દક્ષિણ ગુજરાતમાં ચક્રવાતનો ખતરો: ભારે વરસાદ અને ગાજવીજનું એલર્ટ

અરબી સમુદ્રમાં સક્રિય લો પ્રેશર ડિપ્રેશનમાં ફેરવાઈ ચક્રવાતનું રૂપ ધારણ કરી રહ્યું છે, જે દક્ષિણ ગુજરાત, મહારાષ્ટ્ર અને સૌરાષ્ટ્રના દરિયાકાંઠે નજીકથી પસાર થવાની શક્યતા છે. ભારતીય હવામાન વિભાગે આગામી 28 મે સુધી ચક્રવાતનું એલર્ટ જાહેર કર્યું છે. આ ચક્રવાતને કારણે દક્ષિણ કોંકણ-ગોવા નજીક 3 ફૂટ ઊંચા મોજાં ઉછળ્યા છે અને 40થી 70 કિ.મી. પ્રતિ કલાકની ઝડપે પવન સાથે ગાજવીજ અને ભારે વરસાદની આગાહી કરવામાં આવી છે.   હવામાન વિભાગે સુરતમાં 27 મે સુધી ગાજવીજ સાથે ભારે વરસાદની ચેતવણી આપી ઓરેન્જ એલર્ટ જાહેર કર્યું છે, જ્યારે 28 મેના રોજ મધ્યમ વરસાદની આગાહી સાથે યલો એલર્ટ જાહેર કરાયું છે. આ સ્થિતિને પહોંચી વળવા સુરત પાલિકા પણ એલર્ટ મોડ પર છે. પાલિકાએ 22 મેના રોજ ICCC ખાતે ફલડ કંટ્રોલ રૂમ શરૂ કર્યો છે, જે સામાન્ય રીતે 1 જૂનથી શરૂ થાય છે. આ કંટ્રોલ રૂમમાં એક ડેપ્યુટી ઇજનેર અને બે ટેકનિકલ આસિસ્ટન્ટને જવાબદારી સોંપવામાં આવી છે.   આ ચક્રવાતની અસરને ધ્યાનમાં રાખી, સ્થાનિક વહીવટી તંત્ર અને હવામાન વિભાગે લોકોને સાવચેત રહેવા અને જરૂરી સલામતીનાં પગલાં લેવા અપીલ કરી છે.