તમિલ સુપરસ્ટાર થલાપતિ વિજય છેલ્લા ઘણા સમયથી તેમની આગામી ફિલ્મ "જાન નાયકન" ને લઈને ચર્ચામાં છે. આ ફિલ્મ તેના સર્ટિફિકેશન વિવાદને કારણે નિર્ધારિત સમયે રિલીઝ થઈ શકી નથી. વિજયના ચાહકો માટે આ ફિલ્મ ખૂબ જ ખાસ છે કારણ કે ચર્ચાઓ મુજબ આ તેમની છેલ્લી ફિલ્મ હોઈ શકે છે, જે બાદ તેઓ સક્રિય રાજકારણમાં ઝંપલાવશે.
નિર્માતાઓએ હાઈકોર્ટમાંથી અરજી પાછી ખેંચી :&nbsp;
ફિલ્મના નિર્માતાઓએ સેન્ટ્રલ બોર્ડ ઓફ ફિલ્મ સર્ટિફિકેશન (CBFC) વિરુદ્ધ મદ્રાસ હાઈકોર્ટમાં કરેલી અરજી પાછી ખેંચી લેવાનો મોટો નિર્ણય લીધો છે. હાઈકોર્ટના જસ્ટિસ પી.ટી. આશાએ ગુરુવારે આ અરજી પાછી ખેંચવાની મંજૂરી આપી દીધી છે. નિર્માતાઓના વકીલે કોર્ટને જાણ કરી હતી કે હવે તેઓ આ વિવાદને ઉકેલવા માટે CBFC ની રિવિઝન કમિટીનો સંપર્ક કરશે.
સેન્સર બોર્ડની મંજૂરીની રાહ :&nbsp;
9 જાન્યુઆરીએ રિલીઝ થનારી આ ફિલ્મ સેન્સરશીપના મુદ્દાઓમાં ફસાતા અટકી પડી હતી. હવે જ્યારે નિર્માતાઓએ કાયદાકીય લડાઈને બદલે રિવિઝન કમિટી દ્વારા માર્ગ શોધવાનું નક્કી કર્યું છે, ત્યારે ફિલ્મને વહેલી તકે લીલી ઝંડી મળવાની શક્યતા વધી ગઈ છે. સેન્સર બોર્ડની તપાસ બાદ જ ફિલ્મની નવી રિલીઝ ડેટ જાહેર કરવામાં આવશે.
ક્યારે રિલીઝ થશે 'જાન નાયકન' ?
થલાપતિ વિજયના ચાહકો આતુરતાથી આ ફિલ્મની રાહ જોઈ રહ્યા છે. ફિલ્મી ગલીઓમાં એવી અટકળો ચાલી રહી છે કે જો બધું બરાબર રહ્યું તો આ ફિલ્મ 20 ફેબ્રુઆરીએ સિનેમાઘરોમાં જોવા મળી શકે છે. જોકે, નિર્માતાઓ તરફથી હજુ સુધી કોઈ સત્તાવાર જાહેરાત કરવામાં આવી નથી. વિજયના રાજકીય પ્રવાસ પહેલાની આ અંતિમ ફિલ્મ હોવાથી બોક્સ ઓફિસ પર પણ તેની મોટી અસર જોવા મળી શકે છે.

વિવાદો વચ્ચે નિર્માતાઓએ હાઈકોર્ટમાંથી અરજી ખેંચી પરત, જાણો હવે ક્યારે રિલીઝ થશે આ ફિલ્મ

February 10, 2026 | 14:34 IST