ભાજપની નવી રાષ્ટ્રીય ટીમ જાહેર

BJP National Team Announcement: ભારતીય જનતા પાર્ટી (BJP)ના રાષ્ટ્રીય અધ્યક્ષ નીતિન નવીને નવી રાષ્ટ્રીય ટીમની જાહેરાત કરતાં જ રાજકીય વર્તુળોમાં ચર્ચા તેજ બની છે. લાંબા સમયથી રાહ જોવાતી સંગઠનાત્મક ફેરબદલની યાદીમાં અનુભવી નેતાઓ સાથે યુવા ચહેરાઓને પણ મહત્વ આપવામાં આવ્યું છે. મહિલાઓ, યુવાનો અને વિવિધ સામાજિક સમીકરણોને ધ્યાનમાં રાખીને તૈયાર કરાયેલી આ ટીમમાં ગુજરાતને ખાસ મહત્વ મળ્યું છે.

ગુજરાતના 4 નેતાઓને ભાજપની રાષ્ટ્રીય ટીમમાં સ્થાન
ભાજપની નવી રાષ્ટ્રીય ટીમમાં ગુજરાતના 4 નેતાઓને મહત્વની જવાબદારી સોંપવામાં આવી છે. વર્ષાબેન દોશીને રાષ્ટ્રીય ઉપાધ્યક્ષ, જ્યારે અમદાવાદના પૂર્વ ધારાસભ્ય જગદીશ ઈશ્વરભાઈ પટેલ અને કોંગ્રેસમાંથી ભાજપમાં આવેલા રોહન ગુપ્તાને રાષ્ટ્રીય મંત્રી બનાવવામાં આવ્યા છે. બીજી તરફ વડોદરાના સાંસદ ડો. હેમાંગ જોશીને ભાજપ યુવા મોરચાના રાષ્ટ્રીય અધ્યક્ષ તરીકે નિયુક્ત કરવામાં આવ્યા છે.

35 વર્ષના હેમાંગ જોશીને યુવા મોરચાની મોટી કમાન
ભાજપે યુવા મોરચાના રાષ્ટ્રીય અધ્યક્ષ પદે મોટો ફેરફાર કરતાં તેજસ્વી સૂર્યાના સ્થાને 35 વર્ષીય ડો. હેમાંગ જોશીની પસંદગી કરી છે. વડોદરાના સાંસદ હેમાંગ જોશી અગાઉ ગુજરાત ભાજપ યુવા મોરચાના પ્રમુખ તરીકે પણ જવાબદારી સંભાળી ચૂક્યા છે. હેમાંગ જોશીએ વડોદરાની એમ.એસ. યુનિવર્સિટીમાં અભ્યાસ દરમિયાન અખિલ ભારતીય વિદ્યાર્થી પરિષદ (ABVP) થી રાજકીય સફરની શરૂઆત કરી હતી. 2010-11 દરમિયાન તેઓ ABVPના મીડિયા ઇન્ચાર્જ અને જિલ્લા કારોબારી સભ્ય રહ્યા હતા. ત્યારબાદ ભાજપ સંગઠનમાં સક્રિય થયા અને વિવિધ જવાબદારીઓ સંભાળ્યા બાદ હવે તેમને રાષ્ટ્રીય સ્તરે યુવા મોરચાની કમાન સોંપવામાં આવી છે.

વર્ષાબેન દોશીને રાષ્ટ્રીય ઉપાધ્યક્ષ પદ
ગુજરાતના અનુભવી મહિલા નેતા અને વઢવાણના પૂર્વ ધારાસભ્ય વર્ષાબેન નરેન્દ્રભાઈ દોશીને ભાજપની રાષ્ટ્રીય ટીમમાં રાષ્ટ્રીય ઉપાધ્યક્ષ બનાવવામાં આવ્યા છે. તેઓ 2007 અને 2012 ની વિધાનસભા ચૂંટણીમાં વઢવાણ બેઠક પરથી ચૂંટાયા હતા. વર્ષાબેન દોશી ગુજરાત ભાજપમાં પ્રદેશ ઉપાધ્યક્ષ સહિતની સંગઠનાત્મક જવાબદારીઓ પણ સંભાળી ચૂક્યા છે. જિલ્લા પ્રભારી તરીકેના અનુભવને ધ્યાનમાં રાખીને તેમને હવે રાષ્ટ્રીય સંગઠનમાં મહત્વનું સ્થાન આપવામાં આવ્યું છે.

જગદીશ પટેલ અને રોહન ગુપ્તાને રાષ્ટ્રીય મંત્રીની જવાબદારી
અમદાવાદના અમરાઈવાડીના પૂર્વ ધારાસભ્ય જગદીશ ઈશ્વરભાઈ પટેલને ભાજપના રાષ્ટ્રીય મંત્રી બનાવવામાં આવ્યા છે. તેઓ 2019 થી 2022 દરમિયાન ધારાસભ્ય રહી ચૂક્યા છે અને સંગઠન તથા રાજકારણનો લાંબો અનુભવ ધરાવે છે. બીજી તરફ રોહન ગુપ્તાને પણ રાષ્ટ્રીય મંત્રીની જવાબદારી સોંપવામાં આવી છે. રોહન ગુપ્તા અગાઉ કોંગ્રેસના IT અને સોશિયલ મીડિયા સંગઠનમાં મહત્વની ભૂમિકામાં રહી ચૂક્યા છે. 2024ની લોકસભા ચૂંટણી પહેલાં તેમણે કોંગ્રેસ છોડીને ભાજપમાં પ્રવેશ કર્યો હતો. ડિજિટલ કમ્યુનિકેશન અને સોશિયલ મીડિયા ક્ષેત્રનો તેમનો અનુભવ ભાજપના રાષ્ટ્રીય સંગઠન માટે મહત્વપૂર્ણ માનવામાં આવી રહ્યો છે.

વસુંધરા રાજે, સ્મૃતિ ઈરાની અને રામ માધવને પણ મહત્વની જવાબદારી
ભાજપની નવી રાષ્ટ્રીય ટીમમાં અનેક દિગ્ગજ નેતાઓને પણ મહત્વની જવાબદારી મળી છે. રાજસ્થાનના પૂર્વ મુખ્યમંત્રી વસુંધરા રાજે, તીરથ સિંહ રાવત, બૈજયંત જય પાંડા અને રામ માધવ સહિતના નેતાઓને રાષ્ટ્રીય ઉપાધ્યક્ષ બનાવવામાં આવ્યા છે. પૂર્વ કેન્દ્રીય મંત્રી સ્મૃતિ ઈરાનીને રાષ્ટ્રીય મહામંત્રીની જવાબદારી સોંપવામાં આવી છે. નવી ટીમમાં અનુભવી નેતાઓની સાથે યુવા ચહેરાઓને સ્થાન આપીને ભાજપે આગામી રાજકીય પડકારો માટે સંગઠનને વધુ મજબૂત કરવાનો સંદેશ આપ્યો છે.

ગુજરાત ભાજપમાં ઉત્સાહ, રાષ્ટ્રીય સંગઠનમાં વધ્યું પ્રતિનિધિત્વ
ભાજપની નવી રાષ્ટ્રીય ટીમમાં ગુજરાતના 4 નેતાઓને મહત્વની જવાબદારી મળતાં ગુજરાત ભાજપના કાર્યકરોમાં ઉત્સાહ જોવા મળી રહ્યો છે. એક તરફ સી.આર. પાટીલ અને મનસુખ માંડવિયા જેવા ગુજરાતના નેતાઓ કેન્દ્ર સરકારમાં મહત્વની ભૂમિકા ભજવી રહ્યા છે, ત્યારે હવે રાષ્ટ્રીય સંગઠનમાં પણ ગુજરાતનું પ્રતિનિધિત્વ વધુ મજબૂત બન્યું છે. આ સંગઠનાત્મક ફેરફારને આગામી વિધાનસભા ચૂંટણીઓ અને ભાજપની રાષ્ટ્રીય રાજકીય રણનીતિ સાથે પણ જોડીને જોવામાં આવી રહ્યો છે. ખાસ કરીને યુવા અને મહિલા નેતૃત્વને આપવામાં આવેલા મહત્વને કારણે ભાજપની નવી ટીમ પર સૌની નજર રહેશે.