કુંવરજી-હીરા સોલંકી વચ્ચે મતભેદ? અલગ-અલગ સંમેલન!

નેતૃત્વ મુદ્દે કોળી સમાજમાં ઉઠ્યો વિવાદ

દેશના સૌથી મોટા સામાજિક સંગઠનો પૈકીના અખિલ ભારતીય કોળી સમાજમાં નેતૃત્વને લઈને મતભેદ હવે ખુલ્લેઆમ સામે આવી રહ્યા છે. જૂન મહિનામાં એક સપ્તાહના અંતરે દિલ્હીમાં બે અલગ-અલગ રાષ્ટ્રીય અધિવેશનો યોજાનાર હોવાથી સમાજમાં ચર્ચા અને અસમંજસનું વાતાવરણ ઊભું થયું છે.

બે અલગ તારીખે બે અલગ રાષ્ટ્રીય અધિવેશન

વર્તમાન રાષ્ટ્રીય અધ્યક્ષ અને પૂર્વ સાંસદ વિરેન્દ્ર કશ્યપના નેતૃત્વમાં 21 જૂનના રોજ દિલ્હીના તાલકટોરા સ્ટેડિયમ ખાતે રાષ્ટ્રીય અધિવેશન યોજાવાનું છે. બીજી તરફ, અખિલ ભારતીય કોળી સમાજના પૂર્વ રાષ્ટ્રીય અધ્યક્ષ અને ગુજરાત સરકારના કેબિનેટ મંત્રી કુંવરજી બાવળિયાએ 14 જૂનના રોજ કોન્સ્ટિટ્યૂશન ક્લબ ઓફ ઇન્ડિયામાં અલગ રાષ્ટ્રીય અધિવેશન બોલાવ્યું છે. એક જ સંગઠનના નામે સાત દિવસના અંતરે બે અલગ કાર્યક્રમો યોજાતા સમાજમાં અનેક પ્રકારના પ્રશ્નો ઊભા થયા છે.

કુંવરજી બાવળિયા અને હીરા સોલંકી વચ્ચે મતભેદની ચર્ચા

રાજકીય અને સામાજિક વર્તુળોમાં એવી ચર્ચા ચાલી રહી છે કે, કેબિનેટ મંત્રી કુંવરજી બાવળિયા અને રાજુલાના ભાજપ ધારાસભ્ય હીરા સોલંકી વચ્ચે કથિત મતભેદો ચાલી રહ્યા છે. જો કે, આ અંગે કોઈ સત્તાવાર નિવેદન સામે આવ્યું નથી. ચર્ચા એવી પણ છે કે નેતૃત્વના મુદ્દે ઊભા થયેલા મતભેદોના કારણે બંને પક્ષોએ અલગ-અલગ અધિવેશન યોજવાનો નિર્ણય લીધો હોઈ શકે છે.

હીરા સોલંકીના વીડિયોથી વધી ચર્ચા

તાજેતરમાં અખિલ ભારતીય કોળી સમાજના ગુજરાત પ્રદેશ અધ્યક્ષ હીરા સોલંકીનો એક વીડિયો સોશિયલ મીડિયામાં વાયરલ થયો હતો. વીડિયોમાં તેઓ વિરેન્દ્ર કશ્યપ સાથે જોવા મળ્યા હતા અને એક શાયરી દ્વારા પોતાનો સંદેશ વ્યક્ત કરતા દેખાયા હતા. હીરા સોલંકી આ વીડિયોમાં જણાવે છે કે, તેરે દિન અચ્છે હૈ, તું હમસે કિનારા કર લે, હમ તો બુરે લોગ હૈ, બુરે વક્ત મેં ભી કામ આયેંગે. આ વીડિયોના પગલે 21 જૂનના અધિવેશનને હીરા સોલંકીનું સમર્થન હોવાની ચર્ચાએ વધુ જોર પકડ્યું છે.

25 કરોડથી વધુ સમાજના લોકો માટે મહત્વનું પદ

કોળી સમાજના આગેવાનોના જણાવ્યા મુજબ, દેશમાં અંદાજે 25 કરોડ જેટલી કોળી જ્ઞાતિની વસ્તી છે. અખિલ ભારતીય કોળી સમાજના રાષ્ટ્રીય અધ્યક્ષનું પદ માત્ર સામાજિક નહીં પરંતુ રાજકીય રીતે પણ મહત્વપૂર્ણ માનવામાં આવે છે. વિવિધ રાજકીય પક્ષો આવા હોદ્દેદારોને વિશેષ પ્રતિનિધિત્વ અને મહત્વ આપે છે. જેના કારણે આ હોદ્દાને લઈને સ્પર્ધા વધુ મહત્વપૂર્ણ બની છે.

ભાજપ સાથે જોડાયેલા મોટા ભાગના હોદ્દેદારો

સામાજિક આગેવાનોના જણાવ્યા પ્રમાણે, અખિલ ભારતીય કોળી સમાજના વર્તમાન અને ભૂતપૂર્વ હોદ્દેદારોમાં મોટાભાગના લોકો ભારતીય જનતા પાર્ટી સાથે સંકળાયેલા છે. તેથી આ વિવાદ માત્ર સામાજિક નહીં પરંતુ રાજકીય પરિબળો સાથે પણ જોડાયેલો હોવાનું માનવામાં આવી રહ્યું છે.

એકતા સામે વિખવાદનું ચિત્ર

કોળી સમાજના અગ્રણી પ્રવિણભાઈ કોળીનું માનવું છે કે, જ્યારે દેશભરમાં કોળી સમાજના વિવિધ પ્રશ્નો સામે આવી રહ્યા છે. ત્યારે સમાજને વધુ સંગઠિત કરવાની જરૂર છે. પરંતુ હાલની પરિસ્થિતિમાં નેતૃત્વની સ્પર્ધાના કારણે વિભાજનની સ્થિતિ સર્જાતી દેખાઈ રહી છે. કેટલાક આગેવાનોએ સમાજની એકતા જળવાઈ રહે તે માટે બંને કાર્યક્રમોથી દૂર રહી સંગઠનને એક રાખવાના પ્રયાસો કરવાની અપીલ પણ કરી છે.

અધ્યક્ષપદનો વિવાદ હજુ યથાવત

ત્રણ વર્ષ પહેલાં કુંવરજી બાવળિયા અખિલ ભારતીય કોળી સમાજના રાષ્ટ્રીય અધ્યક્ષ હતા. ત્યારબાદ સંગઠનમાં ફેરફારો બાદ વિરેન્દ્ર કશ્યપને અધ્યક્ષ તરીકે પસંદ કરવામાં આવ્યા હતા. આ નિર્ણયને લઈને મતભેદ ઊભા થયા હતા અને મામલો કોર્ટ સુધી પહોંચ્યો હતો. કેટલાક મહિનાઓ દરમિયાન બંને પક્ષો વચ્ચે સમાધાનના પ્રયાસો થયા હોવાની ચર્ચા હતી. પરંતુ કોઈ સર્વસંમતિ ન બનતાં હવે બંને તરફથી અલગ અધિવેશન યોજાઈ રહ્યા છે.

બંને સંમેલનો પર સૌની નજર

14 જૂનના રોજ કુંવરજી બાવળિયાના નેતૃત્વમાં યોજાનાર અધિવેશન અને 21 જૂનના રોજ વિરેન્દ્ર કશ્યપના નેતૃત્વમાં યોજાનાર કાર્યક્રમમાં કેટલા પ્રતિનિધિઓ અને હોદ્દેદારો હાજરી આપે છે તેના પર સૌની નજર રહેશે. રાજકીય વિશ્લેષકોનું માનવું છે કે, આ બંને કાર્યક્રમો કોળી સમાજના ભવિષ્યના નેતૃત્વ અને સંગઠનની દિશા નક્કી કરવામાં મહત્વપૂર્ણ સાબિત થઈ શકે છે. હાલમાં સૌથી મોટો પ્રશ્ન એ છે કે સમાજ એકતા તરફ આગળ વધશે કે પછી નેતૃત્વના મતભેદો વધુ ઊંડા બનશે.