વડોદરાના અકોટામાં પડ્યો 21 મો ભૂવો, સામાજિક કાર્યકરે આરતી કરી નોંધાવ્યો અનોખો વિરોધ

વડોદરા શહેરના અકોટા વિસ્તારમાં રસ્તાઓ પર પડતાં ભૂવાઓનું સિલસિલો હજુ સુધી અટક્યો નથી. તાજેતરમાં અકોટાના મુજમહુડા રોડ પર 21મો ભૂવો જોવા મળ્યો છે. ભૂવા પડવાના વિરોધમાં એક સ્થાનિક સામાજિક કાર્યકરે અનોખો વિરોધ નોંધાવ્યો છે - તેણે ભૂવાની આરતી ઉતારી અને શ્રીફળ પણ વધેર્યું છે.

અકોટામાં ભૂવો પડવો ફરજિયાત

સામાજિક કાર્યકરે જણાવ્યું કે, "વડોદરાના બીજાં વિસ્તારમાં ભૂવો પડે કે નહીં, પરંતુ અકોટામાં ભૂવો પડવો ફરજિયાત બની ગયો છે." ઉલ્લેખનીય છે કે, છેલ્લા વર્ષના ચોમાસા દરમિયાન અકોટાના મુજમહુડા વિસ્તારમાં ભારે ભૂવા પડ્યા હતા, જેના કારણે લોકોને ભારે મુશ્કેલીઓનો સામનો કરવો પડ્યો હતો.

30 વર્ષ જૂની ડ્રેનેજ લાઇન બની કારણ

ગયા વર્ષે વડોદરામાં પૂરની સ્થિતી સર્જાતા, ઘણા વિસ્તારોમાં પાણી ફરી વળ્યાં હતા. તેમાં પણ મુજમહુડામાંથી પસાર થતી 30 વર્ષ જૂની ડ્રેનેજ લાઇન જર્જરિત થઇ જતા અકોટા-મુજમહુડામાં 20થી વધુ ભૂવા પડ્યા હતા. તેમ છતાં, તાજેતરમાં 21મો ભૂવો પડતા ફરીથી લોકોમાં રોષ વ્યાપી રહ્યો છે. અહેવાલ મુજબ, આ ભૂવોનું સમારકામ કરવા તંત્રે રૂપિયા 2 કરોડથી વધુનો ખર્ચ કર્યો હતો, છતાં ભૂવો પડવાનું યથાવત છે.

મુજમહુડાથી પસાર થતી લાઇનના CRP રિહેબીલીટેશન કાર્યનો ખર્ચ અંદાજે રૂપિયા 78 કરોડ બતાવવામાં આવ્યો છે. હવે જોવાનું એ છે કે, આ કામગીરી બાદ ભૂવાઓની સમસ્યા કાયમી રીતે ઉકેલાય છે કે નહિ.