રાજકોટ મંદિરમાંથી 52 જીવતા સાપ મળ્યા: મહંતની ધરપકડ

રાજકોટના ગ્રીનલેન્ડ ચોકડી વિસ્તારમાં આવેલા ખેતલા આપા મંદિરમાંથી વન વિભાગે હાથ ધરેલી તપાસમાં ૫૨ જેટલા જીવતા સાપ મળી આવતા મોટો ખળભળાટ મચી ગયો છે. ફોરેસ્ટ વિભાગે વન્યજીવ સંરક્ષણ અધિનિયમનું ઉલ્લંઘન કરવા બદલ મંદિરના મહંત મનુ મણીરામ દુધરેજીયાની તાત્કાલિક ધરપકડ કરી છે.

તપાસમાં બહાર આવ્યું કે મંદિરમાં 100થી વધુ સાપો રાખવામાં આવ્યા હતા. મળી આવેલા સાપોમાં મુખ્યત્વે કોમન સેન્ડ ભુવા પ્રજાતિના સાપનો સમાવેશ થાય છે. આ પ્રજાતિના સાપો વાઈલ્ડ લાઈફ પ્રોટેક્શન એક્ટના શિડયુલ-2 હેઠળ આવે છે, જેને સંગ્રહ કરીને રાખવો એ ગંભીર ગુનો છે અને તેના માટે 6 મહિનાની સજાની જોગવાઈ છે.

મહંતનો 'નાગનું ઘર' તરીકે પ્રચાર

મંદિરના મહંત મનુ દુધરેજીયા પોતે જ આ મંદિરનો 'નાગદેવતાનું મંદિર' કહીને પ્રચાર કરતા હતા. તેઓ સોશિયલ મીડિયામાં પણ આ સ્થળને 'નાગનું ઘર' કહીને વીડિયો મૂકતા હતા. શ્રદ્ધાળુઓ અહીં મોટી સંખ્યામાં દર્શન માટે આવતા હતા અને મહંત તેમને સાપના દર્શન પણ કરાવતા હતા. મહંતે દાવો કર્યો હતો કે આ સાપો તેમના કુળદેવતા છે અને તેઓ કોઈને નુકસાન પહોંચાડતા નથી.

જોકે, જંગલી પ્રાણીઓને પરવાનગી વગર આ રીતે સંગ્રહ કરી રાખવો એ કાયદાનું ઉલ્લંઘન છે. વન વિભાગની તપાસમાં હાલમાં કોઈ તસ્કરીની પ્રવૃત્તિ સામે આવી નથી, પરંતુ જંગલી પ્રાણીઓને બિનકાયદેસર રીતે રાખવા બદલ કાર્યવાહી કરવામાં આવી છે.

વન વિભાગે તમામ 52 સાપોને સુરક્ષિત રીતે અન્ય સેન્ટરમાં ટ્રાન્સફર કર્યા છે. આ ઘટનાને પગલે વન વિભાગ હવે આગામી દિવસોમાં રાજ્યના અન્ય એવા મંદિરો અથવા સ્થળો જ્યાં આ પ્રકારે વન્યજીવોનો ગેરકાયદેસર સંગ્રહ કરવામાં આવતો હોય ત્યાં પણ તપાસ હાથ ધરશે. કાયદાનું ઉલ્લંઘન કરનાર સામે કડક કાર્યવાહી કરવામાં આવશે, તેવો સ્પષ્ટ સંકેત મળી રહ્યો છે.