કેન્દ્ર અજાણ કેમ? ગુજરાતની હકીકત કોને છુપાવી?

ખરેખર? શું ૨૦૨૫ના એપ્રિલથી ડિસેમ્બર વચ્ચે ગુજરાતમાં કમોસમી વરસાદ, પૂર અને પાકનૂકશાન થયું જ નથી?
જો એવું હોય, તો રાજ્ય સરકારે જાહેર કરેલા હજારો કરોડના રાહત પેકેજ, લાખો હેક્ટર જમીન પર નુકશાન, અને લાખો ખેડૂતોની તકલીફો—આ બધું માત્ર કાગળ પરનું નાટક હતું?

આ પ્રશ્ન કોઈ વિરોધ પક્ષ પૂછતો નથી, કોઈ કાર્યકર ઊભો કરીને ચીખી નથી રહ્યો—આ પ્રશ્ન ભારતના સંસદ મંચ પરથી, કેન્દ્રના ગૃહ મંત્રાલયના જવાબ દ્વારા ઊભો થયો છે.

રાજ્યસભામાં સાંસદ પરીમલ નથવાણીએ પૂછેલા પ્રશ્નના જવાબમાં ગૃહ મંત્રાલયે કહ્યું કે

• આંધ્રપ્રદેશમાં દોઢ લાખ હેક્ટર પાક નષ્ટ થયો

• ઝારખંડમાં ૧૭,૦૦૦ હેક્ટર જમીનને નુકશાન થયું
  પરંતુ ગુજરાતમાં—એક ઈંચ, એક વિઘા, એક હેક્ટર પણ નહીં.

આ જવાબ માત્ર આશ્ચર્યજનક નથી, તે ખતરનાક છે. કારણ કે તે સંકેત આપે છે કે

• કોઈએ સંસદને ખોટી માહિતી આપી છે, અથવા

• રાજ્યનું વહીવટી તંત્ર માહિતી પહોંચાડવામાં નિષ્ફળ રહ્યું છે.

બન્ને પરિસ્થિતિમાં નુકશાન ગુજરાતના ખેડૂતોને જ થાય છે.

હકીકત શું કહે છે?

ઓગસ્ટ ૨૦૨૫માં આવેલા ભારે વરસાદ અને પૂર બાદ રાજ્ય સરકારે સ્વીકાર્યું હતું કે

• ૧૮ તાલુકા અને ૮૦૦ ગામોમાં પાકને નુકશાન થયું

• અને રૂ. ૯૪૭ કરોડનું રાહત પેકેજ જાહેર કર્યું

પછી ઓક્ટોબર ૨૦૨૫માં પડેલા કમોસમી વરસાદે

• ૪૪ લાખ હેક્ટર જમીન પર પાક બરબાદ કર્યો

• લગભગ ૧૦ લાખ ખેડૂતોને સીધો આર્થિક ફટકો પડ્યો

• અને સરકારને રૂ. ૧૦,૦૦૦ કરોડનું પેકેજ જાહેર કરવું પડ્યું

તો પછી પ્રશ્ન એ છે—
કેન્દ્ર સરકાર સુધી આ માહિતી પહોંચી કેમ નહીં?

શું ગુજરાત એટલું અમીર છે કે કેન્દ્રની જરૂર નથી?

જો રાજ્ય સરકારે National Disaster Response Fund (NDRF)માંથી મદદ માગી ન હોય,
તો પણ માહિતી આપવાની ફરજ તો હતી જ.

જ્યારે “ડબલ એન્જિન સરકાર”ના લાભો ગાવામાં આવે છે,
ત્યારે આ ડબલ એન્જિન વચ્ચે માહિતીનું ઈંધણ કેમ ન પહોંચ્યું?

વડાપ્રધાન અને ગૃહમંત્રી બંને ગુજરાતમાંથી આવે છે—
કોઈ નાની રાજકીય ઘટના થાય તો દિલ્હી સુધી સમાચાર પહોંચી જાય,
પણ દસ લાખ ખેડૂતોનો પાક ધોવાઈ જાય,
છ ખેડૂતો આત્મહત્યા કરે,
અને દિલ્હી કહે—ગુજરાતમાં કંઈ થયું જ નથી!

આને શું કહેવાય? ગુડ ગવર્નન્સ?

વીમાની યોજના પણ કેમ ચૂકી?

રાજ્ય પાસે માત્ર NDRF જ નહોતું.
Restructured Weather Based Crop Insurance Scheme (RWBCIS) જેવી યોજના પણ હતી,
જે અંતર્ગત હવામાન બદલાવથી થયેલા નુકશાન માટે સહાય મળે છે.

તો પ્રશ્ન એ છે—

• આ યોજના હેઠળ મદદ કેમ ન માગી?

• ખેડૂતોને વધુ સહાય કેમ ન અપાઈ?

• શું વહીવટી બેદરકારી, કે રાજકીય અહંકાર વચ્ચે ખેડૂત પીસાઈ ગયો?

આ સંપાદકીય કોઈ એક સરકાર સામે નથી—
આ પ્રશ્ન જવાબદારીનો છે,
માહિતીની પારદર્શિતાનો છે,
અને સૌથી વધુ—ખેડૂતના હકનો છે.