શાહિદની 'ઓ રોમિયો'ને વેલેન્ટાઈન વિક ફળ્યું!!

બોલિવૂડના 'ચોકલેટ બોય'માંથી 'ગ્રીટી એક્ટર' બનેલા શાહિદ કપૂર અને દિગ્ગજ ડાયરેક્ટર વિશાલ ભારદ્વાજની જોડી જ્યારે પણ સાથે આવે છે, ત્યારે બોક્સ ઓફિસ પર ઈતિહાસ રચાય છે. તેમની તાજેતરની ફિલ્મ 'ઓ રોમિયો' (O Romeo) એ પ્રારંભિક બે દિવસમાં જ સાબિત કરી દીધું છે કે પ્રેક્ષકોને આ જોડીનો ડાર્ક અને રોમેન્ટિક અંદાજ ખૂબ પસંદ પડી રહ્યો છે.

વેલેન્ટાઈન ડે પર રેકોર્ડબ્રેક કમાણી

ફિલ્મે પ્રથમ દિવસે ₹9.01 કરોડની શાનદાર ઓપનિંગ કરી હતી. પરંતુ અસલી જાદુ બીજા દિવસે એટલે કે શનિવારે વેલેન્ટાઈન ડે પર જોવા મળ્યો હતો. ફિલ્મના કલેક્શનમાં અધધ 61%નો ઉછાળો જોવા મળ્યો અને બીજા દિવસે ફિલ્મે ₹14.5 કરોડનું નેટ કલેક્શન કર્યું છે. આ સાથે જ બે દિવસનું કુલ કલેક્શન ₹23.51 કરોડ (નેટ) પર પહોંચી ગયું છે.

બોલિવૂડના દિગ્ગજ રેકોર્ડ્સમાં સ્થાન

'ઓ રોમિયો' હવે વેલેન્ટાઈન ડે પર સૌથી વધુ કમાણી કરનારી બોલિવૂડ ફિલ્મોની યાદીમાં ચોથા ક્રમે આવી ગઈ છે. તેણે કાર્તિક આર્યનની 'લવ આજ કાલ' (₹12.4 કરોડ) ને પાછળ છોડી દીધી છે. આ યાદીમાં વિકી કૌશલની 'છાવા' હજુ પણ ટોચ પર છે.

શાહિદ-વિશાલનો અત્યાર સુધીનો સફર આ જોડીની સફળતાનો ઈતિહાસ જૂનો અને જાણીતો છે:

• કમીને (2009): પ્રથમ સહયોગ, જેમાં શાહિદે ડબલ રોલ ભજવ્યો હતો. ₹35 કરોડના બજેટ સામે ₹71 કરોડની કમાણી કરી હતી.

• હૈદર (2014): શેક્સપિયરના 'હેમ્લેટ' પર આધારિત આ ફિલ્મે ₹80 કરોડની કમાણી કરી અને 5 નેશનલ એવોર્ડ જીત્યા.

• રંગૂન (2017): આ જોડીની એકમાત્ર મોટી નિષ્ફળતા રહી, જે ₹60 કરોડના ખર્ચે બની હતી પણ માત્ર ₹39 કરોડ કમાઈ શકી હતી.

હવે 'ઓ રોમિયો' જે રીતે આગળ વધી રહી છે, તે જોતા લાગે છે કે તે 'કમીને' અને 'હૈદર' કરતા પણ વધુ નફો કરનારી ફિલ્મ સાબિત થશે. શાહિદ કપૂર અને તૃપ્તિ ડિમરીની કેમિસ્ટ્રી યુવા વર્ગમાં લોકપ્રિય થઈ રહી છે.