ગાંધીનગર સિવિલમાં બ્લેક ફંગસનો પુનઃપ્રવેશ, બે દર્દી ICU માં, એકે આંખ ગુમાવી, આરોગ્ય તંત્ર સજ્જ!

ગાંધીનગર સિવિલ હોસ્પિટલમાં ફરી એકવાર બ્લેક ફંગસ (મ્યુકરમાઇકોસીસ)નો ભય દેખાયો છે, જ્યાં બે દર્દીઓમાં આ જીવલેણ ફંગસની પુષ્ટિ થઈ છે. આ બંને દર્દીઓ હાલ ICU માં સારવાર હેઠળ છે, અને એક દર્દીની સ્થિતિ એટલી ગંભીર હતી કે તેને મગજમાં ફંગસ ફેલાતું અટકાવવા માટે તેની ડાબી આંખ કાઢવી પડી છે. આરોગ્ય તંત્ર આ ઘટનાથી એલર્ટ બન્યું છે.

વાસણ ગામના આધેડની કરુણ સ્થિતિ...

વાસણ ગામના 55 વર્ષના એક પુરુષને શરૂઆતમાં સાઇનસમાં તકલીફ થતી હતી, પરંતુ ફંગસ ઝડપથી આંખ સુધી પહોંચી જતાં ત્યાં અસાધારણ સોજો આવી ગયો. તપાસમાં તેમને મ્યુકરમાઇકોસીસ હોવાનું નિદાન થતાં તાત્કાલિક ICU માં દાખલ કરીને એન્ટી-ફંગલ સારવાર શરૂ કરવામાં આવી છે.

બીજા કિસ્સામાં, કડી તાલુકાના 60 વર્ષના એક પુરુષને નાક અને આંખની આસપાસ અસહ્ય દુઃખાવો અને સોજો થતાં તેઓ સિવિલ હોસ્પિટલમાં દાખલ થયા હતા. તેમની પણ ડાબી આંખ કાઢવી પડી, જેથી ફંગસ મગજ સુધી ન પહોંચે. ઓપ્થેલમો વિભાગના ડો. જીગીશ દેસાઈ અને તેમની ટીમે સમયસર સર્જરી કરીને દર્દીનો જીવ બચાવવાનો પ્રયાસ કર્યો છે.

સરકાર ઉઠાવશે મોંઘી સારવારનો ખર્ચ...

મ્યુકરમાઇકોસીસની સારવાર અત્યંત ખર્ચાળ હોય છે. દર્દીને રોજના સાત એન્ટી-ફંગલ ઇન્જેક્શન આપવા પડે છે, જેમાં એક ઇન્જેક્શનનો ખર્ચ આશરે રૂ. 2000 જેટલો થાય છે. આ સારવાર અંદાજે 21 દિવસ સુધી ચાલે છે. રાજ્ય સરકારે આ બંને દર્દીઓની સારવારનો સમગ્ર ખર્ચ ઉઠાવવાનો નિર્ણય લીધો છે, જે દર્દીઓ અને તેમના પરિવારો માટે મોટી રાહત સમાન છે.

કારણો અને સાવચેતી...

મહત્વની વાત એ છે કે, કોરોનાની બીજી લહેર દરમિયાન મ્યુકરમાઇકોસીસના અનેક કેસો જોવા મળ્યા હતા, જે મુખ્યત્વે ડાયાબિટીસ, લાંબા સમય સુધી ઓક્સિજનનો ઉપયોગ, સ્ટેરોઇડ અને રેમડેસિવિરના ઉપયોગ સાથે સંકળાયેલા હતા. જોકે, હાલના બંને કેસોમાં કોરોનાની કોઈ ભૂમિકા નથી. આ કિસ્સાઓમાં અનિયંત્રિત ડાયાબિટીસ અને ઓછી રોગપ્રતિકારક શક્તિ મુખ્ય કારણો તરીકે સામે આવ્યા છે. આરોગ્ય નિષ્ણાતોના મતે, મ્યુકરમાઇકોસીસ ફંગસ સામાન્ય રીતે નાકના સાઇનસમાંથી શરૂ થઈને માથા તરફ ઝડપથી ફેલાય છે. શરૂઆતમાં મોઢાના ભાગે સોજો, આંખોમાં દુઃખાવો અને દ્રષ્ટિ ગુમાવવાની ફરિયાદ જોવા મળે છે. જો સમયસર સારવાર ન મળે તો ફંગસ મગજ સુધી ફેલાઈને જીવલેણ પણ સાબિત થઈ શકે છે.