ગુજરાતમાં નકલી અધિકારીઓની ભરમાર યથાવતઃ નકલી IT અધિકારીઓ ઝડપાયા

ગુજરાતમાં નકલી અધિકારીઓની જાણે કે ભરમાર હોય તેમ દરરોજ નકલી અધિકારીઓ ઝડપાઈ રહ્યા છે. ભરૂચમાંથી નકલી ધારાસભ્ય પકડાયાની તપાસ ચાલી રહી છે. તેવામાં દાહોદ જિલ્લાના ફતેપુરા તાલુકાના સુખસર ગામમાં વેપારી પાસેથી નાણા પડાવતાં નકલી ઈન્ક્મટેક્સ અધિકારીઓ ઝડપાયા છે. વેપારી પાસેથી 25 લાખની માગણી કરીને 2 લાખ પડાવનાર 2 શખ્સોને પોલીસે ઝડપી લીધા છે. જ્યારે ફરાર થયેલા 4 શખ્સોને ઝડપી પાડવા પોલીસે કવાયત હાથ ધરી છે.

દાહોદ જિલ્લાના ફતેપુરા તાલુકાના સુખસર ગામમાં નાણાં ધીરધારનો ધંધો કરતાં વેપારીની દુકાને 6  જેટલા ઇન્કમટેક્સ અધિકારીઓએ દરોડા પાડ્યા હતા. અલ્પેશ ઉકારભાઈ પ્રજાપતિની દુકાને નકલી ઇન્કમટેક્સ અધિકારીઓએ રેડ કરી નાણા ધીરધારના ચોપડા ચેક કરી દાગીના તેમજ ચોપડા જમા કરી કેસ કરવાની ધમકી આપી હતી. કેસ ન કરવો હોય તો 25 લાખ આપવા માંગ કરી હતી. 2 લાખ રોકડ લીધા બાદ 6 શખ્સોએ બીજા નાણા અન્ય જગ્યાથી આપવા વાત કરતાં વેપારીને શંકા ગઈ હતી. તેથી વેપારીએ પોલીસને જાણ કરી દીધી હતી. પોલીસે ભાવેશ બિપીનચંનદ્ર આચાર્ય રહે-હાથીજણ અમદાવાદ અને અબ્દુલ સુલેમાન રહે-દાહોદવાળાને ઝડપી પાડ્યા હતા. જયારે અન્ય 4 શખ્સો ફરાર થઈ ગયા હતા. સુખસર પોલીસે 6 શખ્સો સામે ઈન્કમટેક્ષ અધિકારીની ખોટી ઓળખ આપી છેતરપીંડી કરવાનો ગુનો નોંધી અન્ય 4 શખ્સોને ઝડપવા ચક્રો ગતિમાન કર્યા છે.

 

તાજેતરમાં રાજકોટમાંથી નકલી પોલીસ, ભરૂચમાંથી નકલી ધારાસભ્ય પકડાયા છે. ત્યારે ગુજરાતમાં છેલ્લાં બે વર્ષથી નકલી અધિકારીઓ ઝડપાતા નકલીઓની ભરમાર છે. ઓક્ટોબર 2024માં મોરિસ સેમ્યુલ ક્રિશ્ચયન નામના શખસે ગાંધીનગરમાં નકલી કોર્ટ બનાવી અબજો રૂપિયાની જમીન પોતાના નામે કરાવી લીધી હતી. મોરિસ સેમ્યુઅલ ક્રિશ્ચયને 100 એકરથી વધુની સરકારી જમીનો પોતાના નામે કરવાના નકલી હુકમો કરી અબજોની જમીન હડપી લીધી છે. ડિસેમ્બર 2023માં કેન્દ્રીય મંત્રી પુરુષોત્તમ રૂપાલાના PA તરીકે ખોટી ઓળખ આપીને માનવ મંદિર આશ્રમના ટ્રસ્ટીને ધમકી આપવાના મામલે પોલીસે નકલી PAની અટકાયત કરી હતી. માર્ચ 2023માં કિરણ પટેલ નામના શખ્સે PMOના અધિકારી હોવાની ઓળખ આપી જમ્મુ-કાશ્મીર જેવા સંવેદનશીલ વિસ્તારોમાં સરકારી બેઠકો કરી હતી. ડિસેમ્બર 2023માં વાંકાનેર નજીક વઘાસિયા ટોલ પ્લાઝા પાસે ટોલનાકું બાયપાસ કરી ખાનગી માલિકીની જમીનમાં નકલી ટોલનાકુ બનાવી ટોલટેક્સ ઉઘરાવ્યો હતો. નવેમ્બર 2023માં દાહોદ જિલ્લામાં નકલી સરકારી કચેરીઓ ઊભી કરી વર્ષ 2018થી 2022 દરમિયાન 100 કામની ખોટી દરખાસ્તો તૈયાર કરી ટોળકીએ 18.59 કરોડ સેરવી લીધા હતા. ડિસેમ્બર 2023માં નડિયાદમાં આયુર્વેદિક સિરપ પીધા બાદ ઘણા લોકોનાં મોત થયાં હતાં. સિરપમાં નશા માટે ઝેરી કેમિકલ ભેળવાયું હોવાનું તપાસમાં બહાર આવ્યું હતું. નવેમ્બર 2023માં સુરતના ઉધના વિસ્તારમાં નકલી IPS અધિકારી ઝડપાયો હતો. આ નકલી IPS ચાર રસ્તા પર લોકોના વાહનો ચેક કરાવાનો ડોળ કરી વાહનચાલકો પાસેથી નાણા પડાવતો હતો. નવેમ્બર 2023માં CMO ઓફિસના અધિકારીની ઓળખ આપી લોકોને ફસાવનાર વિરાજ પટેલ સામે દુષ્કર્મનો પણ આરોપ હતો. ફરાર થઈ ગયા બાદ મેઘાલયમાંથી ઝડપાયો હતો. ઓક્ટોબર 2023માં છોટાઉદેપુર જિલ્લાના બોડેલીમાં કાર્યપાલક ઇજનેર સિંચાઈ પ્રોજેક્ટ ડિવિઝનની નકલી સરકારી કચેરી ઊભી કરી 93 સરકારી કામો મંજૂર કરાવી સરકાર પાસેથી 4.15 કરોડથી વધુની રકમ તફડાવી લીધી હતી. ઓગસ્ટ 2023માં ચંદ્રયાન-3નું વિક્રમ લૅન્ડર ચંદ્રની સપાટી પર સફળતાપૂર્વક ઊતર્યું ત્યારે સુરતના મિતુલ ત્રિવેદીએ સ્પેસક્રાફ્ટ ડિઝાઇનિંગ ટીમનો સભ્ય હોવાનું કહી લોકોને ગેરમાર્ગે દોર્યા હતા. બાદમાં પોલીસે તેની ધરપકડ કરી હતી.