Ahmedabad News: શહેરના મેમ્કો વિસ્તારમાં આવેલી જાણીતી લુબી કંપનીમાં આજે વહેલી સવારથી જ ભારે અફરાતફરીનો માહોલ જોવા મળ્યો હતો. કંપનીના 500થી પણ વધારે કર્મચારીઓ પગાર વધારા અને ઓવરટાઇમના પ્રશ્નોને લઈને અચાનક હડતાળ પર ઉતરી જતાં પ્રોડક્શનની કામગીરી ખોરવાઈ ગઈ હતી. આ આંદોલન દરમિયાન કંપનીના દરવાજા બંધ કરી દેવાતા તણાવભરી સ્થિતિ સર્જાઈ હતી, જોકે કલાકોની મથામણ બાદ મેનેજમેન્ટ સાથેની વાતચીત સફળ રહેતા હડતાળ સમેટાઈ હતી.
8 મુદ્દાની માંગણીઓ સાથે સૂત્રોચ્ચાર હડતાળ પર ઉતરેલા કામદારોનો મુખ્ય આક્ષેપ છે કે સરકારના નક્કી કરેલા ધારા-ધોરણ મુજબ તેમને વેતન આપવામાં આવતું નથી. કર્મચારીઓએ પગાર વધારો, ઓવરટાઇમનું વળતર અને કામ કરવાની પરિસ્થિતિ સહિત કુલ 8 જેટલી મુખ્ય માંગણીઓ રજૂ કરી હતી. સૂત્રોના જણાવ્યા અનુસાર, કર્મચારીઓએ અગાઉ પણ મેનેજમેન્ટને આ બાબતે મૌખિક અને લેખિત રજૂઆતો કરી હતી, પરંતુ લાંબા સમય સુધી કોઈ સકારાત્મક નિર્ણય ન લેવાતા આખરે કર્મચારીઓમાં રોષ ફાટી નીકળ્યો હતો.
કંપનીના દરવાજા બંધ કરાતા કર્મચારીઓ અટવાયા હડતાળ શરૂ થતા જ કંપનીના સત્તાધીશો દ્વારા મુખ્ય દરવાજા બંધ કરી દેવામાં આવ્યા હતા, જેના કારણે પરિસરમાં હાજર કર્મચારીઓ બહાર નીકળી શક્યા નહોતા. આ ઘટનાને પગલે કર્મચારીઓમાં આક્રોશ વધુ જોવા મળ્યો હતો. કામદારોએ એકસૂરે જણાવ્યું હતું કે મોંઘવારીના આ સમયમાં અત્યારનો પગાર પૂરતો નથી અને કંપની તેમની મહેનત સામે યોગ્ય વેતન આપવામાં વિલંબ કરી રહી છે.
મેનેજમેન્ટની મધ્યસ્થી અને સમાધાન પરિસ્થિતિ ગંભીર બનતી જોઈ કંપનીના પ્રોડક્શન મેનેજર અને જનરલ મેનેજર તાત્કાલિક કર્મચારીઓ પાસે પહોંચ્યા હતા. કર્મચારી યુનિયનના પ્રતિનિધિઓએ પોતાની તમામ માંગણીઓ લેખિતમાં મેનેજમેન્ટ સમક્ષ રજૂ કરી હતી. મેનેજમેન્ટ દ્વારા તમામ મુદ્દાઓ પર ગંભીરતાથી વિચારણા કરવાની અને ટૂંક સમયમાં યોગ્ય ન્યાય આપવાની લેખિત તેમજ મૌખિક બાહેંધરી આપવામાં આવી હતી.
મેનેજમેન્ટ તરફથી મળેલી ખાતરી બાદ કર્મચારીઓનો ગુસ્સો શાંત પડ્યો મેનેજમેન્ટ તરફથી મળેલી આ ખાતરી બાદ કર્મચારીઓનો ગુસ્સો શાંત પડ્યો હતો અને તમામ કામદારો ફરીથી પોતપોતાની ફરજ પર જોડાઈ ગયા હતા. ઉલ્લેખનીય છે કે ઔદ્યોગિક વિસ્તારમાં આટલી મોટી સંખ્યામાં કર્મચારીઓ દ્વારા કરવામાં આવેલી હડતાળને પગલે અન્ય કંપનીઓમાં પણ ચર્ચાનો વિષય બન્યો હતો. હાલ પૂરતી હડતાળ સમેટાઈ ગઈ છે, પરંતુ આગામી દિવસોમાં મેનેજમેન્ટ શું નિર્ણય લે છે તેના પર સૌની નજર ટકેલી છે.

લુબી કંપનીમાં 500 કર્મચારીઓની હડતાળ

મેનેજમેન્ટની બાહેંધરી બાદ મામલો થાળે પડ્યો

May 6, 2026 | 15:58 IST