Ahmedabad : કાલુપુરમાં જર્જરિત મકાન ધરાશાયી, એક મહિલાનું કરુણ મોત

શહેરના કાલુપુર વિસ્તારમાં આવેલી ધનાસુથારની પોળમાં ગજ્જરના ખાચા પાસે મોડી રાત્રે એક જર્જરિત બે માળનું મકાન અચાનક ધરાશાયી થતાં ભારે અફરાતફરી મચી ગઈ હતી. આ દુર્ઘટનામાં એક મહિલા કાટમાળ નીચે દટાઈ ગઈ હતી, જેમનું બાદમાં કરુણ મોત નીપજ્યું હતું.

દુર્ઘટના અને રેસ્ક્યુ ઓપરેશન...

મળતી માહિતી અનુસાર, મકાન અત્યંત જૂનું અને જર્જરિત હાલતમાં હતું. મોડી રાત્રે અચાનક જ તે ધરાશાયી થતાં સ્થાનિકોમાં ભયનો માહોલ છવાઈ ગયો હતો. ઘટનાની જાણ થતાં જ ફાયર બ્રિગેડની ટીમ તાત્કાલિક ઘટનાસ્થળે પહોંચી હતી. ફાયર બ્રિગેડના જવાનોએ ઝડપી રેસ્ક્યુ ઓપરેશન હાથ ધરીને કાટમાળ નીચે દટાયેલી મહિલાને ભારે જહેમત બાદ બહાર કાઢી હતી.

મહિલાનું કરુણ અવસાન...

રેસ્ક્યુ કરાયેલી મહિલાને તાત્કાલિક સારવાર અર્થે હોસ્પિટલ ખસેડવામાં આવી હતી, પરંતુ દુર્ભાગ્યવશ હોસ્પિટલમાં ફરજ પરના તબીબોએ તેમને મૃત જાહેર કર્યા હતા. આ ઘટનાએ ફરી એકવાર શહેરમાં આવેલા જૂના અને જર્જરિત મકાનોની સુરક્ષાનો મુદ્દો સામે લાવ્યો છે.

જર્જરિત મકાનોનો ભય...

અમદાવાદ શહેરમાં અનેક વિસ્તારોમાં આવા જૂના અને જર્જરિત મકાનો આવેલા છે, જે ચોમાસા દરમિયાન કે અન્ય કોઈ કારણોસર ધરાશાયી થવાનું જોખમ ધરાવે છે. આ ઘટનાએ દર્શાવ્યું છે કે, આવા મકાનોમાં રહેતા લોકોનો જીવ સતત જોખમમાં છે. મહાનગરપાલિકા દ્વારા આવા મકાનોને શોધી કાઢીને તેના પર તાત્કાલિક કાર્યવાહી કરવાની જરૂર છે, જેથી ભવિષ્યમાં આવા કોઈ દુર્ભાગ્યપૂર્ણ બનાવ ન બને અને નિર્દોષ લોકોનો ભોગ ન લેવાય. શું તંત્ર આ ગંભીર મુદ્દે ક્યારે કડક પગલાં લેશે?