અમિત શાહ આજથી 3 દિવસ ગુજરાત પ્રવાસે

કેન્દ્રીય ગૃહમંત્રી અમિત શાહ બિહાર ચૂંટણીમાં ભવ્ય સફળતા બાદ ફરી એકવાર પોતાના વતન ગુજરાતની મુલાકાતે પધાર્યા છે. તેમની આ મુલાકાત માત્ર રાજકીય નહિ, પરંતુ સામાન્ય જનતા માટે એક મોટી ભેટ લઈને આવી છે. આજે, 5મી ડિસેમ્બરથી શરૂ થતા તેમના 3 દિવસના પ્રવાસ દરમિયાન, કેન્દ્રીય ગૃહ મંત્રી અમિત શાહ કરોડોના વિકાસ કાર્યોનું લોકાર્પણ અને ખાતમુહૂર્ત કરશે. આ વિકાસની વણઝાર ગાંધીનગર, અમદાવાદ અને બનાસકાંઠામાં જોવા મળશે. તેમના આ પ્રવાસનો મુખ્ય હેતુ રાજ્યમાં ઈન્ફ્રાસ્ટ્રક્ચરને વધુ મજબૂત બનાવવાનો અને નાગરિકોને સીધો લાભ પહોંચાડવાનો છે, જેમાં અનેક કાર્યક્રમો દ્વારા તેઓ લોકો સાથે સંવાદ પણ કરશે.

ઓક્સિજન પાર્કથી રેલવે ઓવરબ્રિજનું ઉદ્ધાટન

અમિત શાહના આજના એટલે કે 5મી ડિસેમ્બરના કાર્યક્રમની વિગતો ખૂબ જ વિસ્તૃત છે. અમદાવાદમાં સવારે 10.30 કલાકે GMDC ગ્રાઉન્ડ, મેમનગર ખાતે સ્વદેશી જાગરણ મંચ દ્વારા આયોજિત સ્વદેશોત્સવનો ઉદ્ઘાટન સમારોહ યોજાશે. બપોરે 12 કલાકે, મહાત્મા ગાંધી કન્વેશન સેન્ટર, ગાંધીનગર ખાતે આંતરરાષ્ટ્રીય સહકારી વર્ષ 2025ની ઉજવણીના ભાગરૂપે નાબાર્ડ દ્વારા આયોજિત અર્થ સમિટ 2025નો સમાપન સમારોહ છે. બપોરે 2:30 કલાકે સર્કિટ હાઉસ, ગાંધીનગર ખાતે તેઓ ગાંધીનગરના લોકસભામાં તળાવોના ઈન્ટલીંકીંગ પ્રોજેક્ટ અન્વયે મુખ્ય સચિવ અને સિંચાઈ વિભાગના અધિકારીઓ સાથે બેઠક કરશે. ગાંધીનગર મ્યુનિસિપાલ કોર્પોરેશન દ્વારા નવનિર્મિત બગીચા અનેયોગ સ્ટુડિયોનું ઉદ્ધાટન બપોરે 3.30 કલાકે સેક્ટર 22 અને બીજું બગીચાનું ઉદ્ધાટન 4 કલાકે સેક્ટર 27માં થશે.

આ પણ વાંચો: અમિત શાહ: ભાવનગરમાં નવા ભાજપ કાર્યાલયનું ઉદ્ઘાટન

અમદાવાદમાં શોપિંગ ફેસ્ટિવલનું ઉદ્ધાટન

સાંજે 4:15 કલાકે, ખ 6 સર્કલ રોડ નંબર 6, ગાંધીનગર ખાતે LC-11 રેલવે ઓવરબ્રિજ અને સ્પોર્ટ્સ કોમ્પલેક્ષનું ઉદ્ધાટન કરશે. આ ઉપરાંત, આદરજ મોટી, ગાંધીનગર ખાતે સાંજે 4.30 કલાકે સાબરમતી ગેસ લિમિટેડ દ્વારા શરૂ કરવામાં આવનાર PNG ગેસ લાઈનનું ઉદ્ધાટન, 4.45 કલાકે નવનિર્મિત પ્રાથમિક આરોગ્ય કેન્દ્રનું ઉદ્ધાટન અને 5 કલાકે સર્વ શિક્ષા અભિયાન હેઠળ નવીનીકૃત પ્રાથમિક શાળા અને કન્યા પ્રાથમિક શાળાનું ઉદ્ધાટન કરશે. સાંજે 5:30 કલાકે વીર સાવરકર સ્પોર્ટ્સ કોમ્પલેક્ષ, નારણપુરા, અમદાવાદ ખાતે સાંસદ ખેલ મહોત્સવનો સમાપન સમારોહ અને 6:30 કલાકે મોન્ટે કાર્લો ઓક્સિજન પાર્ક પાસે, સિંધુભવન રોડ, અમદાવાદ ખાતે અમદાવાદ શોપિંગ ફેસ્ટિવલનો ઉદ્ધાટન સમારોહ યોજાશે.

પ્રમુખ વરણી અમૃત મહોત્સવમાં પણ લેશે ભાગ

આ સાથે જ, કેન્દ્રીય ગૃહમંત્રી અમિત શાહ સાઉથ બોપલમાં ઓક્સિજન પાર્કનું લોકાર્પણ કરશે, નવનિર્મિત વસ્ત્રાપુર તળાવનું લોકાર્પણ કરશે અને નવા વાડજમાાં 350 EWS આવાસનું લોકાર્પણ કરશે. ગોતામાં વિકાસ કાર્યોનું ખાતમૂહૂર્ત અને લોકાર્પણ કરવામાં આવશે. મહત્વની વાત એ છે કે, UPના રાજ્યપાલ આનંદીબેન પટેલના જીવન આધારિત પુસ્તકનું વિમોચન થશે, અને BAPS દ્વારા આયોજિત પ્રમુખ વરણી અમૃત મહોત્સવમાં પણ તેઓ ભાગ લેશે.

બનાસ ડેરીના પ્લાન્ટ અને મહિલા દૂધ ઉત્પાદકો સાથે સંવાદ

6 ડિસેમ્બર, 2025ના રોજ કેન્દ્રીય ગૃહમંત્રી અમિત શાહ બનાસકાંઠામાં રહેશે, જ્યાં તેઓ વિવિધ લોકાર્પણ કાર્યક્રમમાં ભાગ લેશે. તેઓ બનાસ ડેરીના વિવિધ પ્લાન્ટનું લોકાર્પણ કરશે અને તેની મુલાકાત પણ લેશે. આ કાર્યક્રમનો સૌથી મહત્વનો ભાગ છે બનાસકાંઠાના મહિલા દૂધ ઉત્પાદકો સાથે સંવાદ, જે સહકારિતા ક્ષેત્રને વધુ મજબૂત બનાવવાની દિશામાં એક પગલું છે.

અમદાવાદને EWS આવાસ અને મિનિ સ્પોર્ટ્સ કોમ્પ્લેક્સની ભેટ

પ્રવાસના અંતિમ દિવસે, 7 ડિસેમ્બર, 2025ના રોજ, અમિત શાહ ફરીથી અમદાવાદીઓને વિકાસ ભેટ આપશે. તેઓ અમદાવાદમાં વિવિધ લોકાર્પણ કાર્યક્રમોમાં ભાગ લેશે. થલતેજમાં 861 EWS આવાસનું લોકાર્પણ તેમના હસ્તે થશે, જે ગરીબ અને મધ્યમ વર્ગ માટે આશાનું કિરણ છે. આ ઉપરાંત, સરખેજ અને બોડકદેવમાં વિકાસના વિવિધ કાર્યોનું લોકાર્પણ થશે, અને ગોતામાં મિનિ સ્પોર્ટ્સ કોમ્પ્લેક્ષનું લોકાર્પણ પણ થશે, જે યુવાનોને રમતગમત માટે નવી સુવિધાઓ પૂરી પાડશે. આ તમામ કાર્યક્રમો સ્પષ્ટ સંકેત આપે છે કે, અમિત શાહ ગુજરાતના સર્વાંગી વિકાસ માટે પ્રતિબદ્ધ છે.