ખેડૂતો માટે માઠા સમાચાર: હજુ 4 દિવસ વરસાદની આગાહી

ગુજરાતમાં કમોસમી વરસાદનો કહેર યથાવત છે, જેને કારણે ખેડૂતોના તૈયાર પાક પર પાણી ફરી વળતાં ભારે નુકસાન થયું છે. આ આફતની સૌથી વધુ અસર સૌરાષ્ટ્ર અને દક્ષિણ ગુજરાતના વિસ્તારોમાં વર્તાઈ રહી છે. ખેડૂતો માથે હાથ દઈને બેઠા છે, ત્યારે હવામાન વિભાગ (IMD) તરફથી વધુ ચિંતાજનક સમાચાર આવ્યા છે.

4 દિવસ સુધી વરસાદ, 40 કિ.મી.ની ઝડપે પવન

IMD એ રાજ્યમાં હજુ 4 દિવસ સુધી હળવાથી મધ્યમ વરસાદની આગાહી કરી છે. આગામી 2 અને 3 નવેમ્બર દરમિયાન રાજ્યના છૂટાછવાયા સ્થળોએ ગાજવીજ સાથે વરસાદ પડી શકે છે. આ દરમિયાન 30 થી 40 કિ.મી. પ્રતિ કલાકની ઝડપે પવન ફૂંકાવવાની પણ શક્યતા વ્યક્ત કરવામાં આવી છે.

આગામી 4 અને 5 નવેમ્બરના રોજ રાજ્યના 20થી વધુ જિલ્લાઓમાં વરસાદી માહોલ જોવા મળશે. જેમાં મુખ્યત્વે અમદાવાદ, ખેડા, આણંદ, વડોદરા, સુરત, તાપી, ડાંગ, નવસારી, વલસાડ, ભાવનગર, અમરેલી, ગીર સોમનાથ અને જૂનાગઢ જેવા મહત્ત્વના જિલ્લાઓનો સમાવેશ થાય છે.

ખેડૂતો માટે આ સમયગાળો સૌથી કસોટીરૂપ છે, કારણ કે સતત વરસાદ અને ઝડપી પવનથી ઊભા પાકને વધુ નુકસાન થવાની સંભાવના છે.

 5 નવેમ્બર બાદ રાહત

જોકે, હવામાન વિભાગે થોડી રાહતની વાત પણ જણાવી છે. 5 નવેમ્બર બાદ રાજ્યમાં વરસાદની શક્યતા નહિવત થઈ જશે.

ત્યાં સુધી, વહીવટી તંત્ર અને ખેડૂતોએ આ વરસાદી માહોલ સામે સાવચેતી રાખવી જરૂરી છે. ખેડૂતોએ શક્ય હોય ત્યાં પાકને સુરક્ષિત જગ્યાએ ખસેડવા અથવા તાડપત્રી વડે ઢાંકવા જેવા પગલાં લેવા જોઈએ. કુદરતનો પ્રકોપ ક્યારે અટકશે અને સરકારી સહાય ક્યારે પહોંચશે, તેની રાહ જોઈને ધરતીનો તાત બેઠો છે.