સલમાનની ‘બેટલ ઓફ ગલવાન’નું નવું ગીત રિલીઝ

બોલીવુડ સુપરસ્ટાર સલમાન ખાન પોતાની આગામી વોર-ડ્રામા ફિલ્મ "બેટલ ઓફ ગલવાન" ને લઈને સતત ચર્ચામાં છે. અરિજિત સિંહના અવાજમાં રિલીઝ થયેલા દેશભક્તિ ગીત "માતૃભૂમિ" ની સફળતા બાદ, હવે મેકર્સે પ્રેમના પર્વ એટલે કે વેલેન્ટાઇન ડે નિમિત્તે ફિલ્મનું બીજું ગીત "મૈં હૂં" રિલીઝ કર્યું છે. આ ગીત સૈનિકના પ્રેમ અને તેના પરિવારના બલિદાનની એક ભાવુક ઝલક રજૂ કરે છે.

સલમાન અને ચિત્રાંગદાની સુંદર કેમેસ્ટ્રી :

આશરે સાડા ચાર મિનિટનું આ ગીત સલમાન ખાન અને ચિત્રાંગદા સિંહની ઓન-સ્ક્રીન લવ સ્ટોરી પર આધારિત છે. ગીતમાં યુદ્ધના મેદાનમાં રહેલો એક સૈનિક કેવી રીતે પોતાની પત્ની અને બાળકોને યાદ કરે છે તે ખૂબ જ સુંદર રીતે દર્શાવવામાં આવ્યું છે. આ વીડિયોમાં બંને કલાકારોની 11મી લગ્ન વર્ષગાંઠની ઉજવણીની કેટલીક હૃદયસ્પર્શી ક્ષણો પણ વણી લેવામાં આવી છે.

શ્રેયા ઘોષાલના અવાજમાં જાદુ :

"મૈં હૂં" ગીતને પ્રખ્યાત ગાયિકા શ્રેયા ઘોષાલ અને અયાન લાલ દ્વારા અવાજ આપવામાં આવ્યો છે. સંગીત નિર્દેશન પણ અયાન લાલનું છે, જ્યારે ગીતના શબ્દો શબ્બીર અહેમદ અને અયાન લાલે સંયુક્ત રીતે લખ્યા છે. યુટ્યુબ પર રિલીઝ થતાની સાથે જ આ ગીતને લાખો વ્યૂઝ મળી રહ્યા છે અને ચાહકો સલમાન-ચિત્રાંગદાની જોડીના વખાણ કરી રહ્યા છે.

ક્યારે રિલીઝ થશે ફિલ્મ ?

અપૂર્વ લાખિયાના નિર્દેશનમાં બનેલી "બેટલ ઓફ ગલવાન" 17 એપ્રિલ, 2026ના રોજ સિનેમાઘરોમાં રિલીઝ થશે. સલમાન ખાન ફિલ્મ્સના બેનર હેઠળ બનેલી આ ફિલ્મમાં સલમાન એક શક્તિશાળી ભૂમિકામાં જોવા મળશે, જ્યારે ચિત્રાંગદા સિંહ તેની પત્નીનું પાત્ર ભજવી રહી છે.