આણંદમાં પિઝામાંથી નીકળી માખી અને વાળ, રેસ્ટોરન્ટોની સ્વચ્છતા પર ઉઠ્યા સવાલ

આજકાલ બહાર ખાવાનું ચલણ વધી ગયું છે, પણ આ ચાલ તમારી તબિયત માટે જોખમી સાબિત થઈ શકે છે. બહાર જે ખોરાક મળતો હોય તેની પાછળ કેટલી સફાઈ અને કાળજી રાખવામાં આવે છે એ ઘણા લોકો જાણતા નથી. લોકો આંખ બંધ કરીને માનીને ચાલે છે કે, ખોરાક શુદ્ધ અને સલામત હશે – પરંતુ આ ભરોસો ઘણીવાર તૂટી જાય છે.

આવા જ એક બનાવમાં આણંદની એક જાણીતી હોટલમાંથી મંગાવવામાં આવેલા પિઝામાંથી ગ્રાહકને માખી અને વાળ મળ્યા હતા. ગ્રાહકે તરત જ પિઝાનો વીડિયો ઉતારી હોટલના કર્મચારીને બતાવ્યો. વીડિયોમાં સ્પષ્ટ રીતે પિઝાની અંદર માખી ચોંટેલી જોઈ શકાય છે. આ ઘટનાએ લોકોને દચકાવ્યા છે - વિચાર કરો કે, જો આવો પિઝા કોઈએ ખાધો હોત તો શું પરિણામ થઈ શકે?

આ ઘટના બાદ ફરીવાર બહારના ખોરાકની ગુણવત્તા અને હોટલોમાં થતી બેદરકારીનો મુદ્દો ચર્ચામાં આવ્યો છે. વારંવાર આવી ઘટનાઓ સામે આવે છે - ક્યારેક ખોરાકમાંથી જીવડાં નીકળે છે, તો ક્યારે વંદો કે ગરોળીની પૂંછડી.