એલ્વિશ યાદવ અને જિયા શંકરની સગાઈ? તસવીર વાયરલ

સોશિયલ મીડિયાના જાણીતા ઇન્ફ્લુએન્સર એલ્વિશ યાદવ અને અભિનેત્રી જિયા શંકર હાલમાં પોતાની પર્સનલ લાઈફને લઈને ચર્ચામાં છે. ગુરુવારે એલ્વિશ યાદવ દ્વારા શેર કરવામાં આવેલી એક રહસ્યમય ઇન્સ્ટાગ્રામ સ્ટોરીએ બંનેની સગાઈ થઈ હોવાની અફવાઓને વેગ આપ્યો છે.

રહસ્યમય પોસ્ટ અને ડાયમંડ રિંગ : 

એલ્વિશે પોતાની ઇન્સ્ટાગ્રામ સ્ટોરીમાં એક ક્લોઝ-અપ ફોટો શેર કર્યો હતો, જેમાં તે એક મહિલાનો હાથ પકડેલો જોવા મળે છે. આ તસવીરમાં મહિલાની આંગળીમાં ડાયમંડની વીંટી સ્પષ્ટ દેખાઈ રહી હતી. આ પોસ્ટમાં એલ્વિશે જિયા શંકરને ટેગ કરીને લખ્યું હતું કે તેણે પ્રેમને વધુ એક તક આપી છે અને તેને પોતાનો પ્રેમ મળી ગયો છે. જિયાએ પણ આ સ્ટોરી રીશેર કરીને હાર્ટ ઇમોજી મૂકતા ચાહકોમાં કુતૂહલ વધી ગયું છે.

શું આ માત્ર પ્રમોશનલ સ્ટંટ છે ?

જોકે, હજુ સુધી બંનેમાંથી કોઈએ પણ સત્તાવાર રીતે સગાઈની પુષ્ટિ કરી નથી. મનોરંજન જગતમાં અવારનવાર ફિલ્મો કે મ્યુઝિક આલ્બમના પ્રમોશન માટે સેલિબ્રિટીઓ આવી પોસ્ટ શેર કરતા હોય છે. આથી, ઘણા લોકો તેને આગામી પ્રોજેક્ટ માટેનો માર્કેટિંગ સ્ટંટ પણ માની રહ્યા છે. અગાઉ જિયા શંકરનું નામ અભિષેક મલ્હાન સાથે જોડાયું હતું, પરંતુ ત્યારે પણ આ વાતો માત્ર અફવા જ સાબિત થઈ હતી.

બિગ બોસ સાથેનું કનેક્શન : 

એલ્વિશ યાદવ અને જિયા શંકર બંને 'બિગ બોસ OTT 2' ના સ્પર્ધકો રહી ચૂક્યા છે. એલ્વિશ આ શોનો વિજેતા બન્યો હતો જ્યારે જિયાએ પણ પોતાની રમતથી લોકોના દિલ જીત્યા હતા. જિયા શંકર છેલ્લે મરાઠી ફિલ્મ 'વેદ' અને ટીવી શો 'પિશાચિની' માં જોવા મળી હતી. હવે જોવાનું એ રહેશે કે આ પોસ્ટ પાછળનું સાચું કારણ શું છે.