નેટફ્લિક્સની આગામી ફિલ્મમાં મનોજ બાજપેયી મુખ્ય ભૂમિકામાં જોવા મળવાના છે, પરંતુ ફિલ્મ રિલીઝ થાય તે પહેલા જ મોટા વિવાદમાં સપડાઈ છે. ફિલ્મના શીર્ષક 'ઘુસખોર પંડિત' ને લઈને ભારે હોબાળો મચ્યા બાદ નિર્માતાઓએ યુટ્યુબ પરથી તેનું ટીઝર હટાવી દીધું છે. આ ફિલ્મ સામે દિલ્હી હાઈકોર્ટમાં અરજી પણ દાખલ કરવામાં આવી છે.
શીર્ષક સામે કેમ છે વિરોધ ?
વિવાદનું મુખ્ય કારણ ફિલ્મનું નામ છે. 'ઘુસખોર' શબ્દ સામાન્ય રીતે લાંચ લેનારા વ્યક્તિઓ માટે નકારાત્મક રીતે વપરાય છે, જ્યારે તેની સાથે 'પંડિત' શબ્દ જોડવામાં આવતા એક ચોક્કસ સમુદાયની લાગણી દુભાઈ હોવાના આક્ષેપો થયા છે. પંડિત શબ્દ વર્ષોથી જ્ઞાન અને ધાર્મિક સન્માનનું પ્રતીક મનાય છે, તેથી તેને ભ્રષ્ટાચાર દર્શાવતા શબ્દ સાથે જોડવા સામે વકીલો અને સામાજિક સંગઠનોએ વાંધો ઉઠાવ્યો છે.
કાયદાકીય ગૂંચ અને FIR :&nbsp;
આ મામલે પરિસ્થિતિ ત્યારે વધુ વણસી જ્યારે લખનૌમાં નિર્માતાઓ અને નેટફ્લિક્સ વિરુદ્ધ એફઆઈઆર નોંધવામાં આવી. આરોપ છે કે આ શીર્ષક સામાજિક શાંતિને જોખમમાં મૂકી શકે છે અને ધાર્મિક લાગણીઓને ઠેસ પહોંચાડે છે. મુંબઈના વકીલ આશુતોષ દુબેએ પણ કાનૂની નોટિસ મોકલીને આ શીર્ષકને અપમાનજનક ગણાવ્યું છે.
નિર્માતાઓનો પક્ષ અને ટીઝર ડિલીટ :&nbsp;
યુટ્યુબ પરથી વીડિયો હટાવવામાં આવતા હવે ત્યાં 'વિડિયો અનએવેલેબલ' જોવા મળી રહ્યું છે. ફિલ્મની પ્રમોશનલ સામગ્રી દૂર કર્યા બાદ દિગ્દર્શક નીરજ પાંડેએ સ્પષ્ટતા કરી છે કે આ એક કાલ્પનિક પોલીસ ડ્રામા છે. તેમણે જણાવ્યું કે પંડિત શબ્દ માત્ર પાત્રના સંદર્ભમાં વપરાયો હતો, પરંતુ પ્રેક્ષકોની નારાજગીને ધ્યાનમાં રાખીને હાલ પૂરતી સામગ્રી હટાવી લેવામાં આવી છે. તેમનું માનવું છે કે ફિલ્મને ટુકડાઓમાં જોવાને બદલે સંપૂર્ણ વાર્તાના સંદર્ભમાં સમજવી જોઈએ.
આ ઘટનાએ ફરી એકવાર OTT પ્લેટફોર્મ પર સર્જનાત્મક સ્વતંત્રતા અને સામાજિક સંવેદનશીલતા વચ્ચેના સંતુલન અંગે નવી ચર્ચા છેડી દીધી છે.

ઘુસખોર પંડિત ફિલ્મ વિવાદ

મનોજ બાજપેયીની ફિલ્મ સામે વિરોધ વધતા મેકર્સનો મોટો નિર્ણય, શીર્ષકને લઈને કાયદાકીય મુશ્કેલી

February 6, 2026 | 13:44 IST