Operation Sindoor : ગાંધીનગરમાં 1, 11,111 સિંદૂરના વૃક્ષો રોપાશે

ગાંધીનગર મહાનગરપાલિકા દ્વારા ‘ઓપરેશન સિંદૂર’ના નવા અધ્યાયની શરૂઆત સાથે શહેરને ‘ગ્રીન કેપિટલ’ બનાવવાનો સંકલ્પ જાહેર થયો છે. આ અભિયાન હેઠળ આવતા ચોમાસામાં ૧,૧૧,૧૧૧ સિંદૂરના ઝાડો, તેમજ પીપળ, વડ અને ઉમરાનું સમાન પ્રમાણમાં વાવેતર કરીને કુલ ૧૦ લાખથી વધુ વૃક્ષો રોપવાનો મેસેજ આપ્યો છે.

મહાનગરપાલિકાના સ્ટેન્ડિંગ કમિટીના ચેરમેન ગૌરાંગ વ્યાસે જણાવ્યું હતું કે, ઓપરેશન સિંદૂર માત્ર વૃક્ષારોપણ અભિયાન નથી, પણ દેશભક્તિ, પર્યાવરણ સંરક્ષણ અને આધ્યાત્મિક શક્તિના સંદેશ સાથે સંકળાયેલ એક હોલિસ્ટિક મૂવમેન્ટ છે. અભિયાનને વર્લ્ડ બુક ઓફ રેકોર્ડ્સમાં સ્થાન મળે તે માટે આયોજન પણ હાથ ધરાયું છે.

ઓપરેશન સિંદૂરના મૂળમાં ભારતીય સેનાના અસામાન્ય શૌર્યને સ્મરણરૂપ બનાવવાનો સંદેશ છુપાયેલો છે. શહેરના વિવિધ વિસ્તારોમાં શૌર્યની યાદગાર તરીકે વૃક્ષારોપણ દ્વારા કાયમી સ્મૃતિ ઊભી કરવાનો મહાનગરપાલિકાનો અભિપ્રાય છે. વડાપ્રધાન નરેન્દ્ર મોદી પણ ઓપરેશન સિંદૂરની સફળતા બાદ ગાંધીનગર આવ્યા ત્યારે જણાવ્યું હતું કે, “આ અભિયાન હવે સૈન્યબળથી આગળ વધીને જનબળથી આગળ વધશે.”

સિંદૂરના ઝાડ (૧,૧૧,૧૧૧): ભારતીય સંસ્કૃતિમાં પુણ્યપ્રદ અને શક્તિપ્રદ માનીતી જાતિ, આધ્યાત્મિક ઊર્જાનું પ્રતિબિંબ.
પીપળના ઝાડ (૧,૧૧,૧૧૧): પ્રાચીન કાળથી જીવનદાયી ઓક્સિજન આપવા માટે ઓળખાતા, ધાર્મિક અને આયુર્વેદિક રીતે મહત્વપૂર્ણ છે.

વડના ઝાડ (૧,૧૧,૧૧૧): ભારતનું રાષ્ટ્રવૃક્ષ સમાન, ઔષધીય ગુણો ધરાવતું અને ઇકો સિસ્ટમ માટે આધારભૂત છે તો ઉમરાના ઝાડ (૧,૧૧,૧૧૧): વિશાળ છાંયડો આપનાર અને ગુજરાતના સંસ્કૃતિક વારસાનો ભાગ છે. આ ઉપરાંત મહોગની, બોરસલી, રેઇન ટ્રી, કદમ, ટર્મેલીયા જેવા અનેક મોંઘા અને ઉપયોગી વૃક્ષોની પણ રોપણી થશે.

આ સમગ્ર કાર્યક્રમ માટે ૨૦૨૪ના ચોમાસા દરમિયાન વિસ્તૃત આયોજન કરવામાં આવ્યું છે. શાળા, કોલેજો, રેસિડેન્સી, રીંગ રોડ અને અન્ય જાહેર સ્થળોએ વૃક્ષારોપણ થવાનું છે. આ સમગ્ર અભિયાનને લોકભાગીદારીથી રાષ્ટ્રીય સ્તરે રોલ મોડેલ બનાવવાનો મહાનગરપાલિકાનો દ્રઢ સંકલ્પ છે.

: “ઓપરેશન સિંદૂર”ના ખાસ રોપાઓ

સિંદૂર – આધ્યાત્મિક શક્તિ
પીપળ – ઓક્સિજન-ફ્રેન્ડલી
વડ – આયુર્વેદિક ઔષધિ અને ઈકો સિસ્ટમ
ઉમરો – છાંયડો અને પરંપરા
અન્ય – મહોગની, બોરસલી, રેઇન ટ્રી, ટર્મેલીયા, કદમ વગેરે