સુરતના લિંબાયત વિસ્તારમાં બેફામ બૂટલેગરોના આતંકનો એક ચોંકાવનારો કિસ્સો સામે આવ્યો છે. નશાની હાલતમાં ગાળાગાળી કરતા આરોપીઓને અટકાવવાનું કહેતાં જ એક નિર્દોષ પરિવારના ઘરને નિશાન બનાવવામાં આવ્યું હતું. 15થી 20 જેટલા શખ્સોએ ઘરની પર પથ્થરમારો કર્યો હતો, જેના લાઈવ વીડિયો સોશિયલ મીડિયામાં વાયરલ થયા છે.
ઘટનાની ગંભીરતા વધુ એટલા માટે વધી છે કે જ્યાં આ હુમલો થયો તે વિસ્તાર નજીક આંગણવાડી અને મંદિર સ્થિત છે. સંવેદનશીલ સ્થળ હોવા છતાં આવારા અને અસામાજિક તત્ત્વો બેફામ બન્યા હોવાનો જાહેરમાં આક્રોશ જોવા મળી રહ્યો છે. સ્થાનિક લોકોનો આક્ષેપ છે કે લાંબા સમયથી વિસ્તારમાં દારૂ અને ગેરકાયદેસર પ્રવૃત્તિઓ ચાલી રહી હતી, પરંતુ યોગ્ય પગલાં ન લેવાતા પરિસ્થિતિ વણસતી ગઈ.
ઘટનાની જાણ થતાં લિંબાયત પોલીસ સ્ટેશનમાં ફરિયાદ નોંધવામાં આવી હતી. પોલીસ દ્વારા બાતમી અને ટેક્નિકલ પુરાવાના આધારે તપાસ હાથ ધરવામાં આવી. તપાસના પરિણામે મારામારી અને પથ્થરમારામાં સંડોવાયેલા ચાર આરોપીઓને ઝડપી લેવામાં આવ્યા છે. ધરપકડ કરાયેલાં આરોપીઓમાં રવિ ઉર્ફે ચોકો ઉર્ફે મનન, રાજ લોટન કારેલકર, કરણ નાનાભાઈ સોનવણે અને પ્રકાશ ઉર્ફે વિકિ શુટરનો સમાવેશ થાય છે.
પોલીસે આરોપીઓની ધરપકડ બાદ કાયદેસરની પ્રક્રિયા અંતર્ગત ઘટનાસ્થળે તેમને લઈ જઈ રી-કન્સ્ટ્રક્શન પણ કરાવ્યું હતું, જેથી ગુનાની સંપૂર્ણ કડીઓ સ્પષ્ટ થઈ શકે. પોલીસનો દાવો છે કે વિસ્તારમાં શાંતિ જળવાય રહે તે માટે પેટ્રોલિંગ વધારવામાં આવ્યું છે અને ગેરકાયદેસર પ્રવૃત્તિઓ સામે કડક કાર્યવાહી ચાલુ રહેશે.
આ ઘટનાએ સુરત શહેરમાં કાયદો વ્યવસ્થાના મુદ્દે ફરી એકવાર ચર્ચા જગાવી છે. સ્થાનિક રહેવાસીઓ હવે દારૂ અને બૂટલેગરી સામે કાયમી નિરીક્ષણ અને કાર્યવાહી કરવાની માંગ ઉઠાવી રહ્યા છે.
&nbsp;
&nbsp;

સુરતમાં બૂટલેગરો બેફામ

નશાખોરી અટકાવતા પરિવાર પર હુમલો, પોલીસ કાર્યવાહી બાદ આરોપીઓની રી-કન્સ્ટ્રક્શન સાથે ધરપકડ..

December 4, 2025 | 14:43 IST