Ahmedabad Rickshaw Taxi Strike: અમદાવાદમાં રિક્ષા હડતાળ અને ટેક્સી બંધને લઈને સ્થિતિ વધુ ગરમ બની છે. ઓલા, ઉબેર અને રેપિડો જેવી ઓનલાઈન રાઈડ-બુકિંગ એપ્લિકેશનો સામે અમદાવાદ રિક્ષાચાલક એકતા સહિતના વિવિધ રિક્ષા-ટેક્સી સંગઠનોએ ‘રોજગાર બચાવો’ આંદોલન શરૂ કર્યું છે. પડતર પ્રશ્નોનું નિરાકરણ ન આવ્યાનો આક્ષેપ કરી સંગઠનોએ 7 સપ્ટેમ્બરથી 10 સપ્ટેમ્બર સુધી ચાર દિવસના સંપૂર્ણ બંધનું એલાન આપ્યું છે. જોકે, અમદાવાદના કેટલાક વિસ્તારોમાં રિક્ષા અને ટેક્સી સેવા ચાલુ રહેતા હડતાળને પ્રથમ દિવસે મિશ્ર પ્રતિસાદ મળ્યો છે.
અમદાવાદમાં રિક્ષા હડતાળ, અનેક વિસ્તારોમાં સેવા ચાલુ
યુનિયનના દાવા મુજબ હડતાળમાં રાજ્યભરમાંથી 3 લાખ રિક્ષા અને 70 હજાર ટેક્સી ચાલકો જોડાવાના છે. હડતાળ શરૂ થતાં જ યુનિયનના કાર્યકરો વિવિધ વિસ્તારોમાં રસ્તા પર ઉતર્યા હતા અને અન્ય રિક્ષાચાલકોને બંધમાં જોડાવા માટે અપીલ કરી હતી. રાણીપ બસ સ્ટેશન પાસે એક રિક્ષાચાલક લાકડી સાથે પહોંચ્યો હોવાના અને મુસાફરોને અધવચ્ચે ઉતારી દેવાના આક્ષેપ બાદ વિવાદ સર્જાયો હતો. ઘટનાની જાણ થતાં પોલીસ પણ સ્થળ પર પહોંચી હતી. આ ઘટનાને કારણે રિક્ષા હડતાળ દરમિયાન મુસાફરોની સુરક્ષા અને વ્યવસ્થાને લઈને પણ સવાલો ઊભા થયા છે.
‘ચાર દિવસ બંધ રહેશે તો મુસાફરોને ભારે મુશ્કેલી’
અધવચ્ચે રિક્ષામાંથી ઉતારી દેવાયેલા એક મુસાફરે પોતાની મુશ્કેલી વ્યક્ત કરતાં જણાવ્યું હતું કે રિક્ષા સેવા લાંબા સમય સુધી બંધ રહેશે તો નોકરી-ધંધા માટે સમયસર પહોંચવામાં મુશ્કેલી પડી શકે છે. મુસાફરે મોંઘવારી અને ઓછી આવકનો મુદ્દો પણ ઉઠાવ્યો હતો. તેમના જણાવ્યા મુજબ ઓછા પગારમાંથી રિક્ષાનું ભાડું અને અન્ય ખર્ચ કાઢ્યા બાદ પરિવાર માટે બહુ ઓછી રકમ બચે છે.
ઓલા-ઉબેર-રેપિડો સામે રિક્ષાચાલકોની મુખ્ય ફરિયાદ શું?
રિક્ષા-ટેક્સી યુનિયનોનો આક્ષેપ છે કે ઓનલાઈન એપ્લિકેશન આધારિત રાઈડ સેવાઓ અને ખાસ કરીને ટુ-વ્હીલર ટેક્સી સેવાઓને કારણે પરંપરાગત રિક્ષા-ટેક્સી ચાલકોના રોજગાર પર અસર પડી રહી છે. યુનિયનોનું કહેવું છે કે સરકાર દ્વારા નક્કી કરાયેલા ભાડા અને ઓનલાઈન પ્લેટફોર્મ પર મળતા ભાડામાં તફાવત રહે છે. રિક્ષાચાલકોના જણાવ્યા મુજબ પૂરતું ભાડું ન મળતું હોવા છતાં CNG સહિતના સંચાલન ખર્ચમાં વધારો થઈ રહ્યો છે. આવી સ્થિતિમાં રિક્ષા ચલાવીને પરિવારનું ગુજરાન ચલાવવું મુશ્કેલ બની રહ્યું છે.
સરકાર પાસે રિક્ષા-ટેક્સી ચાલકોની શું માંગ?
યુનિયનોની મુખ્ય માંગ છે કે ઓનલાઈન પ્લેટફોર્મ પર ચાલતી ગેરકાયદેસર હોવાનો તેઓ દાવો કરે છે તેવી ટુ-વ્હીલર ટેક્સી સેવાઓ સામે કાર્યવાહી કરવામાં આવે અને સરકારના નિયત ધારાધોરણ મુજબ વાજબી ભાડું નક્કી કરવામાં આવે. આ મુદ્દે 27 ઓગસ્ટે ગાંધીનગરમાં ટ્રાન્સપોર્ટ કમિશનરને આવેદનપત્ર આપવામાં આવ્યું હતું. ત્યારબાદ 28 ઓગસ્ટથી રિક્ષાઓ પાછળ વિરોધના પોસ્ટર્સ લગાવીને આંદોલન શરૂ કરવામાં આવ્યું હતું. સકારાત્મક પ્રતિસાદ ન મળ્યો હોવાનો યુનિયનોનો આક્ષેપ છે, જેના પગલે હવે ચાર દિવસના રિક્ષા-ટેક્સી બંધનું એલાન કરવામાં આવ્યું છે.
સ્કૂલ રિક્ષા અને સ્કૂલવાનને હડતાળમાંથી મુક્તિ
વિદ્યાર્થીઓના અભ્યાસ અને સુરક્ષાને ધ્યાનમાં રાખીને સ્કૂલ રિક્ષા અને સ્કૂલવાનને આ બંધમાંથી મુક્ત રાખવામાં આવ્યા છે. એટલે બાળકોને ઘરેથી શાળાએ પહોંચાડતી નિયમિત સ્કૂલ વાહન સેવા ચાલુ રહેશે. હવે અમદાવાદ રિક્ષા હડતાળ આગામી ચાર દિવસમાં કેટલી અસરકારક રહે છે અને રિક્ષા-ટેક્સી ચાલકોની માંગણીઓ અંગે સરકાર શું નિર્ણય લે છે તેના પર નજર છે.
