રાજપાલ યાદવ હજુ જેલમાં, પત્નીએ તોડ્યું મૌન

બોલિવૂડના દિગ્ગજ કોમેડિયન રાજપાલ યાદવ હાલમાં કાયદાકીય મુશ્કેલીમાં ફસાયા છે. ચેક બાઉન્સના જૂના કેસમાં દિલ્હી હાઈકોર્ટના કડક વલણ બાદ અભિનેતાએ 5 ફેબ્રુઆરીએ તિહાર જેલમાં આત્મસમર્પણ કર્યું હતું. કોર્ટે તેમની સજા પરનો સ્ટે લંબાવવાનો ઇનકાર કરતા તેમને જેલના સળિયા પાછળ જવું પડ્યું છે.

સોશિયલ મીડિયાની અફવાઓનું ખંડન : 

છેલ્લા કેટલાક દિવસોથી ઈન્ટરનેટ પર રાજપાલ યાદવ જેલમુક્ત થયા હોવાની વાતો વહેતી થઈ હતી. જોકે, અભિનેતાની પત્ની રાધા યાદવે આ અફવાઓને ખોટી ગણાવી છે. તેમણે સ્પષ્ટતા કરી છે કે રાજપાલ યાદવ હજુ પણ જેલમાં જ છે અને જ્યાં સુધી કાયદેસર રીતે જામીન ન મળે ત્યાં સુધી તેઓ મુક્ત થઈ શકશે નહીં.

બોલિવૂડ સ્ટાર્સ મદદ માટે આવ્યા આગળ : 

મુશ્કેલીના આ સમયમાં ફિલ્મ ઉદ્યોગના અનેક દિગ્ગજો રાજપાલ યાદવના સમર્થનમાં આવ્યા છે. અજય દેવગન અને સોનુ સૂદ જેવા કલાકારોએ તેમને મદદની ખાતરી આપી છે. રાધા યાદવે મીડિયા સાથેની વાતચીતમાં જણાવ્યું હતું કે ઈન્ડસ્ટ્રીના લોકો ખૂબ જ સહકારી રહ્યા છે અને અનેક લોકોએ સ્વેચ્છાએ મદદનો હાથ લંબાવ્યો છે. જોકે, તેમણે આ મદદના સ્વરૂપ કે નામો વિશે કોઈ પણ વિગતો આપવાનું ટાળ્યું હતું.

સ્વાસ્થ્ય અને આગામી સુનાવણી : 

જેલના દિવસો દરમિયાન અભિનેતાનું સ્વાસ્થ્ય સારું હોવાનું તેમના પરિવાર દ્વારા જણાવવામાં આવ્યું છે. આ કેસમાં આજે કોર્ટમાં ફરી સુનાવણી થવાની છે, જેના પર સૌની નજર ટકેલી છે. ચાહકો પણ સોશિયલ મીડિયા દ્વારા તેમના પ્રિય અભિનેતાની વહેલી મુક્તિ માટે પ્રાર્થના કરી રહ્યા છે.