અમદાવાદ | ઐતિહાસિક આસ્ટોડિયા દરવાજા પાસે BRTS બસ દીવાલ સાથે અથડાઈ, બેટરી ફાટતા આગ લાગી

ગુજરાતમાં માર્ગ અકસ્માતોની ઘટનાઓ સામાન્ય બની રહી છે, ત્યારે આજે શનિવારે (૩૧ મે, ૨૦૨૫) અમદાવાદના આસ્ટોડિયા દરવાજા નજીક એક મોટી દુર્ઘટના સર્જાઈ હતી. શહેરના વિવિધ વિસ્તારોમાં દોડતી BRTS (બસ રેપિડ ટ્રાન્ઝિટ સિસ્ટમ) બસ અચાનક ઐતિહાસિક આસ્ટોડિયા દરવાજા પાસેના ડિવાઈડર પર ચઢી જતાં અકસ્માતનો ભોગ બની હતી.

આ અકસ્માત એટલો ગંભીર હતો કે BRTS બસની બેટરી ફાટી જતાં તેમાં ભીષણ આગ લાગી ગઈ હતી. ઘટનાની જાણ થતાં જ ફાયર વિભાગની ટીમ તાત્કાલિક ઘટનાસ્થળે દોડી આવી હતી અને આગને કાબૂમાં લેવાની કામગીરી યુદ્ધના ધોરણે હાથ ધરી હતી.

આ સમગ્ર ઘટનાનો એક વીડિયો પણ સામે આવ્યો છે, જેમાં BRTS બસ આસ્ટોડિયા દરવાજાની બાજુમાં ડિવાઈડર પર ચડેલી અને તેમાંથી ધુમાડા નીકળતા સ્પષ્ટપણે દેખાઈ રહી છે. સદ્દનસીબે, અકસ્માત સમયે સ્થાનિક લોકોએ તત્પરતા દાખવીને બસમાં સવાર તમામ મુસાફરોને સુરક્ષિત રીતે બહાર કાઢી લીધા હતા, જેના કારણે કોઈ જાનહાનિ થઈ નથી.

આ દુર્ઘટનાને પગલે શહેરમાં BRTS બસ અકસ્માતો અને ટ્રાફિક જામના દ્રશ્યો સર્જાયા હતા. જોકે, અકસ્માત કયા કારણોસર સર્જાયો તે અંગેની કોઈ ચોક્કસ માહિતી હજુ સુધી પ્રાપ્ત થઈ નથી અને આ અંગે વધુ તપાસ ચાલી રહી છે. આ ઘટનાએ ફરી એકવાર BRTS બસોની જાળવણી અને સુરક્ષા વ્યવસ્થા અંગેના પ્રશ્નો ઊભા કર્યા છે.