ગુજરાતના હાઇવેઝ માટે ₹20,000 કરોડ મંજૂર!

કેન્દ્રીય માર્ગ, પરિવહન અને રાજમાર્ગ મંત્રી નીતિન ગડકરીએ ગુજરાતના માળખાકીય વિકાસને વેગ આપત સમાચાર જાહેર કર્યા છે. તેમણે જાહેરાત કરી છે કે નેશનલ હાઈવે ઓથોરિટી ઓફ ઈન્ડિયા (NHAI) હેઠળ ગુજરાત રાજ્ય માટે ₹20,000 કરોડના પ્રોજેક્ટ્સને મંજૂરી આપવામાં આવી છે.

ગાંધીનગરમાં કેન્દ્રીય મંત્રી ગડકરી અને ગુજરાતના મુખ્યમંત્રી ભૂપેન્દ્ર પટેલ વચ્ચે NHAIના વરિષ્ઠ અધિકારીઓ સાથે ઉચ્ચ સ્તરીય સમીક્ષા બેઠક યોજાઈ હતી. આ બેઠકનો મુખ્ય સંદેશ સ્પષ્ટ હતો: ગુજરાતભરમાં માર્ગની ગુણવત્તા સાથે કોઈ સમાધાન ચલાવી લેવાશે નહીં.

ગુણવત્તામાં બેદરકારી નહીં

મંત્રી નીતિન ગડકરીએ સ્પષ્ટપણે જણાવ્યું કે, જો રાષ્ટ્રીય ધોરીમાર્ગોના નિર્માણ, જાળવણી અથવા રિ-સરફેસિંગમાં કોઈ પણ પ્રકારની બેદરકારી જોવા મળશે, તો કોન્ટ્રાક્ટરો અને NHAI અધિકારીઓ સામે કડક પગલાં લેવામાં આવશે. મંત્રીઓએ ભારપૂર્વક જનતાની સુવિધા અને સલામતી સર્વોચ્ચ પ્રાથમિકતાની વાત કરી હતી. 

ગડકરીએ NHAIની ટીમોને નિર્દેશ આપ્યા છે કે તમામ ચાલુ પ્રોજેક્ટ્સ નિર્ધારિત સમયમર્યાદામાં પૂર્ણ થાય, જેથી મુખ્ય કોરિડોર પર સરળ અને કાર્યક્ષમ માર્ગ જોડાણ સુનિશ્ચિત થઈ શકે.     

મુખ્યમંત્રી ભૂપેન્દ્ર પટેલે બેઠકમાં જણાવ્યું હતું કે ગુજરાતના રાષ્ટ્રીય ધોરીમાર્ગો રાજ્યના કુલ ટ્રાફિક ભારણનો 35ટકાથી વધુ ભાર વહન કરે છે, જેના કારણે નિયમિત જાળવણી અને વિસ્તરણની સતત જરૂરિયાત રહે છે. ઉપરાંત તેમણે અમદાવાદથી મુંબઈ, રાજકોટથી ગોંડલથી જેતપુર, અને અમદાવાદથી ઉદયપુર જેવા મહત્ત્વના માર્ગો પર કામગીરી ઝડપી બનાવવા પર ભાર મૂક્યો હતો.

ગુજરાત ભારતના સૌથી વ્યાપક અને સારી રીતે જાળવવામાં આવેલા હાઇવે નેટવર્ક્સમાંનું એક ધરાવે છે, જે દિલ્હી-મુંબઈ ઇન્ડસ્ટ્રિયલ કોરિડોર અને કંડલા, મુંદ્રા જેવા મુખ્ય બંદરોને અમદાવાદ, વડોદરા, સુરત જેવા ઔદ્યોગિક કેન્દ્રો સાથે જોડે છે, જે દેશના આર્થિક વિકાસ માટે મહત્ત્વપૂર્ણ છે.