મોતના 2 કલાક પહેલાં જ બનાવ્યો હતો વીડિયો, પછી અચાનક આવી દુઃખદ ખબર; કોણ હતા ‘ગુજ્જુ લવ ગુરુ’?

Banaskantha: ગુજરાતના જાણીતા કોમેડિયન અને સોશિયલ મીડિયા સ્ટાર ‘ગુજ્જુ લવ ગુરુ’ ઉર્ફે ચંદન રાઠોડનું ભાભર નજીક માર્ગ અકસ્માતમાં મોત થયું છે. ભાભરની હરિધામ ગૌશાળા નજીક બાઇકને અકસ્માત નડતાં ચંદન રાઠોડનું કરૂણ નિધન થયું હતું. તેમના અચાનક મોતના સમાચારથી વાવ-થરાદ, સુઈગામ, ભાભર સહિત સમગ્ર ઉત્તર ગુજરાતમાં શોકની લાગણી ફેલાઈ છે. અકસ્મતની જાણ થતાં પરિવારજનો, પરિચિતો અને ચંદન રાઠોડના ચાહકો હોસ્પિટલ ખાતે પહોંચ્યા હતા. સોશિયલ મીડિયા પર પણ તેમના નિધનના સમાચાર બાદ ફોલોઅર્સ અને ચાહકો દ્વારા શ્રદ્ધાંજલિ આપવામાં આવી રહી છે.

ચંદન રાઠોડના મોતના 2 કલાક પહેલાં જ બનાવ્યો હતો વીડિયો

ચંદન રાઠોડના મોતના આશરે બે કલાક પહેલાં જ તેમણે વીડિયો બનાવ્યો હતો. સોશિયલ મીડિયા પર સતત સક્રિય રહેતા ચંદન રાઠોડ પોતાના કોમેડી વીડિયો દ્વારા લાખો ચાહકો સાથે જોડાયેલા હતા. થોડા કલાકો પહેલાં સુધી સોશિયલ મીડિયા પર વીડિયો બનાવનાર ચંદન રાઠોડના અચાનક અકસ્માતમાં મોતના સમાચાર સામે આવતા તેમના ચાહકોમાં ભારે આઘાત જોવા મળી રહ્યો છે.

Instagram પર 18 લાખથી વધુ ફોલોઅર્સ, YouTube પર 10 લાખ સબસ્ક્રાઈબર

ચંદન રાઠોડની સોશિયલ મીડિયા પર જબરદસ્ત લોકપ્રિયતા હતી. Instagram પર તેમના 18 લાખથી વધુ ફોલોઅર્સ, જ્યારે YouTube પર 10 લાખથી વધુ સબસ્ક્રાઈબર્સ હતા. તેમના કોમેડી વીડિયો સોશિયલ મીડિયા પર વારંવાર વાયરલ થતા હતા. ખાસ કરીને યુવાનો અને ઉત્તર ગુજરાતના દર્શકોમાં ચંદન રાઠોડની દેશી કોમેડી અને સ્થાનિક ભાષાશૈલી ખૂબ લોકપ્રિય હતી.

સુઈગામના સામાન્ય પરિવારથી શરૂ કરી સોશિયલ મીડિયા સુધીની સફર

ચંદન રાઠોડ સુઈગામના સામાન્ય પરિવારમાંથી આવતા હતા. પોતાની પ્રતિભા અને મહેનતના આધારે તેમણે સોશિયલ મીડિયા પર પોતાની અલગ ઓળખ બનાવી હતી. વાવ-થરાદ, સુઈગામ અને બનાસકાંઠા વિસ્તારની સ્થાનિક લોકબોલી, દેશી અંદાજ અને ગ્રામ્ય જીવનની વાતોને કોમેડી વીડિયોમાં રજૂ કરવી તેમની ખાસિયત હતી. તેમની સરળ અને સીધી કોમેડી દર્શકો સાથે ઝડપથી જોડાઈ હતી. ચંદન રાઠોડના વીડિયો માત્ર હાસ્ય અને મનોરંજન પૂરતા સીમિત નહોતા. તેઓ કેટલીક વખત સામાજિક મુદ્દાઓ, વર્તમાન પરિસ્થિતિ અને લોકો સુધી સંદેશ પહોંચાડતા વીડિયો પણ બનાવતા હતા. આ કારણે તેમની લોકપ્રિયતા ઉત્તર ગુજરાતથી આગળ વધીને સમગ્ર ગુજરાતમાં પહોંચી હતી. 

ગુજરાતી કોમેડી અને મનોરંજન ક્ષેત્રે પણ બનાવી હતી આગવી ઓળખ

સોશિયલ મીડિયા ઉપરાંત ચંદન રાઠોડે ગુજરાતી ફિલ્મો અને કોમેડી શોમાં પણ કામ કર્યું હતું. ગ્રામ્ય વિસ્તારથી પોતાની કારકિર્દીની શરૂઆત કરીને તેમણે ગુજરાતી મનોરંજન ક્ષેત્રમાં આગવી ઓળખ બનાવી હતી. તેમની કોમેડીની ખાસિયત દેશી ભાષા, સ્થાનિક બોલી, સરળ અભિનય અને ગ્રામ્ય જીવન સાથે જોડાયેલા વિષયો હતા. આ અંદાજને કારણે સોશિયલ મીડિયા પર તેમની અલગ ફેન ફોલોઇંગ બની હતી.

ભાભર અકસ્માતમાં ચંદન રાઠોડના મોતથી ચાહકોમાં શોક

ભાભર નજીક માર્ગ અકસ્માતમાં ચંદન રાઠોડના મોતના સમાચાર સામે આવતા પરિવાર, મિત્રો અને લાખો ચાહકોમાં શોકની લાગણી છવાઈ ગઈ છે. ચંદન રાઠોડના જૂના કોમેડી વીડિયો સોશિયલ મીડિયા પર શેર કરીને ચાહકો તેમને યાદ કરી રહ્યા છે. સામાન્ય પરિવારમાંથી પોતાની મહેનત અને પ્રતિભાના જોરે લાખો લોકો સુધી પહોંચેલા ‘ગુજ્જુ લવ ગુરુ’ ચંદન રાઠોડનું અચાનક નિધન ગુજરાતી સોશિયલ મીડિયા અને કોમેડી જગત માટે મોટો આઘાત છે.