મનોજ બાજપાઈ સ્ટારર અને નીરજ પાંડે દ્વારા પ્રોડ્યુસ કરવામાં આવેલી આગામી ફિલ્મ તેના શીર્ષકને કારણે ભારે વિવાદમાં સપડાઈ હતી. આ ફિલ્મના નામ સામે બ્રાહ્મણ સમુદાયને બદનામ કરવાનો આક્ષેપ લાગતા સોશિયલ મીડિયા પર પણ ફિલ્મને બહિષ્કાર કરવાની માંગ ઉઠી હતી. હવે આ મામલે લેટેસ્ટ અપડેટ સામે આવ્યું છે કે મેકર્સ આ ફિલ્મનું નામ બદલવા માટે તૈયાર થઈ ગયા છે.
શા માટે થયો હતો વિરોધ ?
ફિલ્મનું ટાઈટલ 'ઘૂસખોર પંડિત' રાખવામાં આવ્યું હતું, જેનો અર્થ ભ્રષ્ટ પંડિત એવો થાય છે. ટીકાકારો અને ફેડરેશન ઓફ વેસ્ટર્ન ઇન્ડિયા સિને એમ્પલોઇઝ (FWICE) દ્વારા એવી રજૂઆત કરવામાં આવી હતી કે આ ટાઈટલ એક વિશિષ્ટ સમુદાયની ભાવનાઓને ઠેસ પહોંચાડે છે અને નકારાત્મક છબી ઉભી કરે છે. દેશભરમાં વધતા દબાણ અને વિવિધ એફઆઈઆરના પગલે આખરે નેટફ્લિક્સે કાયદાકીય માર્ગ અપનાવવો પડ્યો હતો.
દિલ્હી હાઈકોર્ટમાં સુનાવણી :&nbsp;
નેટફ્લિક્સે દિલ્હી હાઈકોર્ટને લેખિતમાં જાણકારી આપી છે કે તેઓ આ વિવાદને ધ્યાને રાખીને ફિલ્મનું નામ બદલી રહ્યા છે. કંપનીના વકીલે કોર્ટને ખાતરી આપી કે ફિલ્મ સાથે જોડાયેલું તમામ વિવાદાસ્પદ પ્રમોશનલ મટિરિયલ સોશિયલ મીડિયા પ્લેટફોર્મ પરથી હટાવી લેવામાં આવ્યું છે. આ નિવેદન બાદ અદાલતે ફિલ્મની રિલીઝ પર રોક લગાવવાની અરજીને ફગાવી દીધી છે.
મનોજ બાજપાઈ અને નીરજ પાંડેનો પક્ષ :&nbsp;
આ મામલે અભિનેતા મનોજ બાજપાઈએ સ્પષ્ટતા કરતા જણાવ્યું કે તેમનો હેતુ કોઈ ચોક્કસ સમુદાય પર ટિપ્પણી કરવાનો નહોતો, પરંતુ તેમણે પાત્રની જરૂરિયાત મુજબ આ પ્રોજેક્ટ પસંદ કર્યો હતો. તેમણે દર્શકોની લાગણીને માન આપીને પ્રમોશનલ કન્ટેન્ટ દૂર કરવાની વાતને સમર્થન આપ્યું હતું.
બીજી તરફ, નિર્માતા નીરજ પાંડેએ પણ સફાઈ આપતા કહ્યું કે આ એક કાલ્પનિક વાર્તા છે. તેમણે ઉમેર્યું કે ફિલ્મમાં વપરાયેલો શબ્દ માત્ર એક કાલ્પનિક પાત્રની ઓળખ માટે હતો અને તે કોઈ પણ જાતિ કે ધર્મને પ્રતિનિધિત્વ કરતું નથી. જોકે, વિવાદ વ્યાપક બનતા હવે નવી ઓળખ સાથે આ ફિલ્મ પ્રેક્ષકો સમક્ષ આવશે.

સોશિયલ મીડિયા પર ભારે વિરોધ અને દિલ્હી હાઈકોર્ટમાં સુનાવણી બાદ મેકર્સે નમતું જોખ્યું

February 10, 2026 | 18:42 IST