મહિલા રમતવીરોને મોટી જાહેરાતો કેમ નહિ મળે?

ચક દે ઇન્ડિયા યાદ આવે છે. ફિલ્મમાં કોચને ભારતીય મહિલા હોકી ટીમને વિશ્વ કપ સુધી પહોંચાડવા મથામણ કરવી પડી. હવે વાસ્તવિક દુનિયામાં નજર કરીએ, તો ભારતની મહિલા ક્રિકેટ ટીમ વિશ્વ કપ જીતી ચૂકી છે, દેશનું માન વધારી ચૂકીછે — પરંતુ તેમની મહેનત, પરિશ્રમ અને સિદ્ધિ સામેથી પણ બ્રાન્ડ જગતનું દ્વિધાત્વ આજે પણ અખંડ છે.

આજે પણ જાહેરાત જગતમાં ‘ગ્લેમર’ ને પ્રાથમિકતા, ‘ગૌરવ’ને નહીં. બોલિવુડની હિરોઇનોને લાખો-કરોડોના કોન્ટ્રાક્ટ મળે, પરંતુ દેશને ગૌરવ અપાવતી મહિલા રમતવીરોને શા માટે એકાદ સ્પોર્ટ્સ બ્રાન્ડ સિવાય મોટી જાહેરાતો ન મળે?

જાહેરાતદાતાઓની માનસિકતા સ્પષ્ટ છે — સ્ત્રી એટલે માત્ર ગ્લેમરસ ચહેરો. એટલે જ આલિયા ભટ્ટ ગુચીની ગ્લોબલ એમ્બેસેડર બને, દિપિકા પદુકોણ કાર્ટિયરની પ્રતિક બને, સોનમ કપૂર ડિઓરની પ્રતિનિધી બને… બીજી બાજુ, મહિલા ક્રિકેટરોને મુખ્યત્વે સ્પોર્ટ્સ અથવા હેલ્થ બ્રાન્ડ્સ સાથે જ જોઈ શકાય. પ્રશ્ન એ છે કે દેશમાં ગ્લેમર મહત્વનું કે ગૌરવ?

પુરુષ ક્રિકેટરોએ પણ અનેક ‘નૉન-સ્પોર્ટ્સ’ બ્રાન્ડ્સ માટે એન્ડોર્સમેન્ટ કર્યા છે. વિરાટ કોહલી, સચિન તેંડુલકરથી લઈને યુવા પેઢીના ક્રિકેટરો — તમામને બેન્ક, મોબાઇલ, કાર્સ સુધીના બ્રાન્ડ્સ મળે છે. તો પછી મહિલા રમતવીરોને એટલુંજ સિદ્ધ નામ મેળવ્યા છતાં શા માટે ઓછા પડતા કોન્ટ્રાક્ટ મળે?

સ્મૃતિ મંધાના, હરમાનપ્રીત કૌર, જેમિમા રોડ્રિગ્ઝ જેવા નામે પ્યુમા, એશિયન પેઇન્ટ્સ, હ્યુન્ડાઈ જેવા બ્રાન્ડ્સ સાથે જોડાણ કર્યું છે — પરંતુ રકમની દ્રષ્ટિએ તે બોલિવુડની હિરોઇનોની ‘ફી’ની સામે તૂટી પડે છે.

ગુજરાતમાંથી નીકળેલી રાધા યાદવ અને યસ્તિકા ભાટિયા, જેઓ ભારતમાં ક્રિકેટનું ગૌરવ છે, પરંતુ ગુજરાતની જાણીતી કંપનીઓએ તેમને પોતાની બ્રાન્ડ એમ્બેસેડર બનાવવાનો વિચાર કર્યો છે? ના. તેઓ હજી પણ ‘ગ્લેમરસ ચહેરો’ શોધે છે.

જ્યાં સુધી ગ્રાહકોની નજર ‘ચમકધમક’ અને ‘રૂપસુંદર’ ચહેરા પર પડશે, ત્યાં સુધી દેશના સાચા હીરો — રંગમંચે નહીં, મેદાનમાં ભારતને વિજય અપાવનારાઓને યોગ્ય ન્યાય નહીં મળે.