કોણ છે મહેશ વસાવા? તેનું રાજીનામા સમાચાર કેવી રીતે બની શકે?

મહેશ વસાવા કોણ છે કે જેના રાજીનામાની આટલી મોટી નોંધ મીડિયા લે છે અને રાજકીય પક્ષના નેતાઓ તેના પર પ્રતિક્રિયા આપે છે? શું કોઈપણ રાજકીય કાર્યકર્તા કે નેતા મોટા પક્ષમાંથી રાજીનામું આપે તો તે એટલા મોટા સમાચાર બની જાય?

ગુજરાતના રાજકારણમાં મહેશ વસાવાનું વાસ્તવિક કદ શું છે કે મીડિયા તેની આટલી ગંભીર નોંધ લઈ રહ્યું છે? વસાવા તેમની મૂળ ભારતીયટ્રાયબલ પાર્ટી (BTP)ના કેટલા ઉમેદવારોને ગ્રામ પંચાયત, તાલુકા કે જિલ્લા પંચાયત, વિધાનસભા કે લોકસભામાં ચૂંટાવી લાવી શક્યા છે? શું તેઓ પોતાના બળબૂતે ચૂંટણી જીતીને વિધાનસભામાં પહોંચ્યા છે?

જે નેતાને ભરૂચ કે નર્મદા જિલ્લાના રાજકારણની સમજ નથી, જે તેમના જ એક સમયના સાથી ચૈતર વસાવાના હાથે વિધાનસભાની બેઠક હારી ગયા હોય, જે પોતાના પિતા છોટુ વસાવાથી અલગ પોતાની રાજકીય ઓળખ બનાવવા નીકળી પડ્યા, જે પિતાએ ભારતીય ટ્રાયબલ પાર્ટીની સ્થાપના કરી તેને પક્ષમાંથી બરતરફ કર્યા અને તેના જ પક્ષનું નામ બગાડ્યું, તે વ્યક્તિ ભાજપમાં જોડાય તો પણ સમાચાર બને છે અને ભાજપ છોડે તો પણ સમાચાર બને છે. મહેશ વસાવા ભાજપમાં જોડાયા ત્યારે BJP કે RSS ની વિચારધારાનો ખ્યાલ નહોતો, અને હવે છોડતી વખતેતેમને બધું યાદ આવ્યું છે.

આવા નેતાઓના રાજીનામાની નોંધ લેવા સાથે તેમને ખુલ્લા પાડવા જોઈએ કે આ એવા નેતા છે જેમનો કોઈ જનાધાર નથી, છતાં ખોટી ખોટી રાજકીય ઉછળકૂદ માત્ર પ્રસિદ્ધિ માટે કરે છે. આવું કરવાને બદલે મહેશ વસાવા અને તેમના જેવા નેતાઓએ સૌપ્રથમ તો તેમનો જનાધાર વિકસાવવો જોઈએ અને જમીન પર જઈને પ્રજા માટે કામ કરવું જોઈએ. મહેશ વસાવા જો આદિવાસી નેતા હોવાનો દાવો કરતા હોય તો સૌપ્રથમ આદિવાસીઓના કલ્યાણ માટે કામ કરે, પરિણામ બતાવે અને પછી રાજકીય પલટાઓ મારે. સમાચારોમાં રહેવાથી મત મળતા નથી, આવી ગેરસમજ મહેશ વસાવાએ ન સેવવી જોઈએ.

મહેશભાઈ, તમારા પિતા છોટુ વસાવાએ તેમની રાજકીય કારકિર્દીમાં આદિવાસીઓનું કલ્યાણ કર્યું કે નહીં તે અલગ વાત છે, પરંતુ ચોક્કસવિસ્તારમાં તેમણે આદિવાસી સમાજ પર એક પ્રભુત્વ બનાવી રાખ્યું હતું, જેથી તેઓ લાંબો સમય રાજકારણમાં ટકી રહ્યા હતા. ક્યારે સત્તા પક્ષ સાથે રહેવું અને ક્યારે વિપક્ષના નેતાનો હાથ પકડવો કે સાથ આપવો તેની તેમની પાસે સમજ હતી, એટલે બે થી ત્રણ બેઠકો પર તેમનું પ્રભુત્વ લાંબાસમય સુધી રહ્યું. પહેલા છોટુભાઈ જેટલું વર્ચસ્વ બનાવો, પછી રાજકીય સ્ટંટ કરજો.