ગોલમાલ 5 અંગે રોહિત શેટ્ટીએ કરી મોટી સ્પષ્ટતા

બોલિવૂડના દિગ્ગજ દિગ્દર્શક રોહિત શેટ્ટી પોતાની સુપરહિટ કોમેડી ફ્રેન્ચાઈઝી 'ગોલમાલ' ના પાંચમા ભાગને લઈને ફરી ચર્ચામાં આવ્યા છે. છેલ્લા કેટલાક સમયથી સોશિયલ મીડિયા અને મીડિયા અહેવાલોમાં એવો દાવો કરવામાં આવી રહ્યો હતો કે 'ગોલમાલ 5' જૂની ક્લાસિક ફિલ્મ 'દો ઔર દો પાંચ' પર આધારિત હશે. જોકે, હવે રોહિત શેટ્ટીની ટીમે આ અહેવાલો પર પૂર્ણવિરામ મૂકતા સત્તાવાર નિવેદન જાહેર કર્યું છે.

નિવેદનમાં કરી સ્પષ્ટતા : 

રોહિત શેટ્ટી પિક્ચર્સ દ્વારા જારી કરવામાં આવેલી અખબારી યાદી મુજબ, 'ગોલમાલ 5' અંગે ચાલી રહેલા તમામ સમાચારો તદ્દન ખોટા અને પાયાવિહોણા છે. ટીમે સ્પષ્ટ કર્યું છે કે આ ફિલ્મની વાર્તાનો 'દો ઔર દો પાંચ' સાથે દૂર-દૂર સુધી કોઈ સંબંધ નથી. આ સાથે જ પ્રોડક્શન હાઉસે મીડિયા પ્લેટફોર્મ્સને વિનંતી કરી છે કે પુષ્ટિ કર્યા વગર કોઈ પણ માહિતી પ્રકાશિત ન કરવી. ખોટી માહિતી ફેલાવનાર સામે કાયદાકીય કાર્યવાહી કરવાની ચેતવણી પણ આપવામાં આવી છે.

સફળ ફ્રેન્ચાઈઝીનો પાંચમો ભાગ : 

વર્ષ 2006માં 'ગોલમાલ: ફન અનલિમિટેડ' થી શરૂ થયેલી આ સફર આજે બોલિવૂડની સૌથી સફળ કોમેડી ફ્રેન્ચાઈઝી બની ગઈ છે. અજય દેવગણ, અરશદ વારસી અને તુષાર કપૂર જેવા કલાકારોની જોડીએ પ્રેક્ષકોને ભરપૂર મનોરંજન પૂરું પાડ્યું છે. ચાર બ્લોકબસ્ટર ફિલ્મો આપ્યા બાદ હવે પાંચમા ભાગમાં ફરી એકવાર જૂની સ્ટારકાસ્ટ ધૂમ મચાવવા માટે તૈયાર છે.

મૌલિક વાર્તા સાથે આવશે નવી ફિલ્મ : 

રોહિત શેટ્ટીના આ નિવેદન બાદ હવે એ સ્પષ્ટ થઈ ગયું છે કે 'ગોલમાલ 5' એક મૌલિક અને નવીન વાર્તા પર આધારિત હશે. અજય દેવગણ, શ્રેયસ તલપડે અને કુણાલ ખેમુ જેવા સ્ટાર્સ ફરી એકવાર પડદા પર કોમેડીનો તડકો લગાવશે. ફેન્સ હવે આ નવી બ્લોકબસ્ટરની આતુરતાથી રાહ જોઈ રહ્યા છે.