવશેષો દર્શાવવામાં આવ્યા છે, જે અલગ-અલગ કાળમાં ઉપયોગમાં આવેલા હતા. ત્રીજા માળ પર જૂના મકાનોના બારણાં, ઘરેણાં, સિક્કા, શંખ, વાસણો, રમકડાં, જૂના તાવીજ અને ઓજારો જેવી સામગ્રી ગેલેરીમાં પ્રદર્શિત કરવામાં આવી છે. દરેક ગેલેરીમાં ડિજિટલ સ્ક્રીન લગાવવામાં આવી છે, જેના માધ્યમથી પર્યટકોને તમામ માહિતી મળી શકે છે. ખોદકામ દરમિયાન મળી આવેલા 5000થી વધુ કલાકૃતિઓ મ્યુઝિયમમાં પ્રદર્શિત કરવામાં આવી છે, જે વડનગરના 2500 વર્ષના ઇતિહાસ અને પ્રાચીન જ્ઞાનને પ્રતિબિંબિત કરે છે. 

પર્યટકોને પુરાતત્વીય ખોદકામમાંથી મળેલા અવશેષો જોવા માટે સીડી મારફતે જઈ શકાય છે, જ્યાં એક શેડ બનાવવામાં આવ્યો છે.