ચંડોળા ડિમોલિશનનો બીજો તબક્કો શરૂ, 4 દિવસ ચાલશે કામગીરી

અમદાવાદના ચંડોળા તળાવ નજીકના વિસ્તારોમાં ગેરકાયદે દબાણ હટાવવાની કામગીરીનો બીજો તબક્કો આજથી શરૂ થયો છે. પહેલા તબક્કામાં આશરે દોઢ લાખ ચોરસ મીટર જમીન ખાલી કરાઈ હતી, અને હવે બીજા તબક્કામાં અંદાજે અઢી લાખ ચોરસ મીટર જમીન પરનું દબાણ દૂર કરવામાં આવશે.

આ કામગીરી માટે અમદાવાદ મ્યુનિસિપલ કોર્પોરેશન અને શહેર પોલીસ દ્વારા વિશેષ આયોજન કરવામાં આવ્યું છે. આરંભથી 4 દિવસ સુધી, દરરોજ સવારે 7થી બપોરે 1 અને ફરી બપોરે 3થી સાંજે 6 વાગ્યા સુધી ડિમોલિશન કામગીરી હાથ ધરાશે. 35થી વધુ JCB મશીનો, AMTSની બસો, અને મેડિકલ ટીમો ખસેડવાના કાર્ય માટે તૈનાત કરવામાં આવ્યા છે.

પોલીસ કમિશનર જી.એસ. મલિકે માહિતી આપી હતી કે, કાર્યમાં 3,000થી વધુ પોલીસ કર્મચારીઓ તથા SRPની 25 કંપનીઓ બંદોબસ્ત માટે મુકવામાં આવી છે. ડિમોલિશન બાદ તાત્કાલિક રીતે જમીનની આસપાસ બાઉન્ડ્રી વોલ ઉભી કરવામાં આવશે જેથી ફરીથી દબાણ ન થાય. ચંડોળા તળાવ પાસે રહેતા 200થી વધુ બાંગ્લાદેશી નાગરિકોને ડિપોર્ટ કરવામાં આવ્યા છે અને હજુ પણ ડિપોર્ટ કરવાની પ્રક્રિયા ચાલુ છે.