અમદાવાદ: કોમનવેલ્થ ગેમ્સ 2030નું સત્તાવાર યજમાન

ભારતને કોમનવેલ્થ ગેમ્સ 2030ની યજમાની કરવાનો મોટો અવસર મળ્યો છે. સ્કોટલેન્ડના ગ્લાસગો ખાતે યોજાયેલી કોમનવેલ્થ સ્પોર્ટ જનરલ એસેમ્બલીમાં 74 સભ્ય દેશો અને પ્રદેશોના પ્રતિનિધિઓએ ભારતની બિડને મંજૂરી આપી દીધી છે.

આ સાથે જ, ગુજરાતનું આપણું અમદાવાદ શહેર સત્તાવાર રીતે 2030માં યોજાનારી કોમનવેલ્થ ગેમ્સની 100મી વર્ષગાંઠની સ્પર્ધાનું યજમાન શહેર બની ગયું છે. દિલ્હીમાં ૨૦૧૦ માં CWG યોજાયા બાદ ભારતમાં આ પ્રથમ વૈશ્વિક રમતગમત કાર્યક્રમ હશે.

અમદાવાદનું વિઝન અને સાંસ્કૃતિક ઝલક

ભારતે 2030ની ગેમ્સ માટે પોતાનું વિઝન રજૂ કર્યું, જેમાં અમદાવાદને એક આધુનિક અને સાંસ્કૃતિક રીતે સમૃદ્ધ શહેર તરીકે દર્શાવવામાં આવ્યું, જે યાદગાર સ્પર્ધાનું આયોજન કરવા સક્ષમ છે. આ જાહેરાત બાદ જનરલ એસેમ્બલી હોલ ભારતીય સંસ્કૃતિના રંગોથી ઝળહળી ઉઠ્યો હતો, જ્યાં 20 ગરબા ડાન્સરો અને 30 ભારતીય ઢોલ વગાડનારાઓએ ગુજરાતની સંસ્કૃતિની ઝલક રજૂ કરી હતી.

કોમનવેલ્થ સ્પોર્ટના પ્રમુખ ડૉ. ડોનાલ્ડ રુકારે જણાવ્યું કે, "આ કોમનવેલ્થ સ્પોર્ટ માટે એક નવા સુવર્ણ યુગની શરૂઆત છે. ભારત (અમદાવાદ 2030) સ્કેલ, યુવાશક્તિ, મહત્વાકાંક્ષા, સમૃદ્ધ સંસ્કૃતિ અને રમતગમતનો જબરદસ્ત જુસ્સો લાવશે."

15થી 17 સ્પોર્ટ્સનો સમાવેશ

અમદાવાદ 2030ની કોમનવેલ્થ ગેમ્સમાં 15થી 17 સ્પોર્ટ્સ ડિસિપ્લિનનો સમાવેશ થવાની સંભાવના છે. આ માટેની વિગતોને અંતિમ સ્વરૂપ આપવાની પ્રક્રિયા આવતા મહિનાથી શરૂ થશે.

વિચારણા હેઠળના મુખ્ય સ્પોર્ટ્સમાં આર્ચરી, બેડમિન્ટન, 3x3 બાસ્કેટબોલ, બીચ વોલીબોલ, T20 ક્રિકેટ, સાઇકલિંગ, હોકી, જુડો, શૂટિંગ, સ્ક્વોશ, ટ્રાયથલોન અને રેસલિંગનો સમાવેશ થાય છે. યજમાન શહેર તરીકે અમદાવાદને બે નવી અથવા પરંપરાગત રમતોનો પ્રસ્તાવ મૂકવાની પણ છૂટ મળશે.

કોમનવેલ્થ ગેમ્સ એસોસિયેશન ઓફ ઈન્ડિયાના પ્રમુખ ડૉ. પી.ટી. ઉષાએ કોમનવેલ્થ સ્પોર્ટ દ્વારા ભારતમાં મૂકાયેલા વિશ્વાસ બદલ આભાર વ્યક્ત કર્યો હતો. કેન્દ્ર સરકાર, ખાસ કરીને વડા પ્રધાન નરેન્દ્ર મોદીના નેતૃત્વમાં, ભારતમાં વૈશ્વિક રમતગમત ટુર્નામેન્ટ્સ લાવવા પર ભાર મૂકવામાં આવ્યો છે.