બોલીવુડ અભિનેતા શાહિદ કપૂર અને દિગ્દર્શક વિશાલ ભારદ્વાજની સફળ જોડી ફરી એકવાર 'ઓ રોમિયો' દ્વારા દર્શકોનું દિલ જીતવામાં સફળ રહી છે. ૧૩ ફેબ્રુઆરીના રોજ રિલીઝ થયેલી આ ફિલ્મમાં શાહિદ કપૂર અને તૃપ્તિ ડિમરીની કેમેસ્ટ્રીની સાથે સાથે કલાકારોના દમદાર અભિનયની પણ ચર્ચા થઈ રહી છે. તાજેતરમાં સુપરસ્ટાર ઋતિક રોશને આ ફિલ્મ જોઈ શાહિદ કપૂરની ખૂબ પ્રશંસા કરી હતી.
ઋતિક રોશને કરી શાહિદની પ્રશંસા :&nbsp;
ઋતિક રોશને સોશિયલ મીડિયા પર ફિલ્મ પ્રત્યેનો પોતાનો આનંદ વ્યક્ત કરતા શાહિદ કપૂરને આ શૈલીનો શ્રેષ્ઠ કલાકાર ગણાવ્યો હતો. તેણે ફિલ્મના એક્શન દ્રશ્યો અને વાર્તાના વખાણ કરી ચાહકોને સિનેમાઘરોમાં જઈ ફિલ્મ જોવાની સલાહ આપી હતી. જેના જવાબમાં શાહિદ કપૂરે પણ વિનમ્રતા પૂર્વક જણાવ્યું હતું કે તે પોતે કોલેજના સમયથી ઋતિકનો મોટો ચાહક રહ્યો છે અને ઋતિક તરફથી મળેલી આ પ્રશંસા તેના માટે અત્યંત ખાસ છે.
બોક્સ ઓફિસ પર શાનદાર દેખાવ :&nbsp;
'કમીને', 'હૈદર' અને 'રંગૂન' પછી વિશાલ ભારદ્વાજ અને શાહિદ કપૂરની આ ચોથી ફિલ્મ છે. હુસૈન ઝૈદીના પુસ્તક 'માફિયા ક્વીન્સ ઓફ મુંબઈ' પર આધારિત આ ફિલ્મે બોક્સ ઓફિસ પર પણ મજબૂત પકડ જાળવી રાખી છે. રિલીઝના પ્રથમ સપ્તાહમાં જ ફિલ્મે ભારતમાં ₹55 કરોડ અને વિશ્વભરમાં કુલ ₹73 કરોડથી વધુની કમાણી કરી લીધી છે.
સ્ટાર કાસ્ટ અને નિર્દેશન :&nbsp;
વિશાલ ભારદ્વાજ દ્વારા લિખિત અને નિર્દેશિત આ ફિલ્મમાં નાના પાટેકર, તમન્ના ભાટિયા, વિક્રાંત મેસી અને દિશા પટણી જેવા દિગ્ગજ કલાકારોએ પણ મહત્વની ભૂમિકા ભજવી છે. ફિલ્મના ડાર્ક અને ઇન્ટેન્સ વિષયવસ્તુને કારણે તે વિવેચકો અને દર્શકો બંનેની પસંદ બની રહી છે.

બોક્સ ઓફિસ પર ₹73 કરોડનો આંકડો વટાવતી ફિલ્મ 'ઓ રોમિયો' માં શાહિદના અભિનયના ઋતિકે કરી તારીફ

February 21, 2026 | 13:05 IST