વડોદરા શહેરના માંજલપુર વિસ્તારમાં આવેલી GIDC કોલોનીમાં ગત રાત્રે એક ભયાનક બ્લાસ્ટની ઘટના બની હતી. ગેસ સિલિન્ડરમાં લીકેજ હોવાને કારણે આખું ઘર ગેસથી ભરાઈ ગયું હતું અને જેવી લાઈટની સ્વીચ ચાલુ કરવામાં આવી કે તરત જ પ્રચંડ ધડાકો થયો હતો. આ દુર્ઘટનામાં એક વૃદ્ધ ગંભીર રીતે દાઝી ગયા છે અને ઘરના સામાનના ફુરચા ઉડી ગયા છે.
સ્વીચ ઓન કરતા જ સર્જાયો વિસ્ફોટ :&nbsp;
ઘટનાની વિગતો મુજબ, માંજલપુર અલવાનાકા GIDC કોલોનીમાં 63 વર્ષીય શંકરભાઈ લાલાભાઈ પટેલ એકલા રહે છે અને ખાનગી કંપનીમાં નોકરી કરે છે. ગત રાત્રે આશરે નવ વાગ્યાની આસપાસ જ્યારે તેઓ નોકરીથી પરત ફર્યા ત્યારે ઘર સંપૂર્ણપણે બંધ હતું. ઘરમાં ગેસની નવી બોટલ મૂકેલી હતી જેમાં અજાણતા લીકેજ થયું હતું. શંકરભાઈએ જેવો ઘરનો દરવાજો ખોલીને અંદર લાઈટની સ્વીચ ચાલુ કરી, કે તરત જ હવામાં ફેલાયેલા ગેસે સ્પાર્ક પકડ્યો હતો અને જોરદાર ધડાકા સાથે બ્લાસ્ટ થયો હતો.
વિસ્ફોટની તીવ્રતાથી ઘરના દરવાજા પણ તૂટી પડ્યા :&nbsp;
આ બ્લાસ્ટ એટલો વિકરાળ હતો કે તેની અસરથી આસપાસના રહીશો ફફડી ઉઠ્યા હતા. વિસ્ફોટના દબાણને કારણે ઘરની અંદર રહેલી તિજોરીના કાચ તૂટી ગયા હતા અને ટોયલેટ-બાથરૂમના દરવાજા પણ ઉખડીને જમીન પર પડ્યા હતા. ઘરનો તમામ સામાન અસ્તવ્યસ્ત થઈ ગયો હતો અને આગને કારણે અનેક વસ્તુઓ બળીને ખાખ થઈ ગઈ હતી. ઘટનાની જાણ થતા જ જીઆઈડીસી ફાયર સ્ટેશનની ટીમ ઘટનાસ્થળે પહોંચી હતી અને તપાસ કરતા નવી ગેસ બોટલમાં લીકેજ હોવાનું પ્રાથમિક તારણ બહાર આવ્યું હતું.
ઈજાગ્રસ્ત વૃદ્ધ સયાજી હોસ્પિટલમાં સારવાર હેઠળ :&nbsp;
બ્લાસ્ટ દરમિયાન શંકરભાઈ પટેલ ગંભીર રીતે દાઝી ગયા હતા. સ્થાનિક લોકો તાત્કાલિક મદદ માટે દોડી આવ્યા હતા અને તેમને સારવાર માટે વડોદરાની સયાજી હોસ્પિટલમાં ખસેડવામાં આવ્યા હતા. હાલમાં ડોક્ટરોની દેખરેખ હેઠળ તેમની સારવાર ચાલી રહી છે. આ ઘટના અંગે માંજલપુર પોલીસને પણ જાણ કરવામાં આવી છે, જે આગળની કાયદેસરની કાર્યવાહી કરી રહી છે.
આ ઘટનાએ ફરી એકવાર ગેસ સિલિન્ડરના ઉપયોગમાં સાવચેતી રાખવાની જરૂરિયાત સમજાવી છે. ખાસ કરીને જ્યારે ઘર લાંબા સમય સુધી બંધ રહેતું હોય ત્યારે ગેસનું રેગ્યુલેટર બંધ રાખવું અત્યંત અનિવાર્ય છે.&nbsp;

વડોદરા માંજલપુર ગેસ બ્લાસ્ટ

માંજલપુર જીઆઈડીસી કોલોનીમાં બંધ ઘરમાં ગેસ ભરાતા સર્જાયો પ્રચંડ બ્લાસ્ટ

March 22, 2026 | 18:16 IST