દીવ-દમણમાં દારૂના વેચાણ પર સંપૂર્ણ પ્રતિબંધ?

કેન્દ્રશાસિત પ્રદેશ દમણ અને દીવમાં, જ્યાં દારૂ સરળતાથી મળે છે, ત્યાં હાલમાં દારૂના વેચાણ પર સંપૂર્ણ પ્રતિબંધ મૂકવામાં આવ્યો છે. આ પ્રતિબંધનું મુખ્ય કારણ આગામી ગ્રામ પંચાયત, જિલ્લા પંચાયત અને મ્યુનિસિપલ કાઉન્સિલની સામાન્ય ચૂંટણીઓ છે. ચૂંટણીના શાંતિપૂર્ણ અને નિષ્પક્ષ માહોલને જાળવવા માટે વહીવટીતંત્ર દ્વારા આ મહત્ત્વપૂર્ણ નિર્ણય લેવામાં આવ્યો છે.

પ્રતિબંધ 6 નવેમ્બરના સવારે 9 વાગ્યા સુધી

કેન્દ્રશાસિત પ્રદેશ દાદરા નગર હવેલી અને દમણ દીવના પ્રશાસક દ્વારા જાહેર જનતાના હિતમાં આ જાહેરાત કરવામાં આવી છે. આદેશ મુજબ, દારૂના વેચાણ પરનો પ્રતિબંધ ગઈકાલે, એટલે કે 3 નવેમ્બર 2025ના રોજ સાંજે 6 વાગ્યાથી અમલમાં મુકાયો છે. આ પ્રતિબંધ આવતીકાલ અને પરમ દિવસ સુધી, એટલે કે 6 નવેમ્બર 2025ના રોજ સવારે 9 વાગ્યા સુધી જારી રહેશે. આ સમયગાળા દરમિયાન, દાદરા નગર હવેલી, દમણ અને દીવના ત્રણેય વિસ્તારોમાં દારૂ સંબંધિત તમામ પ્રવૃત્તિઓ બંધ રાખવાનો આદેશ આપવામાં આવ્યો છે.

આ પણ વાંચો: રેવ પાર્ટી પર રેડ, 13 NRI સહિત 15 નશામાં ઝડપાયા

કોને લાગુ પડશે આ નિયમ?

વહીવટીતંત્રનો આ આદેશ માત્ર રિટેલ દુકાનો પૂરતો સીમિત નથી. દારૂ ઉત્પાદક સંસ્થાઓ, ડિસ્ટિલરી, બ્રુઅરીઝ, રિટેલ દુકાનો, બાર, રેસ્ટોરન્ટ અને હોટેલો આ તમામને આ નિયમનું પાલન કરવું ફરજિયાત છે. પ્રતિબંધના સમયગાળા દરમિયાન, કોઈ પણ પ્રકારની દારૂની ખરીદી, વેચાણ અથવા બાર, રેસ્ટોરન્ટ કે હોટલમાં દારૂ પીરસવાની મંજૂરી આપવામાં આવશે નહિ. આ પ્રતિબંધનો ઉદ્દેશ ચૂંટણી દરમિયાન કોઈ પણ પ્રકારની ગેરરીતિ, અશાંતિ અથવા મતદારોને પ્રભાવિત થતા અટકાવવાનો છે, જેથી ચૂંટણીઓ નિષ્પક્ષ અને શાંતિપૂર્ણ રીતે પૂર્ણ થઈ શકે.

ચૂંટણીની તારીખો અને કાયદાકીય આધાર

આ પ્રતિબંધ આગામી ચૂંટણીઓને ધ્યાનમાં રાખીને મૂકવામાં આવ્યો છે, જે આવતીકાલે, 5 નવેમ્બર 2025ના રોજ યોજાવાની છે. મતગણતરી 8 નવેમ્બર 2025ના રોજ શનિવારે થશે. પ્રશાસકને દાદરા નગર હવેલી અને દમણ દીવ એક્સાઈઝ ડ્યુટી નિયમો 2020ના નિયમ હેઠળ મળેલી સત્તાના આધારે આ નિર્ણય લેવામાં આવ્યો છે. વહીવટીતંત્રે તમામ સંસ્થાઓને આ આદેશનું કડક પાલન કરવા સૂચના આપી છે. તેથી, જો તમે આ દિવસોમાં દમણ-દીવની મુલાકાત લેવાનું વિચારી રહ્યા હોય તો ધ્યાનમાં રાખો કે ત્યાં તમને દારૂ નહિ મળે.