ધુરંધર 2માં સલમાન ખાનની એન્ટ્રીનું સત્ય શું છે?

બોલિવૂડની મોસ્ટ અવેટેડ ફિલ્મ 'ધુરંધર 2' ના ટીઝરની આતુરતાથી રાહ જોવાઈ રહી છે, ત્યારે સોશિયલ મીડિયા પર એક ચોંકાવનારા સમાચારે ચાહકોમાં ઉત્તેજના વધારી દીધી છે. ઇન્ટરનેટ પર એક તસવીર તેજીથી વાયરલ થઈ રહી છે, જેમાં દાવો કરવામાં આવ્યો છે કે સુપરસ્ટાર સલમાન ખાન આ ફિલ્મમાં 'મોટા સાહેબ' નું મહત્વનું પાત્ર ભજવી રહ્યા છે.

શું સલમાન ખાન ખરેખર સેટ પર જોવા મળ્યા ? 

વાયરલ થયેલી તસવીરમાં સલમાન ખાન, સંજય દત્ત અને અર્જુન રામપાલ સાથે મુંબઈના સેટ પર શૂટિંગ કરતા જોવા મળે છે. પોસ્ટમાં એવો પણ દાવો કરવામાં આવ્યો છે કે હાઈ સિક્યોરિટી વચ્ચે ચાલી રહેલા શૂટિંગ દરમિયાન આ લોન્ગ ડિસ્ટન્સ ફોટો લેવામાં આવ્યો છે. આ સમાચાર વાયરલ થતા જ ફેન્સ માનવા લાગ્યા કે પહેલા ભાગમાં જે પાત્રનો વારંવાર ઉલ્લેખ થતો હતો, તે હવે સલમાન ખાન ભજવશે.

તસવીર પાછળનું અસલી સત્ય : 

જોકે, આ વાયરલ ફોટોનું સત્ય કંઈક અલગ જ છે. તપાસ કરતા જાણવા મળ્યું છે કે આ તસવીર અસલી નથી પરંતુ આર્ટિફિશિયલ ઈન્ટેલિજન્સ (AI) દ્વારા બનાવવામાં આવી છે. વાસ્તવમાં, થોડા સમય પહેલા મુંબઈના બેલાર્ડ એસ્ટેટ ખાતે સંજય દત્ત અને અર્જુન રામપાલના શૂટિંગના અસલી ફોટા વાયરલ થયા હતા. કોઈ ટેકનિકલ યુઝરે એ જ અસલી ફોટામાં AI નો ઉપયોગ કરીને સલમાન ખાનને ઉમેરી દીધા છે.

ટીઝરની આતુરતા વધી : 

જોકે આ ફોટો ફેક સાબિત થયો છે, પણ સલમાન ખાનની એન્ટ્રીની અફવાએ ફિલ્મ માટે જબરદસ્ત હાઈપ ઉભી કરી દીધી છે. 'ધુરંધર 2' ના મેકર્સે હજુ સુધી સલમાન ખાનની ફિલ્મમાં હાજરી અંગે કોઈ સત્તાવાર પુષ્ટિ કરી નથી. હવે જોવાનું એ રહેશે કે ટીઝર રિલીઝ થયા બાદ શું ખરેખર કોઈ મોટું સરપ્રાઈઝ ચાહકોને જોવા મળે છે કે નહીં.