ધુરંધરનું 'રંભા હો' ગીત અને ઉષા ઉથુપની પ્રતિક્રિયા

આદિત્ય ધરના નિર્દેશનમાં બનેલી ફિલ્મ 'ધુરંધર' હાલમાં તેની મજબૂત વાર્તા અને શાનદાર સંગીતને કારણે ચર્ચામાં છે. આ ફિલ્મમાં 70 અને 80ના દાયકાના હિટ ગીતોને નવા અવતારમાં રજૂ કરવામાં આવ્યા છે. ખાસ કરીને 1981ની ફિલ્મ 'અરમાન'ના લોકપ્રિય ગીત 'રંભા હો' ના રિમિક્સ વર્ઝનને પ્રેક્ષકો તરફથી અભૂતપૂર્વ પ્રતિસાદ મળી રહ્યો છે. હવે આ ગીતના ઓરિજિનલ ગાયિકા ઉષા ઉથુપે પણ આ રિમેક પર પોતાનો અભિપ્રાય વ્યક્ત કર્યો છે.

રિમિક્સ વર્ઝનથી પ્રભાવિત થયા ઉષા ઉથુપ : 

સામાન્ય રીતે જૂના ગીતોની રિમેક બનાવતી વખતે મૂળ કલાકારો નારાજ થતા હોય છે, પરંતુ ઉષા ઉથુપનું વલણ તદ્દન અલગ છે. તેમણે 'રંભા હો' ના નવા વર્ઝનની મુક્તકંઠે પ્રશંસા કરી છે. ઉષા ઉથુપના જણાવ્યા અનુસાર, જ્યારે તેમણે આ ગીતની લિંક જોઈ ત્યારે તેઓ આશ્ચર્યચકિત થઈ ગયા હતા. તેમને આ નવા પ્રયોગથી કોઈ વાંધો નથી, ઉલટાનું તેઓ ખુશ છે કે આ ગીત નવી પેઢી સુધી પહોંચી રહ્યું છે.

નવા ગાયક અને સંગીતકારની પ્રશંસા : 

'ધુરંધર'માં આ ગીતને શાશ્વત સચદેવ દ્વારા ફરીથી તૈયાર કરવામાં આવ્યું છે અને મધુવંતી બાગચીએ તેને પોતાનો અવાજ આપ્યો છે. ઉષા ઉથુપે મધુવંતીના અવાજ અને ગાયકીની પ્રશંસા કરતા કહ્યું કે ગીત હંમેશા કોઈ પણ ગાયક કરતા મોટું હોય છે. તેમણે મધુવંતી સાથે મળીને સોશિયલ મીડિયા પર એક વીડિયો પણ બનાવ્યો હતો, જે સોશિયલ મીડિયા પર ઘણો વાયરલ થયો છે.

સોશિયલ મીડિયા પર ગીતનો ક્રેઝ : 

ઉષા ઉથુપ માને છે કે 'ધુરંધર'ની રિમેકે આ જૂના ક્લાસિક ગીતમાં નવી ઉર્જા ભરી દીધી છે. ઇન્સ્ટાગ્રામ અને અન્ય પ્લેટફોર્મ્સ પર આ ગીતને લાખો લાઇક્સ અને હિટ્સ મળી રહી છે. ગાયિકાએ ગીતને ફરીથી લોકપ્રિય બનાવવા બદલ ફિલ્મના મેકર્સનો આભાર માન્યો છે. તેમના મતે, જે પણ કલાકાર આ ગીત ગાય છે, તે હંમેશા હિટ સાબિત થાય છે.