60ની વયે પહોંચેલા દંપતીના છૂટાછેડા!

ગુજરાત હાઇકોર્ટમાં અમદાવાદ ફેમિલી કોર્ટના હુકમથી નારાજ પતિ હાઈકોર્ટ પહોંચ્યો હતો. તેને વર્ષ 2003માં અમદાવાદ ફેમિલી કોર્ટમાં કરેલ છૂટાછેડાની અરજી કરી હતી. જેને નકારી દેવામાં આવી હતી. પતિ પત્નીના લગ્ન વર્ષ 1982માં થયા હતા. જેમાં વર્ષ 1984માં તેમને ત્યાં બાળકનો જન્મ પણ થયો હતો. તેઓ 01 વર્ષ જેટલો સમય શાંતિપૂર્વક રહ્યા હતા. પરંતુ પતિના કહ્યા મુજબ તેની પત્નીને તેના પિયરમાંથી ચઢામણી કરવામાં આવતા તે પતિ પાસે સતત પૈસા માંગતી હતી. જો પતિ પૈસા ના આપે તો તે ઝઘડો કરતી હતી. બાદમાં અચાનક કંઇ પણ કહ્યા વગર પત્ની પતિનું ઘર છોડીને પિયર જતી રહી હતી.

 1987માં તેણે પતિ ઉપર ભરણપોષણનો કેસ કર્યો હતો. તે કેસને પડતો મૂકીને ફરી પતિ સાથે રહેવા આવી હતી. ત્યારબાદ પતિ ઉપર 498A ઘરેલુ હિંસાની ફરિયાદ કરી હતી. જો કે પત્નીના માતાનું નિધન થતા તે પિયરિયે ચાલી ગઈ હતી, પછી પરત સાસરિયે ફરી નહોતી. 1999 માં પતિએ પત્ની સામે લગ્ન હકક માટે લીગલ નોટિસ મોકલી હતી. વર્ષ 2000માં ફરી નોટિસ આપી હતી. જો કે પત્ની પરત ના આવતા છૂટાછેડા માટે અમદાવાદ ફેમિલી કોર્ટમાં કેસ દાખલ કર્યો હતો. 2008 માં ફેમિલી કોર્ટ ચુકાદો આપતાં પતિની છૂટાછેડાની અરજી નકારી નાખી હતી.

 ફેમિલી કોર્ટ બહાર પત્નીના પિયરીયાઓએ પતિને માર માર્યાની પણ કોર્ટમાં રજૂઆત કરવામાં આવી હતી. જેમાં પતિને VS હોસ્પિટલમાં સારવાર આપીને ફોજદારી કેસ કરવામાં આવ્યો હતો. બંને 20 વર્ષ કરતા વધુ સમયથી અલગ અલગ રહે છે. બંને વચ્ચે ભેગા થવાના કોઈ ચાન્સ ના હોવાનું પતિના વકીલે કોર્ટને જણાવ્યું હતું. બંનેનો પુત્ર પણ 40 વર્ષનો થવા આવ્યો અને તેણે પણ પરિવાર હોવાનું કોર્ટને જણાવાયુ હતું.

પત્નીના વકીલે હાઇકોર્ટમાં રજૂઆત કરી હતી કે, પત્ની દ્વારા અત્યાચાર આચરવામાં આવ્યો હોય તેવું સાબિત કરવામાં પતિ નિષ્ફળ રહ્યો છે. તેને દર મહિને 04 હજાર રૂપિયા પત્નીને ભરણ પોષણ તરીકે આપવા ફેમિલી કોર્ટે હુકમ કર્યો હતો. પરંતુ પત્નીએ 498A અંતર્ગત કેસનો સામનો ના કરવો પડે એટલે સમાધાન કરી લીધું હતું. હાઇકોર્ટે ફેમિલી કોર્ટના હુકમને રદ્દ કરતા નોધ્યું હતું કે પત્નીએ ફેમિલી કોર્ટમાં વિટનેસ બોક્સમાં ક્રોસ એક્ઝામિનેશન માટે ઉપસ્થિત રહી નથી, એટલે કે તેના ઉપર લાગેલા આક્ષેપો સાચા હોવાનું તેને સ્વીકાર્યું છે.  બંનેની ઉંમર 60 વર્ષથી વધુ છે, ત્યારે બાકીનું જીવન બંનેએ શાંતિથી પસાર કરવું જોઈએ. બંનેના જીવનનો મોટો સમય બગડ્યો છે.