રાજકોટ મહાનગરપાલિકા સંચાલિત ઢોર ડબ્બામાં એક દિવસમાં 10 ગાયના મોતનો આક્ષેપ

રાજકોટ: રાજકોટ મહાનગરપાલિકા સંચાલિત ઢોર ડબ્બામાં છેલ્લાં 3 મહિનામાં 756 પશુઓના મોત થયાનો તાજેતરમાં ઘટસ્ફોટ થયો હતો. તેના પગલે કોંગ્રેસના કોર્પોરેટરો વશરામ સાગઠીયા અને કોમલ ભારાઈએ આજી ડેમ પાસેના ઢોર ડબ્બામાં ઓચિંતી મુલાકાત લીધી હતી. ઢોર ડબ્બાની મુલાકાત લીધા બાદ વિપક્ષના કોર્પોરેટરોએ ક્ષમતા કરતાં વધુ ઢોર ભર્યા હોવાનો આક્ષેપ કર્યો છે. 

પૂરતા ઘાસચારાના અભાવે અને પારાવાર ગંદકીના કારણે ગાયો મરણ પામી હોવાનો વિપક્ષના કોર્પોરેટરોએ આક્ષેપ કર્યો છે. જ્યારે પ્લાસ્ટિક અને રોગચાળાના કારણે ગાયો મરતી હોવાનો મેયરે બચાવ કર્યો છે. મહત્વપૂર્ણ છે કે, આજી ડેમ પાસેના ઢોર ડબ્બામાં 532ની ક્ષમતા સામે 1045 જેટલાં ઢોર રાખવામાં આવ્યા છે.

રાજકોટના આજી ડેમ પાસેના ઢોર ડબ્બામાં વિપક્ષ કોર્પોરેટરો વશરામ સાગઠિયા અને કોમલ ભારાઈ સહિતનાએ સરપ્રાઈઝ મુલાકાત કરી હતી. જેમાં 532ની ક્ષમતા સામે 1045 પશુઓ રાખવામાં આવ્યા છે. ઢોર ડબ્બામાં પારાવાર ગંદકી છે અને ઢોરને ઘાસ પણ અપૂરતું અપાતું હોવાનુ સામે આવ્યુ છે. 

રાજકોટ મહાનગરપાલિકાના વિપક્ષ નેતા વશરામ સાગઠિયાએ જણાવ્યું કે, ઢોર ડબ્બામાં 3 મહિનામાં 756 ગાયોનાં મોત થયા છે. જ્યારે આજે પણ મનપાના ચોપડે 6 ગાયના મોત થયાં છે. હકીકતમાં 10 પશુના મોત નીપજ્યા છે. ઢોર ડબ્બામાં ગૌ માતા સહિતના પશુઓને પૂરતો ઘાસચારો આપવામાં આવતો નથી. ઘાસચારામાં ધૂળ જોવા મળી રહી છે. આ ઉપરાંત ભારે ગંદકી પણ જોવા મળી રહી છે. 

ભૂખમરા અને પશુઓના પેટમાં માટી જવાના કારણે મોત થયાં હોય તેવું લાગી રહ્યુ છે. હાલમાં ઢોર ડબ્બામાં આવતા પશુઓના સંભાળની જવાબદારી જીવદયા ટ્રસ્ટને સોંપવામાં આવી છે. ઢોર ડબ્બામાં પશુઓને મરવા મજબૂર કરવામાં આવી રહ્યા હોય તેમ લાગી રહ્યુ છે. 532ની કેપેસિટી સામે 1045 પશુઓ રાખવામાં આવ્યા છે.

ઢોર ડબ્બામાં પશુઓના મોત મામલે મેયર નયનાબેન પેઢડિયાએ જણાવ્યું કે, ઢોર ડબ્બામાં પકડીને લવાતા પશુઓ બિમાર હોય છે. પ્લાસ્ટિક આરોગતા હોવાથી મોતનું પ્રમાણ વધુ છે. એનિમલ હોસ્ટેલનું સંચાલન જીવદયા ટ્રસ્ટ કરે છે. જીવદયા ટ્રસ્ટ પરત કરવા માંગતું હશે સંચાલન પરત લઈ લેવાશે. પ્લાસ્ટિકની થેલીમાં ફેંકવામાં આવતા એંઠવાડને આરોગવાથી પશુના મોત થાય છે.

મનપાનાં વેટરનરી ઓફિસર ડો.ભાવેશ જાકાસણીયાએ અગાઉ જણાવ્યું હતું કે, રાજકોટનાં જીવદયા ટ્રસ્ટે ઢોર ડબ્બાનું સંચાલન છોડવા માટેની મૌખિક રજૂઆત કરી છે. 

750થી વધુ પશુના મોત બાદ કોન્ટ્રાકટરે સ્વૈચ્છિક રીતે મુક્ત કરવા ઈચ્છા વ્યક્ત કરી છે. તેથી મહાનગરપાલિકા ફરીથી ઢોર ડબ્બાનું સંચાલન હાથમાં લેશે. ઢોર ડબ્બામાં સૌથી વધુ મોત વૃદ્ધ પશુઓ અને માંદા વાછરડાઓનાં થયા છે.

તેમણે ઉમેર્યુ હતું કે સામાન્ય રીતે ઢોર ડબ્બામાં વૃદ્ધ પશુઓ અને નાના વાછરડાઓ આવતા હોય છે. જેના કારણે ચોમાસામાં મૃત્યુ આંક વધતો હોય છે. કોઈની બેદરકારી હોવાનું પ્રાથમિક તપાસમાં જણાયુ નથી. હાલમાં મનપા દરરોજ 20 જેટલા પશુઓ રસ્તા પરથી પકડે છે. માત્ર 108 ગાય અને બાકી અન્ય પશુઓના મરણ થયા હોવાનો વેટરનરી ઓફિસરે દાવો કર્યો છે.