અમૂલે દૂધના ખરીદ ભાવમાં કર્યો રૂપિયા 10નો વધારો , દાણ પણ થયું સસ્તુ

અમૂલ ડેરીએ પશુપાલકોના હિતમાં મહત્વનો નિર્ણય લીધો છે. હવે દૂધના ખરીદ ભાવમાં પ્રતિ કિલો ફેટે રૂપિયા 10નો વધારો કર્યો છે. આ અગાઉ જે ભાવ રૂપિયા 855નો હતો, તે હવે રૂપિયા 865 કરવામાં આવ્યો છે. આ પગલાથી પશુપાલકોના આવકમાં વધારો થશે.

આ સાથે અમૂલે દાણના ભાવમાં પણ ઘટાડો કર્યો છે. દાણની 70 કિલોની બેગ હવે રૂપિયા 1540ની બદલે રૂપિયા 1505માં મળશે, એટલે કે રૂપિયા 35નો ફાયદો થશે. 50 કિલોની બેગમાં રૂપિયા 25નો ઘટાડો થયો છે - જૂનો ભાવ રૂપિયા 1075 હતો, જે હવે રૂપિયા 1050 થશે.

આ નિર્ણયથી 7 લાખથી વધુ પશુપાલકોને સીધો લાભ મળશે. મહત્વનું છે કે, ગ્રાહકો માટે દૂધના ભાવમાં કોઈ વધારો થયો નથી, એટલે કે દૂધના વેચાણનો ભાવ યથાવત રહેશે.

થોડા દિવસો પહેલા બનાસ ડેરી અને સરહદ ડેરીએ પણ દૂધના ખરીદ ભાવમાં વધારો કર્યો હતો. બનાસ ડેરીએ તો 1 જૂનથી દૂધના ભાવમાં પ્રતિ કિલો ફેટે રૂપિયા 25નો વધારો કરવાની જાહેરાત કરી હતી.