અમદાવાદમાં 8.70 કરોડની એમ્બરગ્રીસ સાથે 4 શખ્સ ઝડપા

અમદાવાદ પોલીસ કમિશ્નર અને ઉચ્ચ અધિકારીઓના માર્ગદર્શન હેઠળ પોલીસે ગેરકાયદે પ્રવૃત્તિઓ શોધી કાઢવાની સૂચના અન્વયે એક મોટી સફળતા મેળવી છે. ઝોન-7 લોકલ ક્રાઈમ બ્રાન્ચના સ્ટાફે ખાનગી બાતમીના આધારે સરખેજ-મકરબા ટોરેન્ટ પાવર રોડ પર આવેલા સત્યદીપ હાઇટ્સ પાસેથી 4 ઈસમોને 8.70 કરોડની કિંમતની એમ્બરગ્રીસના જથ્થા સાથે ઝડપી પાડ્યા છે. પકડાયેલા 4 શખ્સોમાં રિંકુ રાજપૂત, શશાંક પાંડે, એજેક્સ વ્યાસ અને જતીન પાટીલનો સમાવેશ થાય છે. પોલીસે તેમની પાસેથી કુલ 8 કિલો અને 704 ગ્રામ એમ્બરગ્રીસ જપ્ત કરી છે, જેની આશરે બજાર કિંમત પ્રતિ કિલો 1 કરોડ લેખે 8 કરોડ 70 લાખ 40 હજાર થાય છે.

એમ્બરગ્રીસનો ગેરકાયદે વેપાર

આ ચારેય આરોપીઓએ સુરતના બિપિન સોલંકી નામના શખ્સ પાસેથી આ એમ્બરગ્રીસનો દુર્લભ જથ્થો મંગાવ્યો હતો. બિપિન સોલંકીએ તેમને વેચાણ માટે ગ્રાહક ગોતવાની કામગીરી સોંપી હતી. આરોપીઓ આ એમ્બરગ્રીસના જથ્થાને ગેરકાયદે વેચાણ કરવા જતા હતા તે દરમિયાન તેઓ પોલીસના હાથે ઝડપાઈ ગયા હતા. પોલીસે તેમની પાસેથી માત્ર એમ્બરગ્રીસ જ નહિ, પરંતુ કાર અને 45 હજારની કિંમતના 6 મોબાઈલ ફોન સહિત કુલ 8,76,85,000નો મુદ્દામાલ જપ્ત કર્યો છે.

દુર્લભ એમ્બરગ્રીસનું મહત્વ અને ઉપયોગ

એમ્બરગ્રીસ એ વ્હેલ માછલીની ઉલ્ટીમાંથી બનતો એક દુર્લભ પદાર્થ છે અને તેની બજાર કિંમત ખૂબ જ ઊંચી હોય છે, જે પ્રતિ કિલો 1 કરોડની આસપાસ હોય છે. આ એમ્બરગ્રીસનો ઉપયોગ મુખ્યત્વે પરફ્યુમ ઉદ્યોગમાં સુગંધને લાંબા સમય સુધી ટકાવી રાખવા માટે કરવામાં આવે છે. આ ઉપરાંત, પરંપરાગત રીતે તેનો ઉપયોગ શારીરિક ક્ષમતા વધારવા, દવા તરીકે અને અન્ય ઉચ્ચ-મૂલ્યની વસ્તુઓ બનાવવા માટે પણ થતો આવ્યો છે. સ્પર્મ વ્હેલ એક સંરક્ષિત દરિયાઈ પ્રજાતિ હોવાથી, એમ્બરગ્રીસનો વેપાર ભારતમાં વન્યજીવ સંરક્ષણ કાયદા હેઠળ ગેરકાયદે માનવામાં આવે છે. પોલીસે આ સમગ્ર મામલે ગુનો નોંધીને આગળની ગેરકાયદે પ્રવૃત્તિઓ અંગે વધુ કાર્યવાહી હાથ ધરી છે.